កម្ពុជា-ថៃ ឯកភាពគ្នា ៦ ចំណុច ដើម្បីបន្តកិច្ចសហប្រតិបត្តិការទេសចរណ៍រួម ២០១៩-២០២១

ភ្នំពេញ៖ យោងតាម​ការចេញផ្សាយ​នៅលើ​គណនី​ក្រសួងទេសចរណ៍​នៅមុននេះ​បន្តិច ក្រុមការងារ​បច្ចេក​ក្នុង​វិស័យ​ទេសចរណ៍ នៃ​ក្រសួងទេសចរណ៍​កម្ពុជា និង​ថៃ បាន​ឯកភាពគ្នា​បន្ត​កិច្ច​សហ​ប្រតិបត្តិ​ការ​ទេស​ចរណ៍​ជាមួយគ្នា លើ​ផែនការ​សកម្មភាព​រួម ឆ្នាំ២០១៩-២០២១ ដោយ​ផ្ដោត​សំខាន់​លើ​កិច្ចការ​ចំនួន ៦ ចំណុច សម្ដៅជំរុញ​កំណើន​ទេសចរ​ឱ្យ​កាន់តែ​មានការ​កើនឡើង​ថែមទៀត។

ការឯកភាព​គ្នា​នេះ ត្រូវបាន​ធ្វើឡើង​កិច្ចប្រជុំ​ក្រុមការងារ​បច្ចេកទេស​ទេស​ចរណ៍​កម្ពុជា-ថៃ លើក​ទី៥ ស្តីពី​កិច្ចសហប្រតិបត្តិកា​រវិ​ស័​យ​ទេសចរណ៍ ចាប់ពី​ថ្ងៃទី១៧-១៩ ខែសីហា ឆ្នាំ២០១៩ នៅ​កោះ​ឆាង ខេត្ត​ត្រាត ប្រទេស​ថៃ។ ភាគី​កម្ពុជា​ដឹកនាំ​ដោយ​ឯកឧត្តម ថោង រដ្ឋ​សក្តិ អគ្គនាយក​នៃ​អគ្គនាយកដ្ឋាន​អភិវឌ្ឍន៍​ទេសចរណ៍ និង​សហប្រតិបត្តិការ​អន្តរជាតិ នៃ​ក្រសួងទេសចរណ៍។

ឯកឧត្តម ថោង រដ្ឋ​សក្តិ បានបញ្ជាក់​ប្រាប់ឱ្យដឹង​ថា ភាគី​កម្ពុជា-ថៃ​បាន​ពិនិត្យ និង​អបអរសាទរ​ចំពោះ​លទ្ធផល ដែល​បានសម្រេច​អនុវត្តតាម​ផែនការ​សកម្មភាពធំៗមួយចំនួន ដែលជា​ស្មារតី​នៃ​កិច្ចប្រជុំ​ក្រុមការងារ​បច្ចេកទេស​ទេស​ចរណ៍​កម្ពុជា-ថៃ លើក​ទី៤ និង​កិច្ចប្រជុំ​រដ្ឋមន្ត្រី​ទេសចរណ៍​កម្ពុជា-ថៃ លើក​ទី២ កាលពី​ថ្ងៃទី១៦-១៧ ខែតុលា ឆ្នាំ២០១៨ នៅ​អគារ​ឡឺ​បូកគោ​ផា​លេស ខេត្តកំពត កន្លងមក។

ឯកឧត្តម​បាន​បន្តថា ក្នុង​កិច្ចប្រជុំ​ក្រុមការងារ​បច្ចេកទេស​ទេស​ចរណ៍​កម្ពុជា-ថៃ លើក​ទី៥នេះ ភាគី​ទាំង​ពីរបាន​ឯកភាព​អនុវត្ត​បន្ត​កិច្ចសហប្រតិបត្តិការ​ទេស​ចរណ៍​ជាមួយគ្នា លើ​ផែនការ​សកម្មភាព​រួម ឆ្នាំ២០១៩-២០២១ ដោយ​ផ្ដោត​សំខាន់​លើ​កិច្ចការ ៦ចំណុច៖

