កម្ពុជារំពឹងទទួលបានចំណូលពីប្រេងកាតប្រមាណ ១ពាន់លានដុល្លារនៅរយៈពេល១០ឆ្នាំដំបូង

ភ្នំពេញ៖ ប្រធាន​គណបក្ស​យុវជន​កម្ពុជា និង​ជា​សមាជិក​ឧ​ត្ត​ម​ក្រុមប្រឹក្សា​ពិគ្រោះ និង​ផ្ដល់យោបល់​លោក ពេជ្រ ស្រស់ នៅ​ថ្ងៃទី ២២ ខែតុលា​នេះ​បាន​អះអាងថា កម្ពុជា​រំពឹង​ទទួលបាន​ចំណូល​វិស័យ​ប្រេងកាត​នៅក្នុង​ប្លុក A ដែនសមុទ្រ​កម្ពុជា​ប្រមាណ ១ពាន់​លាន​ដុល្លារ​នៅ​រយៈពេល១០ឆ្នាំ​ដំបូង​នេះ។

ការលើកឡើង​នេះ ក្នុង​កិច្ចប្រជុំ​រវាង​ក្រុមប្រឹក្សា​ពិគ្រោះ និង​ផ្ដល់យោបល់​ជាមួយ​ក្រសួង​សេដ្ឋកិច្ច និង​ហិរញ្ញវត្ថុ​ស្ដីអំពី ច្បាប់​ថវិកា​សម្រាប់​ការគ្រប់គ្រង​ឆ្នាំ២០២០ខាងមុខនេះ។ ដោយ​លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ បាន​បញ្ជាក់ជូន​អង្គប្រជុំ​ថា នៅ​បច្ចុប្បន្ននេះ​ថវិកាជាតិ​មាន​ក្នុង​រតនាគា​ជាតិ ដែល​សល់​ពី​ការចំណាយ​ប្រចាំឆ្នាំ​កន្លងទៅ គឺមាន​ចំនួន៣ពាន់​លាន​ដុល្លារ​អាមេរិក។

រីឯ​លោក ពេជ្រ ស្រស់ បាន​ថ្លែងថា ក្រៅ​បញ្ជាក់​ពី​ចំនួន​ថវិកា​នេះ ឧបនាយករដ្ឋមន្ដ្រី អូន ព័ន្ធមុនីរ័ត្ន បានបញ្ជាក់​អំពី​ក្ដី​រំពឹង​នៃ​ចំណូល​ដែល​កម្ពុជា​ទទួលបាន​ពី​វិស័យ​ប្រេងកាត​នៅក្នុង​ប្លុក A ដែនសមុទ្រ​កម្ពុជា​ថា នៅ​រយៈពេល១០ឆ្នាំ​ដំបូង​នៃ​ដំណើរការ​បូម​ប្រេង​កម្ពុជា​រំពឹងថា នឹង​ទទួលបាន​ចំណូល១ពាន់​លាន​ដុល្លារ។

ជាមួយគ្នានេះ ឧបនាយករដ្ឋមន្ដ្រី អូន ព័ន្ធមុនីរ័ត្ន ក៏បាន​ប្រាប់​ពី​ចំណូល​ពន្ធដារ​ដែល​កម្ពុ​ជា​ទទួលបាន​ពី​វិស័យ​កាស៊ីណូ នៅ​ឆ្នាំ២០១៩នេះ​ថា ប្រមូលបាន​ពន្ធ​ជាង ៥០លាន​ដុល្លារ​អាមេរិក ដែល​ចំណូល​នេះ​នឹង​ថមថយ​វិញ​នៅ​ឆ្នាំ២០២០ ដោយសារតែ​ការបិទ​ល្បែង​តាម​អន​ឡាញ។

សម្ដេច ហ៊ុន សែន តែងតែបាន​ប្រកាស​ពី​ភាពរឹងមាំ​នៃ​ថវិកាជាតិ​ដែល​កម្ពុ​ជាមាន ខណៈដែល​ចំណូល​គយ និង​ពន្ធដារ បាន​កើនឡើង។ កាលពីដើម​ខែតុលា ឆ្នាំ២០១៩កន្លងទៅនេះ សម្ដេច ហ៊ុន សែន បាន​បញ្ជាក់ថា ប្រទេស​កម្ពុ​ជាមាន​ប្រាក់​បម្រុង​សល់​រហូតដល់១៥ពាន់​លាន​ដុល្លារ និង​មាស៣០តោន។

ដោយ​ពាក់ព័ន្ធ​នឹង​ចំណូល​ដែល​ទទួលបាន​ពី វិស័យ​ប្រេងកាត​សម្ដេច​តេ​ជោ ហ៊ុន សែន បាន​បញ្ជាក់ថា ចំណូល​នេះ​នឹង​ត្រូវយក​ទៅប្រើ​សម្រាប់​ក​សាង​ហេដ្ឋារចនាសម្ព័ន្ធ​ដូចជា៖ ផ្លូវថ្នល់ ស្ពាន់​ជាដើម៕