លោក ថោង ខុន ស្នើរឲ្យអ្នកជំនាញជប៉ុនជួយសិក្សាបង្កើតទីក្រុងឆ្លាតវៃនៅក្រុងសៀមរាប

ភ្នំពេញ៖ រដ្ឋមន្ត្រី​ក្រសួងទេសចរណ៍​លោក ថោង ខុន នៅ​ថ្ងៃទី ១០តុលា​នេះ​បានស្នើរ​ឲ្យ​លោក MIKAMI Masahiro ឯកអគ្គរាជទូត​ជប៉ុន​ថ្មី​ប្រចាំ​កម្ពុជា​ជួយ​កៀរគរ​អ្នកបច្ចេកទេស និង​អ្នកជំនាញ​ជប៉ុន មក​សិក្សា វាយតម្លៃ​នៅ​ទីក្រុង​សៀម​រាប ដើម្បី​បង្កើតជា​ទីក្រុង​ឆ្នា​ត​វៃ (Smart City) នៅក្នុង​ប្រទេស​កម្ពុជា ខណៈ​ភាគី​ជប៉ុន​ឯកភាព​តាម​សំណើរ​នេះ។

ក្រោយ​បញ្ចប់​ជំនួប​ពិភាក្សា​នោះ លោក ជុក ជំនោរ ប្រធាន​នាយកដ្ឋាន​អភិវឌ្ឍន៍​ផលិតផល​ទេសចរណ៍​បាន​ឲ្យ​ដឹងថា លោ​ក​រដ្ឋមន្ត្រី ថោង ខុន និង​ឯកអគ្គរាជទូត​ជប៉ុន បានកត់សម្គាល់​អំពី​ការអភិវឌ្ឍ និង​ការវិវត្តថ្មីៗលើ​វិស័យ​ទេសចរណ៍​រវាង​ប្រទេស​ទាំងពីរ។ ជាក់ស្តែង​កាលពី ឆ្នាំ២០១៨កន្លងមក ក្នុងចំណោម​ភ្ញៀវទេសចរ​អន្តរជាតិ ៦លាន២សែន​នាក់ មាន​ភ្ញៀវទេសចរ​ជប៉ុន​ជាង ២០ម៉ឺន​នាក់ រីឯ​នៅ៧ខែ ដើមឆ្នាំ២០១៩នេះ កម្ពុជា​ទទួលបាន​ភ្ញៀវទេសចរ​ជប៉ុន​សរុប ១៤​ម៉ឺន​នាក់ ហើយ​ភ្ញៀ​ទេសចរ​ជប៉ុន​នៅតែ​ជា​ភ្ញៀវទេសចរ​ដែលមាន​កំណើន​សម្រាប់​តំបន់​ខេត្តសៀមរាប។

លោក​រដ្ឋមន្ត្រី​បានស្នើ​ឲ្យ​ភាគី​ជប៉ុន​ជួយ​សិក្សា​រៀបចំ​ខេត្តសៀមរាប ជាពិសេស​ក្រុង​សៀមរាប និង​ក្រុង​បាត់ដំបង​ជាទី​ក្រុ​ង​​ឆ្លាត​វៃ (Smart City) ព្រោះ​ភាគី​ជប៉ុន​មាន​បច្ចេកវិទ្យា​ខ្ពស់ ក៏ដូចជា​បទពិសោធន៍​ក្នុងការ​រៀបចំ​កិច្ចការ​ទាំង​អស់​នេះ ព្រម​ជាមួយនឹង​ការជំរុញ​ឲ្យ​មានការ​វិនិយោគ​លើ​វិស័យ​ទេសចរណ៍​កាន់តែច្រើន។

លើសពីនេះ លោក ថោង ខុន បានស្នើ​ដល់​ឯកអគ្គរាជទូត​ជប៉ុន​ជួយ​ជំរុញ​ឲ្យ​មាន​ជើងហោះហើរ​ត្រង់​បន្ថែមទៀត ភ្ជាប់​ទីក្រុងសំខាន់ៗរវាង​ប្រទេស​ជប៉ុន និង​កម្ពុជា ដែល​កន្លងមកនេះ​ភាគី​ទាំងពីរ​មាន​ជើងហោះហើរ​ត្រង់​ពី​អាកា​ស​យាន​ដ្ឋា​ន​​ឡា​រីតា នៃ​ទីក្រុង​តូ​ក្យូ មកកាន់​រាជធានី​ភ្នំពេញ។ លោក​សំណូមពរ​ឲ្យ​ភ្ជាប់​ពី​ទីក្រុង​តូ​ក្យូ​មកកាន់​ខេត្តសៀមរាប ក៏ដូចជា​ពី​ទីក្រុងសំខាន់ៗរបស់​ជប៉ុន​មកកាន់​កម្ពុជា។

ជាការ​ឆ្លើយតប លោក​ឯកអគ្គរាជទូត​របស់​ជប៉ុន បាន​ទទួលយក​សំណូមពរ​របស់លោករ​ដ្ឋ​មន្ត្រី ក៏ដូចជា​ជំរុញ​ឲ្យ​អ្នកវិ​និ​យោគ ក៏ដូចជា​វិស័យ​ឯកជន​នានា​របស់​ជប៉ុន មក​វិនិយោគ​លើ​វិស័យ​ទេសចរណ៍​បន្ថែមទៀត ពិសេស​ជំរុញ​នូវ​លំហូរ​ភ្ញៀវ​ទេសចរ​ជប៉ុន​មកកាន់​កម្ពុជា។

លោក ថោង ខុន បាន​អរគុណ​ភាគី​ជប៉ុន ក្នុងនាម​ជា​សហប្រធាន ICC-អង្គរ ដែល​បាន​ជួយ​អភិរក្ស​តំបន់​ប្រាសាទ​អង្គរ ក៏ដូចជា​ខេត្តសៀមរាប និង​បាន​សំណូមពរ​ឲ្យ​ភាគី​ជប៉ុន​បន្ត​កិច្ចសហប្រតិបត្តិការ​នេះ រហូត​ទៅដល់​ប្រាសា​​ទសំ​បូរ​ព្រៃ​គុក​​ថែមទៀត ដើម្បី​ជួយ​ផ្សព្វផ្សាយ ក៏ដូចជា​ជួយ​អភិរក្ស​ប្រាសាទសំបូរព្រៃគុក​នេះ​ឲ្យ​កាន់​តែមាន​ភាពប្រសើរឡើង។ ព្រ​ម​​ជាមួយនឹង​ការស្នើសុំ​ឲ្យ​ភាគី​ជប៉ុន​ជួយ​ជំរុញ ការផ្សព្វផ្សាយ​បណ្តាញ​បេតិកភណ្ឌ ភ្ជាប់​តំបន់​អង្គរ​ទៅ​បឹងមាលា ប្រា​សា​ទ​​កោះ​កេរ និង​ព្រះវិហារ៕