១៖ ជំរុញ​លំហូរ​ទេសចរ​ទៅវិញទៅមក ទាំង​ទេសចរ​កម្ពុជា និង​ទេសចរ​ថៃ ព្រមទាំង​ទេសចរ​មកពី​ប្រទេស​ទី​បី ឱ្យមក​ទស្សនា​ប្រទេស​ទាំងពីរ ជាមួយនឹង​ការអនុវត្ត​ការងារ​ពាក់ព័ន្ធ​មួយចំនួនទៀត រួមមាន៖ ការសម្រួល​ការធ្វើដំណើ​រ ការបំពេញ​បែបបទ​អន្តោប្រវេសន៍ ការដឹកជញ្ជូន​ទេសចរ​តាម​ច្រកព្រំដែន សម្បទា និង​ហេដ្ឋារចនាសម្ព័ន្ធ​នៅតាម​ច្រកព្រំដែន ការពិភាក្សា​អំពី​ដំណើរការ​នៃ​ការអនុវត្ត​រួម ACMECS Single VISA។

២៖ ការសិក្សា​ទីផ្សារ និង​ការផ្សព្វផ្សាយ​ទេសចរណ៍​រួមគ្នា «ព្រះរាជាណាចក្រ​ពីរ គោលដៅ​ទេសចរណ៍​មួយ»៖ ដើម្បី​អនុវត្ត​ការងារ​នេះ​ទៅបាន ភាគី​ទាំងពីរ​ត្រូវធ្វើ​ការងារ​ពាក់ព័ន្ធ​មួយចំនួនទៀត រួមមាន ការផលិត​វីដេអូរ​ផ្សព្វផ្សាយ​ទេសចរណ៍​រួមគ្នា ការបង្កើត​កញ្ចប់​ទេស​ចរណ៍​រួមគ្នា ការរៀបចំ​ដំណើរ​ទស្សនកិច្ច​សិក្សា​ស្វែងយល់​របស់​អ្នកសារព័ត៌មាន ការរៀបចំ​តាំងពិព័រណ៍​រួមគ្នា ពិនិត្យ​អំពី​លទ្ធភាព​នៃ​ការផ្សព្វផ្សាយ​វីដេអូ​ទេសចរណ៍ និង​ឯកសារ​ទេសចរណ៍​នៅក្នុង​យន្តហោះ។

៣៖ ជំរុញ​ការអភិវឌ្ឍ​វិស័យ​ទេ​សចណ៍​នៅ​ច្រករបៀង​ទេសចរណ៍​ភាគខាងត្បូង ក្នុងនោះ​រួមមាន៖ ការផ្សព្វផ្សាយ​ទេសចរណ៍​បែប​ព្រះពុទ្ធសាសនា ការបង្កើត​ក្រុមការងារ​ទេសចរណ៍​ទ្វេភាគី ដើម្បី​ពិនិត្យ តាមដាន និង​អភិវឌ្ឍន៍​វិស័យ​ទេ​សចណ៍​នៅ​ច្រករបៀង​ទេសចរណ៍​ភាគខាងត្បូង សិក្សា​អំពី​ការរៀបចំ​កម្មវិធី Caravan Tour លើកដំបូង (កម្ពុជា ថៃ មី​យ៉ាន់​ម៉ា វៀតណាម) ពង្រឹង​ធនធានមនុស្ស​ផ្នែក​ភាសា ផ្តោតលើ​មគ្គុទ្ទេសក៍​ទេសចរណ៍​ភាសា​ថៃ ជំរុញ​ការតភ្ជាប់​ជើងហោះហើរ​ត្រង់​បន្ថែម​ទៅវិញទៅមក​ទៅកាន់​ភាគខាងត្បូង​ប្រទេស​ថៃ និង​ខេត្ត​ព្រះសីហនុ​ផងដែរ ជំរុញ​ការធ្វើដំណើរ​តាម​នាវា​ទេសចរណ៍ តាម​ទូក​ល្បឿន​លឿន ការរៀបចំ​សិក្ខាសាលា​បណ្តុះបណ្តាល​មន្ត្រី​ទេសចរណ៍​នៅតាម​ព្រំដែន។

