ជប៉ុនផ្ដល់ជំនួយឥតសំណងជាង ២៦ លានដុល្លារ សម្រាប់គម្រោង អភិវឌ្ឍន៍ប្រព័ន្ធបង្ហូរទឹកកខ្វក់ ក្នុងរាជធានីភ្នំពេញ

(ភ្នំពេញ)៖ បន្ទាប់ពីបានធ្វើផ្ដល់ជំនួយដល់កម្ពុជា ច្រើនរាប់មិនអស់ នៅថ្ងៃស្អែកនេះ រដ្ឋាភិបាលជប៉ុន តាម​រយៈ​ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា នឹងធ្វើការចុះហត្ថលេខាលើលិខិតប្តូរសារស្តី​ពី​ការ​ផ្តល់​ហិរញ្ញប្បទាន​ឥតសំណង សម្រាប់អនុវត្តគម្រោង «អភិវឌ្ឍន៍ប្រព័ន្ធបង្ហូរ​ទឹកក​ខ្វក់ក្នុងរាជធានីភ្នំពេញ»។

បើតាមសេចក្ដីប្រកាសរបស់ក្រសួងការបរទេស និងកិច្ចហប្រតិបត្តិការអន្តរជាតិ បញ្ជាក់ថា នៅព្រឹកថ្ងៃទី០៣​ ខែតុលា​ ឆ្នាំ២០១៩ ឯកអគ្គរាជទូតជប៉ុនប្រចាំកម្ពុជា នឹងធ្វើការចុះហត្ថលេខាលើលិខិតប្តូរសារស្តី​ពី​ការផ្តល់​ហិរញ្ញប្បទាន​ឥតសំណង ជាមួយឯក​ឧត្តម​ឧបនាយក​រដ្ឋមន្រ្តី ប្រាក់ សុខុន លើជំនួយមានទឹកប្រាក់ ២ ប៊ីលាន ៧៧៧ លានយ៉េន (ស្មើនឹង ២៦,៧៨៤,៤៤៥.០០ដុល្លារ) នៅវេលាម៉ោង ៩៖៣០ នាទីព្រឹក នៅទីស្តីការ​ក្រសួង​ការ​បរទេស និងសហប្រតិបត្តិការអន្តរជាតិ។

តាមរយៈហិរញ្ញប្បទានឥតសំណងនេះ ជប៉ុន​នឹង​សាងសង់​ស្ថានីយ៍​ប្រព្រឹត្តិកម្ម​ទឹកក​ខ្វក់មុននឹងបង្ហូរចូល ទៅក្នុងបឹងជើងឯងភាគខាងត្បូង រាជធានីភ្នំពេញ ដែល​នឹងរួមចំណែក​ដ៏សំខាន់​ដល់ការធ្វើឲ្យប្រសើរឡើង នូវបរិស្ថានរស់នៅក្នុងប្រទេសកម្ពុជា៕