អគ្គមហាសេនាបតី​តេ​ជោ ហ៊ុនសែន: កម្ពុជា នឹងក្លាយជាប្រទេសមានចំណូលមធ្យមកម្រិតខ្ពស់ត្រឹមឆ្នាំ ២០៣០

ភ្នំពេញ៖ តាមរយៈខ្លឹមសារស្ដីពីវេទិកា​ធុរកិច្ច​កម្ពុជា-ស្រីលង្កា កាលពីល្ងាចថ្ងៃទី ៧ ខែសីហា ឆ្នាំ ២០១៩ នេះ សម្ដេច​អគ្គមហាសេនាបតី​តេ​ជោ ហ៊ុនសែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា សរសរបញ្ជាក់​ថា គិត​ត្រឹម​ឆ្នាំ ២០៣០ ខាងមុខ កម្ពុជា អាចនឹងក្លាយជា​ប្រទេស​មាន​ចំណូល​មធ្យម​កម្រិត​ខ្ពស់ ខណៈបច្ចុប្បន្នកម្ពុជា មានឋានៈ​ជា​ប្រទេស​​មាន​ចំណូល​មធ្យម​កម្រិត​ទាប។

សម្តេច​តេ​ជោ​បាន​បង្ហាញថា ក្នុង​រយៈពេល​ជាង​ពីរ​ទសវត្សរ៍​ចុងក្រោយ​នេះ កម្ពុជា​សម្រេចបាន​នូវ​កំណើនសេដ្ឋកិច្ច​ប្រចាំឆ្នាំ ជា​មធ្យម​ក្នុង​រង្វង់ ៧,៧% ហើយ​បាន​ចាក​ចេញពី​ឋានៈ​ជា​ប្រទេស​មាន​ចំណូល​ទាប​ទៅជា​ប្រទេស​មាន​ចំណូល​មធ្យម​កម្រិត​ទាប ក្នុង​ឆ្នាំ២០១៥។

សូចនាករ​នេះ​បង្ហាញថា កម្ពុជា​កំពុងស្ថិត​នៅលើ​គន្លង​នៃ​ការ​ឈានទៅ​សម្រេចបាន​ឋានៈ​ជា​ប្រទេស​មាន​ចំណូល​មធ្យម​កម្រិត​ខ្ពស់​ត្រឹម​ឆ្នាំ២០៣០។ តួលេខ​វិនិយោគ​ក្នុង​ឆមាស​ទី១ ឆ្នាំ២០១៩ បង្ហាញ​ពី​ភាព​វិជ្ជមាន​ជាច្រើន ដែល​គម្រោង​វិនិយោគ​ត្រូវបាន​អនុម័ត មាន​ចំនួន ១៥៣ គម្រោង ក្នុង​ទុនវិនិយោគ​ប្រមាណ ៥,២ពាន់​លាន​ដុល្លារ​អាមេរិក បើ​ប្រៀបធៀប​នឹង​រយៈពេល​ដូចគ្នា​ក្នុង​ឆមាស​ទី១ ឆ្នាំ២០១៨ ដោយ​ចំនួន​គម្រោង​មានការ​កើនឡើង ៤៨គម្រោង ខណៈដែល​ទុនវិនិយោគ​មានការ​កើនឡើង​ប្រមាណ ២ពាន់​លាន​ដុល្លារ​អាមេរិក។

ចំណែក​ក្នុង​វិស័យ​ទេសចរណ៍ ចំនួន​ភ្ញៀវទេសចរ​ដែល​បានមក​កាន់​កម្ពុជា​បន្ត​កើន​ឡើងជា​លំដាប់។ ក្នុង​រយៈពេល ៥ខែ​ដើមឆ្នាំ២០១៨នេះ កម្ពុជា​បាន​ស្វាគមន៍​ភ្ញៀវទេសចរ​បរទេស​សរុប​ប្រមាណ​ជា ២, ៨៨ លាន​នាក់ មានការ​កើនឡើង ១១, ៤% បើ​ធៀប​នឹង​រយៈពេល​ដូចគ្នា​ក្នុង​ឆ្នាំ២០១៨។ ជាមួយគ្នានេះដែរ ក្នុង​រយៈពេល​ដូចគ្នានេះ ចំនួន​ភ្ញៀវទេសចរ​ស្រីលង្កា បាន​កើនឡើង ២២% គឺ​ពី ១.៤៣៧នាក់ ដល់ ១.៧៥៦នាក់។

គួរកត់សម្គាល់​ផងដែរ​ថា ក្នុង​ឆ្នាំ២០១៨ កម្ពុជា​បាន​ស្វាគមន៍​ភ្ញៀវទេសចរ​ចំនួន​ប្រមាណ ៦,២លាន​នាក់ ហើយ​កម្ពុជា​រំពឹងថា ចំនួន​ភ្ញៀវទេសចរ​នឹង​កើនឡើង​បន្ថែមទៀត​នៅក្នុង​ឆ្នាំ​បន្តបន្ទាប់ ពោលគឺ​ប្រមាណ ៧លាន​នាក់​នៅ​ឆ្នាំ២០២០ និង ១១លាន​នាក់​នៅ​ឆ្នាំ២០២៥ ដែល​នេះ​ជា​ឱកាស​ដ៏​ល្អ​សម្រាប់​អ្នកវិនិយោគ និង​ធុរជន ក្នុងការ​បណ្តាក់ទុន​ក្នុង​វិស័យនេះ។

សម្តេច​តេ​ជោ​បានបង្ហាញ​ពី​ដាក់ចេញ​នូវ​គោលនយោបាយ​អភិវឌ្ឍន៍​វិស័យ​ឧស្សាហកម្ម​កម្ពុជា​ឆ្នាំ២០១៥-២០២៥ ដែលជា​យុទ្ធសាស្ត្រ​កំណើនសេដ្ឋកិច្ច​ថ្មី សំដៅ​ធ្វើ​ពិធ​កម្ម​សេដ្ឋកិច្ច និង​កែប្រែ​រចនាសម្ព័ន្ធ​ឧស្សាហកម្ម​កម្ពុជា​ពី​ឧស្សាហកម្ម​អតិពលកម្ម ទៅជា​ឧស្សាហកម្ម​ផ្អែកលើ​ជំនាញ​ត្រឹម​ឆ្នាំ២០២៥៕