ក្រសួង​ហាម​ពលរដ្ឋ​កុំឲ្យ​ទិញ​ដី​ឡូ​ត៍ក្នុង​តំបន់​អភិវឌ្ឍន៍ ឡុង ទ្រី

បាត់ដំបង៖ ក្រសួងបរិស្ថាន នៅ​ថ្ងៃទី ១៧កញ្ញា​នេះ ហាម​មិន​ឲ្យ​ពលរដ្ឋ និង​អតិថិជន​ទិញ-លក់​ដី​ឡូ​តិ៍​តំបន់​អភិវឌ្ឍន៍ ឡុង ទ្រី ដែលមាន​ទំហំ​ផ្ទៃដី ៤៩.៦០០ ម៉ែត្រការ៉េ ដែលមាន​ទីតាំងនៅ​ភូមិ​ភ្នំ​ដំបង ឃុំ​សន្តិភាព ស្រុក​សំឡូត ខេត្ត​បាត់​ដំបង ព្រោះ​វា​តំបន់​ស្ថិតនៅក្នុង​តំបន់ការពារធម្មជាតិ (តំបន់​ប្រើប្រាស់​ច្រើនយ៉ាង​សំឡូត) ដែល​បាន​កំណត់ដោយ​ព្រះ​រា​ជក្រឹត្យ។

តាម​សេចក្ដីប្រកាស​ព័ត៌មាន​របស់​ក្រសួងបរិស្ថាន​ចុះ​ថ្ងៃទី ១៧កញ្ញា​នេះ​បាន​ឲ្យ​ដឹងថា កន្លងមកថ្មីៗនេះ​មានការ​ប្រកាស​ផ្សព្វផ្សាយ​ការរៀបចំ​ដី​ឡូ​តិ៍​តំបន់​អភិវឌ្ឍន៍ ឡុង ទ្រី ដែលមាន​ទំហំ​ផ្ទៃដី ៤៩.៦០០ ម៉ែត្រការ៉េ ស្ថិតនៅ​ទីតាំង​ភូមិ​ភ្នំ​ដំបង ឃុំ​សន្តិភាព ស្រុក​សំឡូត ខេត្តបាត់ដំបង ដែលជា​តំបន់​ស្ថិតនៅក្នុង​តំបន់ការពារធម្មជាតិ (តំបន់​ប្រើប្រាស់​ច្រើនយ៉ាង​សំឡូត) ដែល​បាន​កំណត់ដោយ​ព្រះរាជក្រឹត្យ ចុះ​ថ្ងៃទី០១ ខែវិច្ឆិកា ឆ្នាំ១៩៩។

យោងតាម​ច្បាប់​ស្តីពី​តំបន់ការពារធម្មជាតិ ដី​តំបន់ការពារធម្មជាតិ គឺជា​ដី​សាធារណៈ​របស់​រដ្ឋ ដែល​មិន​អនុញ្ញាត​ឲ្យ​មាន​ការកាប់​ទន្ទ្រាន​កាន់កាប់ លក់ដូរ​បានឡើយ និង​មិនអាច​ស្ថិតនៅក្រោម​ការកាន់កាប់​ដោយ​លទ្ធកម្ម​ពិសេស​នៃ​ភោគៈ​ឡើយ​។ ការចាត់ចែង​លក់ដូរ​ដី​សាធារណៈ​របស់​រដ្ឋ​នៃ​តំបន់ការពារធម្មជាតិ គឺជា​បទល្មើស​ព្រហ្មទណ្ឌ ដោយ​អ្នកប្រព្រឹត្ត និង​​អ្នក​ជាប់​ពាក់ព័ន្ធ​ត្រូវ​ជាប់ពន្ធនាគារ និង​ត្រូវបាន​ចាត់​ចូល​ជា​ឧក្រិដ្ឋកម្ម ដូច​មានចែង​ក្នុង​ច្បាប់​ស្តីពី​ការប្រឆាំង​សម្អាត​ប្រាក់ និង​ហិរញ្ញប្បទាន​ភេរវកម្ម។

ក្រសួងបរិស្ថាន​បាន​ណែនាំ​ថា ដើម្បី​ជៀសវាង​ហា​នី​ភ័យ​ជាយថាហេតុ​ដែល​បង្គ​ឡើង​ដោយ​ជនខិលខូច មុននឹង​ធ្វើការ​សម្រេច​ចិត្ត​ទិញ​ដី​ខាងលើនេះ សូម​សាធារណៈជន យល់ដឹង​ពី​ព័ត៌មានសំខាន់ៗមួយចំនួន​ដូចខាងក្រោម៖ ស្គាល់​ឈ្មោះ​​ម្ចាស់​អចលនទ្រព្យ​ក្នុង​វិ​ញ្ញាប​ន​ប័ត្រ​សម្គាល់​ម្ចាស់​អចល​ទ្រព្យ (តើ​ជា​របស់​អ្នក​អភិវឌ្ឍ​គម្រោង​ពុះ​ដី​ឡូ​តិ៍លក់ ឬ​ជា​របស់​អ្នករ​ផ្សេង)។
លិខិត​បន្តថា វិ​ញ្ញាប​ន​ប័ត្រ​សម្រាប់​ម្ចាស់​អចលនទ្រព្យ (ជាប់​បន្ទុក ឬ​អត់) លិខិតអនុញ្ញាត​អភិវឌ្ឍ​ដី​ដែល​ចេញ​ដោយ​អាជ្ញាធរ អង្គ​កាព​មាន​សមត្ថកិច្ច (ដូច​មានចែង​ក្នុង​ប្រកា​សលេខ០៨៧ ដ.ន.ស ប្រក/ឱក ចុះ​ថ្ងៃទី១១ ខែឧសភា ឆ្នាំ​២០១៨ ស្តីពី​ការអភិវឌ្ឍ​ដី​របស់​ក្រសួង​រៀបចំ​ដែនដី នគរូបនីយកម្ម និង​សំណង់) ឯកសារ​បង់ពន្ធ​អចលនវត្ថុ បំបែក​ក្បាល និង​ខ្លឹមសារ​លម្អិត​នៃ​កិច្ចសន្យាលក់-ទិញ។


ក្នុងន័យនេះ ក្រសួងបរិស្ថាន និង​រដ្ឋបាល​សាលាខេត្ត​បាត់ដំបង កំពុង​រៀបចំ​ចាត់វិធានការ ចំពោះ​ជន​ដែល​រៀបចំ​ឲ្យ​មាន​តំបន់​អភិវឌ្ឍ ឡុង ក្នុង​ទំហំ​ផ្ទៃដី​សរុប ៨៩.៦០០ម៉ែត្រការ៉េ តាម​បញ្ញត្តិ​ច្បាប់​នៃ​ព្រះរាជាណាចក្រ​កម្ពុជា​ជា​ធរមាន និង​សូម​​អំពាវនាវ​ដល់​សាធារណៈជន​កុំ​ចូលរួម​ទិញ ឬ​ទទួលយក​ចំណែក​ដីឡូត៍​ខាងលើនេះ​ជាដាច់ខាត។


ទាក់ទង​ការប្រមាន​នេះ The Plus News មិនទាន់​អាច​ស្វែងរក​ប្រភព​ម្ចាស់​គម្រោង​ដី​ឡូ​តិ៍​តំបន់​អភិវឌ្ឍន៍ ឡុង ទ្រី នៅ​ក្នុង​ស្រុក​សំឡូត​នោះ ដើម្បី​សុំ​ការបញ្ជាក់​ជុំវិញ​ការលើកឡើង​របស់​ក្រសួងបរិស្ថាន​នេះ​បានទេ៕