ក្រុមហ៊ុនកម្ពុជា​-ម៉ាឡេស៊ី បោះទុនជាង ១ លានដុល្លារ បើកកសិដ្ឋានចិញ្ចឹមបង្គានៅខេត្តកំពត

កំពត៖ ក្រុមហ៊ុនកម្ពុជា និងម៉ាឡេស៊ី បាន​បោះទុនរួមគ្នាបង្កើតក្រុមហ៊ុន ​ហ្គ្រេ​ន ហុង យាន អេ​ឃ្វើខ​ល​ឈ័​រ (ខេ​ម​បូ​ឌា) ឯ.ក លើទុន​វិនិយោគ​​ជាង ១ លាន​ដុល្លារ ដើម្បី​បើក​កសិដ្ឋាន​ចិញ្ចឹម​បង្គា ដោយ​ប្រើប្រាស់​លក្ខណៈ​បច្ចេកទេស​ចិញ្ចឹម​ក្នុង​អាង​ផ្លា​ស្ទិ​ច ស្ថិតនៅ​ក្នុងភូមិ​ព្រែក​អំពិល ឃុំ​កោះ​តូច ស្រុក​ទឹកឈូ ខេត្តកំពត ខណៈ​មន្ត្រី​ជំរុញ​លើកទឹកចិត្ត​ឲ្យ​ក្រុមហ៊ុន​បន្ថែម​ទុនវិនិយោគ។

លោក សុ​ប សារា​ប៊ុ​ទ្ទី ប្រធាន​បច្ចេកទេស​ក្រុមហ៊ុន​បាន​ឲ្យ​ដឹងថា បច្ចុប្បន្ន​ក្នុង​កសិដ្ឋាន បាន​យក​បច្ចេកវិទ្យា​ពី​ប្រទេស​ចិន ដើម្បី​សាងសង់​ទីតាំង​ចិញ្ចឹម ការផ្តល់​ចំណី ការគ្រប់គ្រង ការប្រើប្រាស់​ទឹក និង​សម្អាត​ទឹក (water treatment)។ ក្នុងនោះ ក្រុមហ៊ុន​បានធ្វើ​អាង​ចិញ្ចឹម​បង្គា​ចំនួន ៣៤អាង ចិញ្ចឹម​ក្នុង​រយៈ៣ខែ ទើប​គ្រ​ប់ទ​ម្ង​ង់​តាម​ស្តងដារ​ទីផ្សារ​ពី ៣០ ទៅ ៣៥ក្បាល ក្នុង១គីឡូក្រាម ហើយ​ទទួលបាន​តម្លៃ​ពី ៤ ម៉ឺនទៅ ៥ ម៉ឺន​រៀល ក្នុង១គីឡូក្រាម។

លោក​បន្តថា គិត​មក​ត្រឹម​ពេលនេះ ក្រុមហ៊ុន​បាន​បោះទុន​វិនិយោគ​ចំនួន​ជាង ១លាន​ដុល្លារ​ហើយ ដោយ​គិត​រួមទាំង​ការកសាង​ហេដ្ឋារចនាសម្ព័ន្ធ​គាំទ្រសំខាន់ៗសម្រាប់​អភិវឌ្ឍ​កសិដ្ឋាន។ អាជីវ​កម្មនេះ កំពុងស្ថិត​ក្នុងដំណាក់កាល សាក​ពិសោធន៍​ពូជ ទឹក ចំណី និង​លក្ខខណ្ឌ​ចិញ្ចឹម -ល-។ «ពេលខាងមុខ​នេះ ក្រុមហ៊ុន​មាន​ផែនការ​ពង្រីក​ការចិញ្ចឹម ក្នុងដំណាក់កាល​បន្តបន្ទាប់​ចំនួន ៣២រោង លើ​ផ្ទៃដី ៣២ហិកតា ស្ថិតនៅ​ទល់មុខ​កសិដ្ឋាន​នេះ​តែម្ដង។

លោក​ វេ​ង សាខុន រដ្ឋមន្ដ្រី​កសិកម្ម រុក្ខាប្រមាញ់ និង​នេសាទ បាន​លើកទឹកចិត្ត និង​វាយតម្លៃ​ខ្ពស់ ចំពោះ​ការចូលរួម​វិនិយោគ​លើ​វិស័យ​វារីវប្បកម្ម ដែល​រដ្ឋ​បាន​ជលផល​កំពុង​ជំរុញ និង​លើកទឹកចិត្ត​ឲ្យ​វិស័យ​ឯកជន ចូលរួម​ជា​ចលករ​ក្នុង​ការជំរុញ​កំ​ណើ​រ​ភោគផល ចាប់ពី​វារីវប្បកម្ម​ដោយ​ធានាបាន​ទាំង​បរិមាណ និង​គុណភាព​ឆ្លើយតប​តាម​សេចក្តីត្រូវការ​ទីផ្សារ និង​ជាពិសេស​ចូលរួម​កាត់បន្ថយ​ការនាំ​ចូល​ពី​បរទេស។

លោក​បញ្ជាក់ថា ការចូលរួម​ពី​វិស័យ​ឯកជន ក្នុងការ​វិនិយោគ​នេះ ពិតជា​បាន​ចូលរួមចំណែក​បង្កើត​ការងារ ជូន​ប្រជាពលរដ្ឋ​នៅ​មូលដ្ឋាន បង្កើន​ចំណូល​ក្នុង​គ្រួសារ និង​កាត់បន្ថយ​ភាពក្រីក្រ។ ជាពិសេស​ចូលរួម​អនុវត្ត​គោលនយោបាយ និង​ផែនការ​អភិវឌ្ឍ​វិស័យ​កសិកម្ម ស្របតាម​អភិក្រម «រដ្ឋ ឯកជន ដៃគូ​អភិវឌ្ឍ និង​សហគមន៍​កសិកម្ម»៕