គម្រោងមជ្ឈមណ្ឌលកម្សាន្តតម្លៃ ៥០០ លានដុល្លារ នៅកំពង់ស្ពឺ ចាប់ផ្តើមសាងសង់ហើយ

ភ្នំពេញ៖ គម្រោង​អភិវឌ្ឍន៍​មណ្ឌល​កម្សាន្ត​លំដាប់​អន្តរជាតិ ដែលជា​មណ្ឌល​អេកូ​ទេសចរណ៍​លំដាប់​អន្តរជាតិ វិនិយោគ​ក្នុងតម្លៃ ៥០០លាន​ដុល្លារ​អាមេរិក នៅ​ខេត្តកំពង់ស្ពឺ​ត្រូវបាន​ចាប់ផ្តើម​ជា​ដំណាក់កាល​ដំបូង​ហើយ។ នេះ​បើតាម​ការ​ឲ្យ​ដឹង​ពី​លោក​វ៉ី សំណាង​អភិបាលខេត្ត​កំពង់ស្ពឺ។

​គណៈ​អភិបាលខេត្ត​កំពង់ស្ពឺ​ លោក​ វ៉ី​ សំណាង​ បានឲ្យដឹងថា គម្រោង​សាងសង់​កន្លែង​កម្សាន្ត​ដ៏​ធំ ក្រោម​ការ​វិនិ​យោគ​​រួមគ្នា​រវាង​ក្រុមហ៊ុន​មកពី​ប្រទេស​ផ្សេងគ្នា​ចំនួន ៣ រួមមាន ហុងកុង ស្វី​ស និង​សិង្ហ​បុរី បានចាប់ផ្តើម​មាន​សក​ម្ម​ភាពជាបណ្ដើរៗហើយ។ គម្រោង​នេះ​ស្ថិតនៅ​ម្តុំ​គីឡូម៉ែត្រ​លេខ៥៦- ៥៧- ៥៨ ដែល​ធ្វើដំណើរ​ពី​ជ្រោះ​ពេជ្រនិល គឺ​ស្ថិតនៅ​ខាងឆ្វេង​ដៃ មាន​បឹង​ធម្មជាតិ​ដ៏​ធំ​មួយ​នៅ​ទីនោះ។ លោក​បន្តទៀតថា “បឹង​មួយ​នេះ​មាន​ភាព​អំណោយផល​ដល់​គម្រោង ដោយសារ​នៅក្នុង​គម្រោង​សាងសង់​តម្រូវ​មាន​អាងទឹក​ដំ​ធំ​មួយ ដូច​បានឃើញ​នៅក្នុង​រូបភាព​ស្រាប់។

លោក​វ៉ី សំណាង​បាន​បន្តទៀតថា បឹង​នេះ​នឹងត្រូវ​ស្តារ​ទឹក​ចេញ ហើយ​ជីក​បន្ថែម ដើម្បី​ពង្រីក​ឱ្យ​កាន់តែ​ធំ និង​មាន​ជម្រៅ​ជ្រៅ​ឱ្យស្រប​ទៅតាម​គម្រោង។ ដោយឡែក​ចំពោះ​ក្រុម​អ្នកជំនាញ​ផ្នែក​រៀបចំ និង​កំណត់​ព្រំប្រទល់​សាងសង់ ក៏​កំពុងតែ​ដំណើរការ​រៀបចំ​ដី ដោយ​ការប្រមូលទិញ​ពី​ប្រជាពលរដ្ឋ​ដែល​ស្ថិតនៅក្នុង​តំបន់​គម្រោង។

លោក​បាន​បញ្ជាក់ទៀតថា “បន្ទាប់ពី​ការរៀបចំ​ដី​បាន​ចប់សព្វគ្រប់ ហើយ​ចុះបញ្ជី​ដីធ្លី​ជា​ប្លង់​មេ​តែមួយ​រួចរាល់ នឹងដាក់​សំណើរ​ទៅ CDC ដើម្បី​សុំ​ចុះ និង​អ​ជ្ញា​ប័ណ្ណ​ដំណើរការ​សាងសង់ ខណៈដែល​ការត្រួតពិនិត្យ​គម្រោង ត្រូវបាន​ឆ្លងកាត់​មន្ត្រី​ជំនាញ CDC ម្ដង​រួចហើយ។

