គម្រោងបង្កើតសណ្ឋាគាររបស់កូនខ្មែរម្នាក់ត្រូវបានអន្តរក្រសួងយល់ព្រមឲ្យសាងសង់ជាផ្លូវការ

ខេត្ត​ព្រះសីហនុ៖ គម្រោង​សាងសង់​សណ្ឋាគារ និង​រី​ហ្សត ស៊ី​ប្រ៊ី​ស (Sea Breeze Hotel and Resort) លើ​លើ​ផ្ទៃដី​ទំហំ ៥.២២៤ម៉ែត្រការ៉េ ត្រូវបាន​អន្តរក្រសួង​អនុម័ត​យល់ព្រម​សាងសង់​តាម​ផែនការ​នៅ​សង្កាត់ លេខ៤ ក្រុងព្រះសីហនុ ខេត្ត​ព្រះសីហនុ​របស់លោក​ស្រី សោម រស្មី (ម្ចាស់​គម្រោង) ប៉ុន្ដែ​អន្តរក្រសួង​បាន​ណែនាំ​ចំណុច​មួយចំនួន។

ការបង្ហាញ​នេះ នៅ​ថ្ងៃទី១៦ ខែតុលា ដោយ​លោក នេត្រ ភក្ត្រា រដ្ឋលេខាធិការ​ក្រសួងបរិស្ថាន បាន​ដឹកនាំ​កិច្ចប្រជុំ​អន្តរក្រសួង​ស្តីពី​ការពិនិត្យ និង​ផ្តល់យោបល់​លើ​របាយការណ៍​វាយតម្លៃ​ហេតុ​ប៉ះពាល់​បរិស្ថាន និង​សង្គម​ដំបូង (IESIA) លើ​គម្រោង​សាងសង់​សណ្ឋាគារ និង​រី​ហ្សត​នេះ។

កិច្ចប្រជុំ​នេះ​មានការ​ចូលរួម​ពី​លោក លោកស្រី​តំណាង​អគ្គនាយកដ្ឋាន និង​អគ្គលេខាធិការដ្ឋាន​ពាក់ព័ន្ធ​នៃ​ក្រសួងបរិស្ថាន តំណាង​អន្តរក្រសួង​ពាក់ព័ន្ធ ក្រុមប្រឹក្សា​អភិវឌ្ឍន៍​កម្ពុជា រដ្ឋបាលខេត្ត​ព្រះសីហនុ និង​មន្ទីរ​បរិស្ថាន​ខេត្ត​ព្រះសីហនុ តំណាង​នាយកដ្ឋាន​វាយតម្លៃ​ហេតុ​ប៉ះពាល់​បរិស្ថាន តំណាង​ម្ចាស់​គម្រោង និង​ក្រុមហ៊ុន​ទីប្រឹក្សា អេស-ប៊ី-ខេ រី​ស៊ើ​ច អេ​ន ឌី​វេឡុ​ប​មេន។

លោក នេត្រ ភ​ត្រា បាន​ថ្លែងថា គម្រោង Sea Breeze Hotel and Resort លើ​លើ​ផ្ទៃដី​ទំហំ ៥.២២៤ម៉ែត្រការ៉េ ដែលមាន​ទីតាំង​ស្ថិតនៅ​ដី​ឡូ​តិ៍​ក្រុងព្រះសីហនុ ខេត្ត​ព្រះសីហនុ របស់លោក​ស្រី សោម រស្មី (ម្ចាស់​គម្រោង) ដែល​បាន​សិក្សា និង​រៀបចំ​របាយការណ៍​វាយតម្លៃ​ហេតុ​ប៉ះពាល់​បរិស្ថាន និង​សង្គម​ដំបូង ដោយ​ក្រុមហ៊ុន​ទីប្រឹក្សា អេស-ប៊ី-ខេ រី​ស៊ើ​ច អេ​ន ឌី​វេឡុ​ប​មេន។

