សៀមរាប៖ ភ្ញៀវជាតិកើន ខណៈភ្ញៀវទេសចរអន្តរជាតិធ្លាក់ចុះ អំឡុងពេល ៣ ថ្ងៃបុណ្យភ្ជុំបិណ្ឌ

សៀមរាប៖ ក្នុង​រយៈពេល​ ៣ ​ថ្ងៃ នៃ​ពិធី​បុ​ណ្ឌ​ភ្ជុំបិណ្ឌ នៅ​ឆ្នាំ ២០១៩ ខេត្តសៀមរាប​ទទួលបាន​ភ្ញៀវទេសចរ​ចំនួន ២៤៤,០៧៥ នាក់ កើនឡើង ៥.០១% ក្នុងនោះ​ភ្ញៀវទេសចរ​ជាតិ​មានការ​កើនឡើង ប៉ុន្តែ​ភ្ញៀវទេសចរ​អន្តរជាតិ​បែរជា​ធ្លាក់ចុះ​ប្រមាណ ៣៧.២៣% បើ​ធៀប​នឹង​រយៈពេល​បី​ថ្ងៃ​ដូចគ្នា​នៃ​ពិធីបុណ្យ​ភ្ជុំបិណ្ឌ នៅ​ឆ្នាំ២០១៨។

ប្រធាន​មន្ទីរ​ទេសចរណ៍​ខេត្តសៀមរាប លោក ង៉ូ​វ សេង​កាក់ បានបញ្ជាក់ នា​ព្រឹក​ថ្ងៃទី៣០ ខែកញ្ញា​នេះ​ឱ្យដឹងថា «ភ្ញៀវទេសចរ​ដែល​មក​ទស្សនា​ខេត្តសៀមរាប នាឱកាស​ពិធីបុណ្យ​ភ្ជុំបិណ្ឌ រយៈពេល​បី​ថ្ងៃ ចាប់ពី​ថ្ងៃទី២៧-២៩ ខែកញ្ញា មាន​ចំនួន​សរុប ២៤៤,០៧៥នាក់ កើនឡើង ៥.០១% បើ​ប្រៀបធៀប​រយៈពេល​ដូចគ្នា​នៅ​ឆ្នាំ២០១៨ ដែលមាន​ចំនួន ២៣២,៤២២នាក់»។

លោក ង៉ូ​វ សេង​កាក់ បាន​បន្តថា ក្នុងនោះ​ភ្ញៀវទេសចរ​អន្តរជាតិ​មាន​ចំនួន ១៤,០៧៥នាក់ ថយចុះ ៣៧.២៣% បើ​ប្រៀបធៀប​រយៈពេល​ដូចគ្នា​ឆ្នាំ២០១៨ ដែលមាន​ចំនួន ២២,៤២២នាក់។ ចំណែក​ភ្ញៀវទេសចរ​ជាតិ​មាន​ជាង ២៣ម៉ឺន​នាក់ កើនឡើង ៩.៥២% បើ​ប្រៀបធៀប​រយៈពេល​ដូចគ្នា​ឆ្នាំ២០១៨ ដែលមាន​ប្រមាណ ២១ម៉ឺន​នាក់៕