តំបន់ប្រាសាទអង្គរវត្តគ្រោងបំពាក់ភ្លើងបំភ្លឺ ដើម្បីឲ្យភ្ញៀវទេសចរចូលទៅទស្សនានៅពេលរាត្រី

ខេត្តសៀមរាប៖ ក្រសួងទេសចរណ៍​គ្រោង​នឹង​បំពាក់​ភ្លើង​បំភ្លឺ​នៅតាម​ប្រាសាទអង្គរវត្ត និង​ប្រាសាទ​មួយចំនួនទៀត ដើម្បី​ឲ្យ​ភ្ញៀវទេសចរ​ចូលទៅ​ទស្សនា​នៅពេល​រាត្រី ដោយ​គម្រោង​នេះ ត្រូវបាន​ដាក់ឈ្មោះថា Angkor Night ដែល​ស្នើឡើង​តាមរយៈ​គណៈកម្មការ​អន្តរក្រសួង។

ការ​ង្ហា​ញ​គម្រោង​នេះ ក្នុង​កិច្ចប្រជុំ​គណៈកម្មការ​អន្តរក្រសួង​នៅ​ខេត្តសៀមរាប​កាលពី​សប្ដាហ៍​នេះ ដើម្បី​ស្រោចស្រង់​កំណើន​ភ្ញៀវទេសចរ​បរទេស​មក​កាន់​ដែនដី​វប្បធម៌-ប្រវត្តិសាស្ត្រ​របស់​ប្រទេស​កម្ពុជា​ឡើងវិញ ក្រោយពី​គេ​រកឃើញថា មានការ​ធ្លាក់ចុះ​ក្នុង​រយៈពេល៨ខែ ជាប់ៗគ្នា​ក្នុង​ឆ្នាំ២០១៩នេះ។

កិច្ចប្រជុំ​នេះ មានការ​ចូលរួម​ពី​រដ្ឋមន្ត្រី​ក្រសួងទេសចរណ៍ លោក ថោង ខុន រដ្ឋមន្ត្រី​ក្រសួងបរិស្ថាន​លោក សាយ សំ​អាល់ និង​ក្រសួង​ស្ថាប័ន​ពាក់ព័ន្ធ​ជាច្រើន​ផ្សេងទៀត ដើម្បី​រិះរក​ដំណោះស្រាយ​បញ្ហា​ចំពោះមុខ និង​រៀបចំ​ផែនការមេ​អភិវឌ្ឍន៍​រយៈពេល​វែង​លើ​គោលដៅ​ទេសចរណ៍​សៀមរាប-អង្គរ។

លោក អាំង សុវណ្ណ​រ័ត្ន អ្នកនាំពាក្យ​ក្រសួងទេសចរណ៍​បាន​ឲ្យ​ដឹងថា Angkor Night គឺ​ក្នុង​គំនិត​ផ្តួចផ្តើម​មួយ​ក្នុងចំណោម​គំនិត​ផ្តួចផ្តើម​ជាង២០ សម្រាប់​ដាក់បញ្ចូល​ក្នុង​ផែនការ​ចំពោះមុខ​រយៈពេល​ខ្លី ដើម្បី​ដោះស្រាយ​បន្ទាន់​នូវ​បញ្ហា​ថមថយ​នៃ​ចំនួន​ភ្ញៀវ​មកលេង​ខេត្តសៀមរាប និង​ទាក់ទាញ​សកម្មភាព​ទេសចរណ៍​ពេល​រាត្រី​នៅ​តំបន់​ប្រាសាទ។

