លំនៅឋាន និងភូមិគ្រឹះ ក្លាយជាគម្រោងរីកដុះដាលខ្លាំងជាងគេនៅកម្ពុជា

ភ្នំពេញ៖ គិតត្រឹមខែសីហា ឆ្នាំ ២០១៩ នេះ ​គម្រោង​សាងសង់​លំនៅឋាន និង​ភូមិគ្រឹះ បាន​ក្លាយ​ជា​គម្រោង​ដែល​មាន​ភាពលេចធ្លោជាងគេនៅកម្ពុជា។ នេះបើតាមការបញ្ជាក់ឲ្យដឹងពីលោក លាង មុនី​រិ​ទ្ធ រដ្ឋលេខាធិការ​ក្រសួង​នគរូបនីយកម្ម រៀបចំ​ដែនដី និង​សំណង់ បានថ្លែងប្រាប់កាលពីក្នុងកម្មវិធីពិព័រណ៍វិស័យ​អគារ សំណង់ និង​ឧស្សាហកម្ម​ផ្នែក​មេខ​និ​ច និង​អេ​ឡិច​ត្រូ​និ​ច​ខ្នាត​អន្តរជាតិ​  នៅ​ថ្ងៃទី១៨ ខែកញ្ញា ឆ្នាំ២០១៩ កន្លងទៅនេះ។

រដ្ឋលេខាធិការ​ក្រសួង​នគរូបនីយកម្ម រៀបចំ​ដែនដី និង​សំណង់ ថ្លែងថា នៅ​ក្របខណ្ឌ​យុទ្ធសាស្ត្រ​អភិវឌ្ឍន៍ ក្នុង​តំបន់​រាជធានី ក្រុង និង​ទីប្រជុំជន ក្នុងនោះ​គម្រោង​សាងសង់​លំនៅឋាន និង​ភូមិគ្រឹះ រួមជាមួយ​សំណង់​លើ​វិស័យ​ឧស្សាហកម្ម និង​ពាណិជ្ជកម្ម កំពុង​សាងសង់​លេចធ្លោ​ជាងគេ លើ​គម្រោងផ្សេងៗ។

លោកបន្តថា ​ជុំវិញ​ការអភិវឌ្ឍវិស័យ​សំណង់​នេះ មានសំណើរ​សុំ​សាងសង់ផ្សេងៗពីគ្នា​ដោយ គម្រោង ការ​សាង​សង់​​លំនៅឋាន និង​ភូមិគ្រឹះ​មាន​ជាង ២ ពាន់​គម្រោង, សំណង់​ឧស្សាហកម្ម ១៣៨ គម្រោង, សំណង់​ពាណិជ្ជកម្ម ១៧៦ គម្រោង, សំណង់​ទេសចរ ៨២ គម្រោង និង​សំណង់ផ្សេងៗទៀត​មាន​ចំនួន ១៨​គម្រោង​ផងដែរ រួមជាមួយ​សំ​ណង់​សាធារណៈ​មាន​ប្រមាណ ៥៦ គម្រោង, ការប្រើប្រាស់​ថវិកា​រាជរដ្ឋាភិបាល​មាន ១៨ គម្រោង, ថវិកា​វិស័យ​ឯកជន ៣៦ បច្ចុប្បន្ន។

ក្នុងនោះ បើគិត​មកដល់​ត្រឹម ខែសីហា ឆ្នាំ២០១៩ នេះ ក្រសួង​រៀបចំ​ដែនដី​នគរូបនីយកម្ម និង​សំណង់ បាន​អនុញ្ញាត​​លើ​សំណើរ​សុំ​សាងសង់ សរុប​ទូទាំងប្រទេស មាន​ចំនួន​ប្រមាណ ៣១៧៥ គម្រោង ក្នុងនោះ​មានតម្លៃ​នៃ​ទំហំ​វិនិយោគ​នៅលើ​វិស័យនេះ​សរុប ៥៩៨៦ លាន​ដុល្លារ​អាមេរិក ដោយ​វិនិយោគ​នៅលើ​ផ្ទៃក្រឡា​ប្រមាណ​ជាង ១២,២ លាន​ម៉ែត្រការ៉េ៕