លោក ស៊ុន ចាន់ថុល ជំរុញ​ឲ្យ​ក្រុមហ៊ុន​ផ្លូវដែក​ឥណ្ឌូនេស៊ី​មក​វិនិយោគ​ផ្នែក​សេវា​ផ្លូវដែក​នៅ​កម្ពុជា

ភ្នំពេញ: លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណៈការ និង​ដឹកជញ្ជូន បាន​ជំរុញ​ឲ្យ​ក្រុមហ៊ុន​ឧស្សា​ហ​កម្ម INKA (Indonesian Railway Industry) ដែលជា​ក្រុមហ៊ុន​ឧស្សាហកម្ម​ផ្លូវដែក​រដ្ឋ​ដ៏​ធំ​របស់​សាធារណរដ្ឋ​ឥ​ណ្ឌ​​នេ​ស៊ី មក​វិនិយោគ​បម្រើសេវា​កម្ម​ផ្នែក​ផ្លូវដែក​នៅ​កម្ពុជា ដោយ​ភាគី​ក្រុមហ៊ុន​កំពុង​សិក្សា​ពី​លទ្ធភាព។

ការបង្ហាញ​នេះ ក្នុងជំនួប​ពិភាក្សា​ការងារ​របស់លោក​ទេសរដ្ឋមន្ត្រី ស៊ុន ចាន់ថុល ជាមួយ​ក្រុមហ៊ុន​រដ្ឋធំៗ របស់​ឥណ្ឌូ​នេ​ស៊ី ដើម្បី​ពិនិត្យ​លទ្ធភាព​ពង្រីក​កិច្ចសហប្រតិបត្តិការ​លើ​វិស័យ​ហេដ្ឋារចនាសម្ព័ន្ធ​ដឹកជញ្ជូន។ ក្នុង​ដំណើរ​ទស្សន​កិច្ច​ការ​ងា​រ​​រយៈពេល ៤ថ្ងៃ​នៅ​សាធារណរដ្ឋ​ឥណ្ឌូនេស៊ី។

លោក ស៊ុន ចាន់ថុល បាន​ថ្លែងថា លោក​បានស្នើ​ឲ្យ​ក្រុមហ៊ុន​ឧស្សាហកម្ម​ផ្លូវដែក​ឥណ្ឌូនេស៊ី មកជួប​ពិភាក្សា​ជាមួយ​ស្ថា​ប័ន និង​ក្រុមហ៊ុន​ពាក់ព័ន្ធ ដើម្បី​ធ្វើការ​សិក្សា​លទ្ធភាព​វិនិយោគ​នៅ​កម្ពុជា។ លើសពីនេះ លោក​បាន​ចាប់អារម្មណ៍​ចំពោះ​ទំនើបកម្ម និង​សេវាកម្ម​ដ៏​ល្អ​របស់​កំពង់ផែ PAL Indonesia និង​ស្នើ​ឲ្យ​ភាគី​ឥណ្ឌូនេស៊ី​ពិភាក្សា​ជាមួយ​កំពង់ផែ​កម្ពុជា ដើម្បី​បង្កើត​កិច្ចសហប្រតិបត្តិការ​លើ​វិស័យ​កំពង់ផែ​រវាង​ភាគី​ទាំងពីរ។

លោក​បន្តថា ការអភិវឌ្ឍ​វិស័យ​ហេ​ដ្ឋ​រចនាសម្ព័ន្ធ​ដឹកជញ្ជូន គឺជា​វិស័យ​អាទិភាព​មួយ​នៅក្នុង​វិស័យ​អាទិភាពចម្បងៗ រប​ស់​​រាជរដ្ឋាភិបាល​កម្ពុជា និង​បានស្នើ​ភាគី​ឥណ្ឌូនេស៊ី ក៏ដូចជា​ក្រុមហ៊ុន​ដែលមាន​ទីតាំង​នៅក្នុង​ទីក្រុង​នេះ ពិនិត្យ​ល​ទ្ធ​ភា​ព​​ធ្វើ​កិច្ច​ហ​ប្រតិបត្តិការ និង​វិនិយោគ​នៅ​កម្ពុជា។

តប​តាម​អនុសាសន៍​នេះ តំណាង​ប្រធាន​ក្រុមហ៊ុន​ឧស្សាហកម្ម INKA (Indonesian Railway Industry) បាន​ថ្លែង​ថា លោក​នឹង​បញ្ជូន​គណៈប្រតិភូ​មក​ពិនិត្យ​លទ្ធភាព​ពង្រីក​កិច្ច​ហ​ប្រតិបត្តិការ​លើ​វិស័យ​ផ្លូវដែក​នៅ​កម្ពុជា​នាពេល​ដ៏​ខ្លី​ខា​ង​មុខនេះ ដើម្បី​ស្វែងយល់​ពី​ការវិនិយោគ និង​ដកស្រង់​បទពិសោធន៍​នានា​ថែមទៀត។

គួររំឭកថា ក្នុង​ឆ្នាំ២០១៨ ពាណិជ្ជកម្ម​ទំនិញ​សរុប​រវាង​ប្រទេស​ទាំងពីរ​មានតែ ៥៥៨ លាន​ដុល្លារ​អាមេរិក មានការ​កើន​ឡើង​​ចំនួន ៣ភាគរយ ក្នុងនោះ​ការនាំចេញ​របស់​កម្ពុជា​ទៅ​ឥណ្ឌូនេស៊ី​មានតែ ៣៣ លាន​ដុល្លារ​អាមេរិក និង​នាំចូល​ពី​ឥណ្ឌូនេស៊ី​ចំនួន ៥២៥ លាន​ដុល្លារ​អាមេរិក៕