លោក​បន្តថា៖«យើង​ស្នើ​ឲ្យ​មានការ​សិក្សា​គិតគូ​គ្នា​មើលទៅ​ថា អាច​គិតគូ​ម៉េច ដើម្បី​ឲ្យ​មាន​ជា​សកម្មភាព​សម្រាប់​ឲ្យ​ភ្ញៀវ​នៅពេល​យប់​ដែរ នៅក្នុង​តំបន់​ប្រាសាទ​មួយចំនួន ប៉ុន្តែ​ចាំបាច់​យើង​ត្រូវ​គិតគូ​ទៅលើ​សុវត្ថិភាព​ដែរ ទាំង​សុវត្ថិភាព​ភ្ញៀវ​ទាំង​សុវត្ថិភាព​ប្រាសាទ​ផ្ទាល់»

លោក សុវណ្ណ​រ័ត្ន បញ្ជាក់ថា សម្រាប់​ផែនការ​ដំណោះស្រាយ​ចំពោះមុខ ខាង​គណៈកម្មការ​អន្តរក្រសួង​នឹងដាក់​ចេញ​ឲ្យ​បាន​នៅ​បំណាច់​ឆ្នាំ ២០១៩ ឬ​ដើមឆ្នាំ ២០២០ ចំណែក​ផែនការមេ​រយៈពេល​វែង ដើម្បី​ជំរុញ​កំណើន​ភ្ញៀវទេសចរ​អន្តរជាតិ​មកលេង​ខេត្តសៀមរាប-អង្គរ គឺ​គ្រោង​នឹង​សម្រេច​ឲ្យ​បាន​នៅមុខ​ឆ្នាំ ២០៣៥។

លោកស្រី ឆាយ ស៊ីវ​លីន ប្រធាន​សមាគមន៍​ទេសចរណ៍​កម្ពុជា​បាន​សាទរ​ចំពោះ​គំនិត​ផ្តួចផ្តើម​របស់​គណៈកម្មកា​រ​អន្តរក្រសួង ដោយ​លោកស្រី​យល់ឃើញថា ភ្ញៀវ​ទេសចរណ៍​ចេញ​ដើរ​ក្រៅប្រទេស​តែង​ចង់​ដើរ​កម្សាន្ត​ទាំង​ពេល​ថ្ងៃ​និង​ពេលយប់ ហើយ​ខេត្តសៀមរាប​កំពុង​ខ្វះ​គោលដៅ​ទេសចរណ៍​ពេល​រាត្រី។

លោកស្រី​បន្ថែមថា ក្រសួងទេសចរណ៍​គួររៀបចំ​ឲ្យ​មាន​កន្លែង​ដែល​ភ្ញៀវ​អាច​ដើរ​កម្សាន្ត​ដោយ​ខ្លួនឯង ដោយ​មិន​ព្រួយបារម្ភ​ពី​សុ​វត្ថ​ភាព ចរាចរ និង​ធ្វើយ៉ាងណា​ជំរុញ​ឲ្យ​មានការ​បង្កើន​គុណភាព​ផលិតផល​វត្ថុ​អនុស្សាវរីយ៍​សម្រាប់​ភ្ញៀវទេសចរ។

តាម​របាយការណ៍​រប​ស់​គ្រឹះស្ថាន​អង្គរ​ដែល​គ្រប់គ្រង​លើ​ការលក់​សំបុត្រ​ចូល​ទស្សនា​តំបន់​អង្គរ​បាន​បង្ហាញថា ភ្ញៀវទេសចរ​បរទេស​ចូល​ទស្សនា​តំបន់​អង្គរ នៅ​ចន្លោះ​ខែមករា​ដល់​ខែសីហា​មាន​ចំនួន ១លាន ៥៥ម៉ឺន​នាក់ បាន​ធ្លាក់ចុះ​ប្រហែល ១១ភាគរយ បើ​ធៀប​រយៈពេល​ដដែល នៅ​ឆ្នាំ២០១៨ហើយ​ចំណូល​ពី​ការលក់​សំបុត្រ ធ្លាក់ចុះ​អស់​ជិត ១២ភាគរយ​ធៀប​នឹង​រយៈពេល​ដូចគ្នា​កាលពី​ឆ្នាំមុន៕