គម្រោង​មេ​របស់​មជ្ឈមណ្ឌល​កម្សាន្ត​មួយ​នេះ មាន​ទំហំ​ទឹកប្រាក់​រហូតដល់​ប្រមាណ៥០០លាន​ដុល្លារ ប៉ុន្តែ​នៅក្នុង​តំណាក់កាល​ដំបូង​ក្រុមហ៊ុន​ទាំងនេះ នឹង​ចំណាយ​ទឹកប្រាក់​ចំនួន២០០លាន​ដុល្លារ នៅលើ​ផ្ទៃដី​ទំហំ​ជាង១០០ហិកតា ស្ថិតនៅ​ក្នុងស្រុក​ភ្នំស្រួច និង​ស្រុក​សំរោង​ទង ដែល​នឹង​បញ្ចប់​គម្រោង​សាងសង់​ទាំងស្រុង​ត្រឹម​រយ៥ឆ្នាំ ដើម្បី​ដំណើរការ​ឱ្យទាន់​គម្រោង​សាងសង់ ផ្លូវ​ល្បឿន​លឿន​ភ្នំពេញ-ព្រះសីហនុ។

មជ្ឈមណ្ឌល​កម្សាន្ត​ដ៏​ធំ​លើកដំបូង​ប្រចាំ​កម្ពុ​ជាមួយនេះ ត្រូវបានធ្វើ​ការបែងចែក​ចេញ​ជាច្រើន​ផ្នែក ដូចជា តំបន់​ក្មេង​លេង​ទឹក តំបន់ស​ម្រា់ម​នុស្ស​ពេញវ័យ​កម្សាន្ត​ជាមួយ​ឧបករណ៍ទំនើបៗ តំបន់​សម្រាប់​មនុស្ស​ចា​ស់​លំហែរ​កាយ តាម​លក្ខណៈ​ធម្មជាតិ និង​តំបន់​ជិះ​កង​ហាត់ប្រាណ ដែលមាន​ទំហំ​រហូតដល់៤គីឡូម៉ែត្រ រួមជាមួយ​ការធ្វើជា​កសិដ្ឋាន​បន្លែ​ចម្រុះ និង​ស្រូវ​សម្រាប់​បង្ហាញជូន​ដល់​បណ្តា​ភ្ញៀវទេសចរ​អន្តរជាតិ។ ក្រៅពីនេះ នៅមាន​កា​សាងសង់​ជា​ផ្ទះសំណាក់​លំហែរ​កាយ កម្រិត​ផ្កាយ៥សម្រាប់​ទទួល​ស្វាគមន៍​បណ្តា​ភ្ញៀវទេសចរ​ចម្រុះ​ជាតិ​សាសន៍ ដែល​មកពី​គ្រប់​ប្រទេស​នៅលើ​ពិភពលោក។

លោកជំទាវ​ឧកញ៉ា​ឆាយ ស៊ីវ​លីន​ប្រធាន​សមាគម​ទីភ្នាក់ងារ​ទេសចរណ៍​កម្ពុជា បាន​មានប្រសាសន៍ថា “វា​ជាស​ញ្ញា​ល្អ​មែនទែន​សំរាប់​ខេត្តកំពង់ស្ពឺ និង​ប្រទេសជាតិ​ទាំងមូល ព្រោះ​គម្រោង​វិនិយោគ​ដែលមាន​ទុន​ធំ​បែបនេះ ពិបាក​រក​ណាស់។ លោកស្រី​បន្តថា “គំរោង​វិនិយោគ វិស័យ​ទេសចរណ៍​ចូលទៅ​កាន់​ខេត្តកំពង់ស្ពឺ ក៏​ជា​ខេត្ត​សម្បូរ​ធនធានធម្មជាតិ ដែលមាន​សក្តានុពល​សំរាប់​វិស័យ​ទេសចរណ៍​ផងដែរ។ យើង​ត្រូវការ​អ្នកវិនិយោគ​បែបនេះ ព្រោះ​គំរោង​ធំ​បែបនេះ​អ្នកវិនិយោគ​នឹង​ខិតខំ​ផ្សព្វផ្សាយ​ទៅកាន់​ពិភពលោក ដើម្បី​ទាក់ទាញ​ភ្ញៀវ​ទេសចរណ៍​មកកាន់​កម្ពុជា ដើម្បី​ចូលទៅ​ទស្សនា​គំរោង​របស់​ពួកគេ​ផងដែរ”៕