ក្រុមហ៊ុនខ្មែរ និងហុងកុង ចាប់ដៃគ្នាអភិវឌ្ឍទីក្រុងនាគ នៅក្នុងតំបន់បឹងទំពុន និងជើងឯក

ភ្នំពេញ៖ ក្រុមហ៊ុន អាយ​អិន​ជី ហូល​ឌី​ង (ING) បាន​ចុះ​កិច្ចព្រមព្រៀង​សហប្រតិបត្តិការ​ជាមួយ​ក្រុមហ៊ុន ខូ​ស​វ៉េ​បេ គ្រុប (Causeway Bay Group) និង​ក្រុមហ៊ុន ស៊ី​ណូ បេ ខន់​ស្ត្រា​ក់សិន អ៊ី​ន​វេស​មេន (SINO Bay Construction Investment) មកពី​ទីក្រុង​ហុងកុង នៅ​ថ្ងៃទី ២៦ ខែសីហា​នេះ ដើម្បី​អភិវឌ្ឍ​មជ្ឈមណ្ឌល​ពាណិជ្ជកម្ម​ទំនើប​មួយ​ហៅថា ទីក្រុង​នាគ ស្ថិតនៅក្នុង​ទីក្រុង​រណប​តំបន់​បឹងទំពុន និង​ជើងឯក។

ការចុះហត្ថលេខា​នេះ បានធ្វើ​ឡើង​នៅ​សណ្ឋាគារ​សូ​ហ្វី​តែ​ល ភូ​កេ​ត្រា ភ្នំពេញ ដោយមាន​ការអញ្ជើញ​ចូលរួម​ពី​លោក កើត ឆែ អភិបាលរង​រាជធានី​ភ្នំពេញ លោក​ឧកញ៉ា លឹម រស់ និង​លោក​ឧកញ៉ា លឹម ប៊ុន​សួរ អនុប្រធាន​ក្រុមប្រឹក្សាភិបាល​ក្រុមហ៊ុន អាយ​អិន​ជី ហូល​ឌី​ង លោក Chen Zhi ប្រធាន​ក្រុមប្រឹក្សាភិបាល​ក្រុមហ៊ុន ខូ​ស​វ៉េ​បេ គ្រុប និង​លោក Zhuang Xiongming អគ្គនាយក ក្រុមហ៊ុន ស៊ី​ណូ បេ ខន់​ស្ត្រា​ក់សិន អ៊ី​ន​វេស​មេន។

លោក​ឧកញ៉ា អ៊ឹង ប៊ុន​ហ៊ូ​វ ប្រធាន​ក្រុមប្រឹក្សាភិបាល​ក្រុមហ៊ុន អាយ​អិន​ជី ហូល​ឌី​ង (ING) បាន​លើកឡើងថា ក្រុម ហ៊ុន​លោក​បានទទួល​គោលការណ៍​ពី​រាជរដ្ឋាភិបាល ដើម្បី​អភិវឌ្ឍ​ការពង្រីក​ទីក្រុង​មក​ភាគខាងត្បូង ដែល​ត្រូវបាន​គេ​ស្គាល់​ថា​ទីក្រុង អ៊ឹង ស៊ី​ធី (ING City)។

លោក​បន្តថា ភ្នំពេញ​មាន​ភាព​សំបូរបែប​រួមផ្សំ​ដោយ​ហាង​ទំនិញ ការិយាល័យ​ធ្វើការ និង​ទីកន្លែង​សំរាកលំហែរ​កំសាន្ត ប្រកបដោយ​ភាពងាយស្រួល និង​បរិស្ថាន​ល្អប្រសើរ​បំផុត។

លោក​ឧកញ៉ា​ថា កិច្ចព្រមព្រៀង​សហប្រតិបត្តិការ​នេះ នឹង​ចងសម្ព័ន្ធ​ក្រុមហ៊ុន​កម្ពុជា និង​ក្រុង​ហុងកុង ដើម្បី​រួម​កម្លាំង​អភិវឌ្ឍ​ទីក្រុង​នាគ នៅក្នុង​តំបន់​បឹងទំពុន និង​ជើងឯក លើ​ផ្ទៃដី៥.៤ហិកតា តាម​បណ្តោយ​មហាវិថី​សម្តេច ហ៊ុន សែន ដែល​គ្រោង​នឹង​ចាប់ផ្តើម​ក្នុង​ឆ្នាំ២០២។ គម្រោង​នេះ​នឹង​ពង្រីក​គ្របដណ្តប់​លើ​ផ្ទៃដី​រហូតដល់ ២៥ហិកតា។

លោក Chen Zhi ប្រធាន​ក្រុមប្រឹក្សាភិបាល​ក្រុមហ៊ុន ខូ​ស​វ៉េ​បេ គ្រុប មកពី​ទីក្រុង​ហុងកុង​បាន​លើកឡើងថា កិច្ចព្រមព្រៀង​នេះ​នឹង​រួមចំណែក​កសាង​មជ្ឈមណ្ឌល​ពាណិជ្ជកម្ម​ថ្មី​មួយ ដែលជា​ការឆ្លើយតប​នឹង​ភាព​រីកចំរើន​ខ្លាំងក្លា​នៃ​សេដ្ឋកិច្ចកម្ពុជា និង​ការកើនឡើង​នៃ​ប្រជាជន​ក្នុង​រាជធានី​ភ្នំពេញ។

លោក​បន្តថា៖«កិច្ចព្រមព្រៀង​ជាមួយ​ក្រុមហ៊ុន អាយ​អិន​ជី ហូល​ឌី​ង នឹង​ជួយ​យើង​កសាង​មជ្ឈមណ្ឌល​ពាណិជ្ជកម្ម​ថ្មី​មួយ នៅ​ទីក្រុង​ភ្នំពេញ ដោយមាន​ផ្សារ​ទំនើប មណ្ឌល​រថយន្ត មណ្ឌល​សំភារ​សំណង់ អគារ​ស្នាក់នៅ​រួម មណ្ឌល​អាហារ​ខ្នាត​អន្តរជាតិ លំនៅដ្ឋាន​គ្រួសារ និង​អគារទំនើបៗ ជាមួយនឹង​ការ​រចនា​យ៉ាង​ពិសេស»។

គួរ​បញ្ជាក់ថា ការអភិវឌ្ឍ​ទីក្រុង​រណប អ៊ឹង ស៊ី​ធី (ING City) បានចាប់ផ្តើម​កាលពី​ឆ្នាំ២០០៧ ហើយ​មហាវិថី​សម្តេច​តេ​ជោ ហ៊ុន សែន ដែល​លាតសន្ធឹង​ប្រវែង ៩,១ គីឡូម៉ែត្រ ត្រូវបាន​ដាក់​ឲ្យ​ប្រើប្រាស់​ជា​សាធារណៈ​កាលពី​ខែ មេសា ឆ្នាំ២០១៧៕