រដ្ឋាភិបាលចិន ផ្តល់ហិរញ្ញប្បទានឥតសំណងជិត ១០ លានយន់ ដល់ក្រសួងកសិកម្ម សម្រាប់ជួយដល់ខេត្តមួយចំនួនរបស់កម្ពុជា

ភ្នំពេញ៖ ម្សិលមិញនេះ សាធារណរដ្ឋ​ប្រជាមានិត​ចិន ​បានផ្តល់​ហិរញ្ញប្បទាន​ឥត​សំណង​គិតជាទឹកប្រាក់ប្រមាណ ៩,៦៦០,០០០ យន់ (ស្មើ ១,៣៥៧,០០០ដុល្លារ) ដល់ក្រសួងកសិកម្ម រុក្ខាប្រមាញ់ និង​នេសាទ សម្រាប់ជួយដល់ពលរដ្ឋក្នុងខេត្តចំនួន ៧ សម្រាប់​រយៈពេល ៣ ឆ្នាំ។

រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ​លោក វេ​ង សាខុន បានឲ្យដឹងថា ​​ថ្ងៃទី ១០កញ្ញា​នេះ​ថា សាធារណរដ្ឋ​ប្រជាមានិត​ចិន​បានផ្តល់​ហិរញ្ញប្បទាន​ឥត​សំណង​ជា​ឡ​ជីវ​ឧស្ម័ន​ជូន ​មក​កម្ពុជា​ចំនួន ១,៥០០ឡ រថយន្ត ៣ គ្រឿង ម៉ូតូ ១៤ គ្រឿង ម៉ាស៊ីនភ្លើង ៧ គ្រឿង ម៉ាស៊ីនបូមទឹក ៧ គ្រឿង និង​សម្ភារៈ​ការិ​យា​ល័​យ​​មួយចំនួនធំ​ទៀត គិត​ជា​ទឹកប្រាក់​ចំនួន ៩,៦៦០,០០០ យន់ (ស្មើ ១,៣៥៧,០០០ដុល្លារ)។

លោកបន្តថា សម្រាប់ជំនួយទាំងអស់នោះ ​ត្រូវ​បែងចែក​ទៅ​ខេត្ត​គោលដៅ​ចំនួន ៧ ក្នុងនោះ​ខេត្ត​ត្បូងឃ្មុំ ៣០០ ឡ កំពង់ចាម ២០០ឡ ព្រៃវែង ២០០ឡ ស្វាយរៀង ២០០ឡ កំពង់ឆ្នាំង ២០០ឡ ពោធិសាត់ ២០០​ឡ និង​ខេត្តព្រះវិហារ ២០០ឡ សម្រាប់​រយៈពេល ៣ ឆ្នាំ។

គម្រោង​សាងសង់​ឡ​ជីវឧស្ម័ន ១,៥០០ឡ ជា​គម្រោង​មួយ​ក្នុងចំណោម​គម្រោង​ទាំង​១៦ ដែល​បាន​រៀបចំឡើង​ដោយ​ក្រសួង នៅក្នុង​ផែនការ​យុទ្ធសាស្ត្រ​ភាពជា​ដៃគូ​យុទ្ធសាស្ត្រ​គ្រប់​ជ្រុង ជ្រោយ​រវាង​រដ្ឋាភិ​បា​ល​ទាំងពីរ​សម្រាប់​ការអភិវឌ្ឍ​វិស័យ​កសិកម្ម​ឆ្នាំ ២០១៣- ២០១៧ កន្លងទៅនេះ។

រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ ​បន្ថែមទៀតថា ឡ​ជីវឧស្ម័ន​បានផ្តល់​អត្ថប្រយោជន៍​យ៉ាងច្រើន​ដល់​ប្រជាកសិករ​ជាអាទិ៍ សំណល់​ឡ​ជា​ជីធម្មជាតិ​មាន​គុ​ណ​​ភាពល្អ​សម្រាប់​ដំណាំ​គ្រប់​ប្រភេទ ធ្វើ​ឲ្យ​ភូមិឋាន​មាន​បរិស្ថាន និង​អនាម័យ​ល្អ ផ្ទះបាយ​គ្មាន​ផ្សែង កាត់បន្ថយ​ការ​ប្រើ​ប្រាស់​អុស និង​ធ្យូង ដោយ​ប្រើ​ឧស្ម័ន​ដែល​ទាញយក​ពី​ឡ​ជំនួស ផ្តល់​ឧស្ម័ន​បង្កើតបានជា​អគ្គីសនី​ប្រើប្រាស់​ក្នុង​លំនៅ​ឋា​ន​បាន​យ៉ាង​ល្អ និង​ជួយ​សន្សំ​ប្រាក់​ក្នុង​គ្រួសារ​កសិករ​បាន​យ៉ាង​មាន​ប្រសិទ្ធភាព។