៤៖ អភិវឌ្ឍ​ធនធានមនុស្ស​ទេសចរ​ណ៍ បណ្ដុះបណ្ដាល​មន្ត្រី​ទេសចរណ៍​តាម​បណ្តា​ខេត្ត​ជាប់​ព្រំដែន លើ​ជំនាញ​ទេសចរណ៍ គ្រប់គ្រង​គោលដៅ​ទេសចរណ៍ រមណីយដ្ឋាន​ទេសចរណ៍ និង​បដិសណ្ឋារកិច្ច បន្ត​តាមដាន​ការអនុវត្ត​អនុស្សរណៈ​ជាមួយ​ក្រសួងទេសចរណ៍ និង​សាកលវិទ្យាល័យ រា​ចា​ម៉ាន់​ហ្កា​ឡា ថា​ន់​យ៉ា​បុរី។

៥៖ គាំទ្រ​គ្នា​ក្នុង​ការជំរុញ​ការវិនិយោគ​លើ​វិស័យ​ទេសចរណ៍​រវាង​ប្រទេស​ទាំងពីរ ពិភាក្សា​អំពី​សក្តានុពល ដើម្បី​វិនិយោគ​ហេដ្ឋារចនាសម្ព័ន្ធ​នៃ​ការធ្វើដំណើរ​ផ្លូវទឹក ស្វែងរក​វិនិយោគិន ដើម្បី​វិនិយោគ​នៅតាម​ឆ្នេរ​កម្ពុជា-ថៃ រៀបចំ​វេទិកា​វិនិយោគ​ទេសចរណ៍​ទី២ ចាប់ពី​ថ្ងៃទី៣០-៣១ ខែតុលា ឆ្នាំ២០១៩ នៅ​កម្ពុជា ការអញ្ជើញ​ភាគី​ថៃ​ចូលរួម​ក្នុង​បុណ្យ​ទន្លេ សន្និសីទ​អន្តរជាតិ​ស្តីពី​ទេសចរណ៍​ម្ហូបអាហារ និង​ព្រឹត្តិការណ៍​ទេសចរណ៍​នានា​នៅ​កម្ពុជា។

៦៖ ប​ញ្ជូ​ល​នូវ​សកម្មភាពថ្មីៗក្នុង​ផែនការ​សកម្មភាព​រួម (Join Action Plan) ត្រៀម​ដាក់ជូន​រដ្ឋមន្ត្រី​ទេសចរណ៍​ប្រទេស​ទាំងពីរ​អនុម័ត សម្រាប់​ក្រុមការងារ​អនុវត្ត​នៅ​ថ្ងៃ​អនាគត។

សូមជម្រាបថា ឆ្នាំ២០១៨ កម្ពុជា​បានទទួល​ភ្ញៀវទេសចរ​អន្តរជាតិ​ចំនួន ៦.២លាន​នាក់ កើនឡើង ១០.៧% ក្នុងនោះ​ទេសចរ​ថៃ​មាន​ចំនួន ៣៨២,៣១៧នាក់។ ដោយឡែក ក្នុង​រយៈពេល៦ខែ ដើមឆ្នាំ២០១៩ កម្ពុជា​បានទទួល​ភ្ញៀវទេសចរ​អន្តរជាតិ​ចំនួន​ជាង ៣លាន​នាក់ កើនឡើង ១១% ក្នុងនោះ​ទេសចរ​ថៃ​មាន​ចំនួន ១៧៤,២៤១នាក់ កើនឡើង ៩%៕