អង្គប្រជុំ​បានទទួល​លទ្ធផល​ដូចជា៖ អង្គ​ប្រជុំបាន​គាំទ្រ​ទៅលើ​គម្រោង​វិនិយោគ​នេះ ដោយ​ម្ចាស់​គម្រោង​ត្រូវគោរព​ទៅតាម​បទដ្ឋាន​បរិស្ថាន​ក្នុងការ​រៀបចំ​អាង​ចម្រោះ​ទឹក​កខ្វក់ ដែលមាន​សមត្ថភាព គ្រប់គ្រាន់​ក្នុងការ​សម្អាត​សំណល់​រាវ​ចេញពី​គម្រោង ដោយ​សមាមាត្រ​ទៅនឹង​បរិមាណ​ប្រើប្រាស់​ទឹក​របស់​គម្រោង។

កិច្ចប្រជុំ​បន្តថា ម្ចាស់​គម្រោង​ត្រូវ​រៀបចំ​ទីតាំង​ទុកដាក់​សំណល់​រឹង (សំរាម) សំណល់​សំណង់ និង​សំណល់​អាចម៍ដី ឱ្យបាន​ត្រឹមត្រូវ ដោយ​សហការ​ជាមួយ​ក្រុមហ៊ុន​ប្រមូល​សំណល់​ក្នុង​ខេត្ត​ព្រះសីហនុ ចៀសវាង​ទុកដាក់ គ្មាន​សណ្តាប់ធ្នាប់​ធ្វើឱ្យប៉ះពាល់​ដល់​សោភ័ណភាព​ក្រុង ម្ចាស់​គម្រោង​ត្រូវ​ចូលរួម​ថែរក្សា​សម្អាត​អនាម័យ​បរិស្ថាន​នៅ​ជុំវិញ​ទីតាំង​គម្រោង។

ម្ចាស់​គម្រោង​ត្រូវ​រៀបចំ​ចំណត​ឱ្យបាន​គ្រប់គ្រាន់ ដោយ​គោរព​តាមច្បាប់​របស់​ក្រសួង​ដែនដី នគរូបនីយកម្ម និង​សំណង់ ចៀសវាង​ការចត​រថយន្ត​នៅលើ​ចិញ្ចើមផ្លូវ និង​ទីសាធារណៈ ម្ចាស់​គម្រោង​ត្រូវ​រៀបចំ​តំបន់​នេះ​ឲ្យ​ក្លាយទៅជា​តំបន់​មេត្រីភាព​បរិស្ថាន ដោយ​កាត់បន្ថយ​ការប្រើប្រាស់ ថង់​ប្លា​ស្ទិ​ក និង​ត្រូវ​ដាំ​ដើមឈើ ឬ​រុក្ខជាតិ​លម្អរ​ឱ្យបាន​ច្រើន ដើម្បី​លម្អ​សោភ័ណភាព​នៅក្នុង​តំបន់​គម្រោង។

ដោយ​ម្ចាស់​គម្រោង​ត្រូវគោរព​វប្បធម៌​ប្រពៃណី ទំនៀម​ទំលាប់ និង​រំលេច​រចនាបថ​ខ្មែរ​ទាំង​ក្នុង និង​ក្រៅ​អគារ ម្ចាស់​គម្រោង​គួរ​មាន​មូលនិធិ​ចូលរួមចំណែក​ដាំ​ដើមឈើ​នៅ​តំបន់​ក្បាលឆាយ ដើម្បី​ជួយ​រក្សា​លំនឹង​ទឹក​នៅ​ខេត្ត​ព្រះសីហនុ ម្ចាស់​គម្រោង​ត្រូវគោរព​ច្បាប់​ស្តីពី​ការងារ ដោយ​ត្រូវ​ចុះបញ្ជី ប.ស.ស សម្រាប់​បុគ្គលិក-កម្មករ​ដែល​បម្រើការ​ងារ​ក្នុង​គម្រោង ដើម្បី​ការពារ​សុខភាព និង​សុវត្ថិភាព​ការងារ និង​ម្ចាស់​គម្រោង​ត្រូវ​សហការ​ជាមួយ​ក្រុមហ៊ុន​ទីប្រឹក្សា​ធ្វើការ​កែសម្រួល និង​ដាក់​ធាតុ​ចូល​បន្ថែម​ទៅក្នុង​របាយការណ៍​នេះ ស្របតាម​ស្មារតី​អង្គប្រជុំ៕