ហេតុផល​ទាំងអស់​នេះហើយ លោក​រដ្ឋមន្ត្រី​បានស្នើ​ដល់​អង្គភាព​ជំនាញ​ក៏ដូចជា​មន្ត្រី​អនុវត្ត​គម្រោង​ត្រូវ​យកចិ​ត្តទុ​ក​ដា​ក់​​សហ​ការល្អ​ជាមួយ​ភាគី​ចិន និង​គ្រប់​តួអង្គ​ពាក់ព័ន្ធ​ទាំងអស់ ដើម្បី​អនុវត្ត​គម្រោង​នេះ ដោយ​រលូន​ប្រកបដោយ​មន​សិ​ការ​​វិជ្ជា​ជីវៈ តម្លាភាព ចំ​ទិសដៅ ឆ្ពោះទៅរក​ភាពជោគជ័យ​តាម​ផែន​ការដែល​បានគ្រោង​ទុក​ដូច​មានចែង​ក្នុង​កិច្ច​ព្រម​ព្រៀង​​រវាង​រាជរដ្ឋាភិបាល​កម្ពុជា ជាមួយ​សាធារណរដ្ឋ​ប្រជាមានិត​ចិន និង​ភារកិច្ចផ្សេងៗទៀត​ក្នុង​ស្មារតី​ស្ថាបនា នវា​នុវ​ត្តន៍ និង​ទទួលខុសត្រូវ​ខ្ពស់។

ក្រៅពី​គម្រោង​ឡ​ជីវឧស្ម័ន លោក​រដ្ឋមន្ត្រី​បាន​រំលឹក​អំពី​សមិទ្ធផលសំខាន់ៗដែល​ក្រសួង​សម្រេចបាន​ក្រោម​កិច្ច​ព្រម​ព្រៀ​ង​​រវា​ង​ភាគី​ទាំងពីរ​ទៅតាម​អនុវិស័យនីមួយៗមាន​ជាអាទិ៍ ផ្នែក​ជំនាញ​កសិកម្ម ផ្នែកអនាម័យ និង​ភូតគាម​អនាម័យ (SPS) ជាមួយ AQSIQ ផ្នែក​ផលិតកម្ម​បសុព្យាបាល ផ្នែក​ព្រៃឈើ ការធ្វើ​ទំនើបភាវូបនីយកម្ម​នៃ​កសិឧស្សាហកម្ម ការ​ស្រា​វជ្រាវ ការអភិវឌ្ឍ​ឧស្សាហូបនីយកម្ម ជលផល ការអភិវឌ្ឍ​ធនធានមនុស្ស ទស្សនកិច្ច​សិក្សា ការផ្តល់​សម្ភារ​ឧប​ករ​ណ៍​ផ្សេងៗ ការសាងសង់​មន្ទីរពិសោធន៍​នៅ​សាលា​ជាតិ​កសិកម្ម​ព្រែកលៀប​ជាដើម។

ដោយឡែក ចំពោះ​ការងារ​សុខភាព​សត្វ និង​ផលិតកម្ម​សត្វ សាធារណរដ្ឋ​ប្រជាមានិត​ចិន​បាន​ជួយ​លើ​ការសាងសង់​ឡ​ជីវឧស្ម័ន៣លើក​រួចមកហើយ​ដែល​បាន​ចាប់ ផ្តើម​តាំងពី​ឆ្នាំ២០០៤ កន្លងមក​ម្ល៉េះ ព្រមទាំង​បាន​បង្កើត​ស្ថានីយ​ចិញ្ចឹម​ជ្រូក​បង្ហាញ​កម្ពុជា-ចិន និង​ជួយ​បណ្តុះបណ្តាល​ធនធានមនុស្ស​ដល់​អនុវិស័យ​សុខភាព​សត្វ និង​ផលិតកម្ម​សត្វ តាម​រយៈ​​កិច្ចប្រជុំ សិក្ខាសាលា វគ្គ​បណ្តុះបណ្តាលផ្សេងៗ ដែលជា​ធាតុ​ចូល​ដ៏​សំខាន់​ក្នុង​ការរួម ចំណែក​អភិវឌ្ឍន៍​វិស័យ​ក​សិ​កម្ម​​នៅ​កម្ពុជា​ឆ្លើយតប​ទៅនឹង​យុទ្ធសាស្ត្រ​ចតុកោណ​ដំណាក់កាល​ទី៤ របស់​រាជរដ្ឋាភិបាល និង​គោលនយោបាយ​អភិ​វឌ្ឍ​​វិស័យ​កសិកម្ម ២០១៩-២០២៣ នេះ៕