អាជ្ញាធរខេត្តព្រះសីហនុ ចាប់ផ្ដើមបើកការដ្ឋានស្ថាបនាផ្លូវទ្រង់ទ្រាយធំ ដើម្បីប្រែក្លាយជាទីក្រុងដ៏ទំនើប

ព្រះសីហនុ៖ អាជ្ញាធរក្រុងព្រះសីហនុ បាននិងកំពុងអភិវឌ្ឍន៍ហេដ្ឋារចនាសម្ព័ន្ធផ្លូវក្រុងជាលក្ខណៈទ្រង់ទ្រាយធំ​ ​ដោយ​ក្រុមការងារបច្ចេកទេសនៃគណៈកម្មាធិការជាតិគ្រប់គ្រង និងអភិវឌ្ឍតំបន់​ឆ្នេរ​សមុទ្រ​កម្ពុជា សហការ​ជា​មួ​យ​​ក្រសួងសាធារណការ និងដឹកជញ្ជូន ដើម្បី​កែប្រែ​ឲ្យ​ក្លា​យទៅជាទីក្រុងដ៏​ទំនើបមាន​សោភ័ណភាព បរិស្ថាន​ល្អ​ស​ម្រាប់ការរស់នៅ ទេសចរណ៍ និងធុរកិច្ច។

មន្ត្រីគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជាបានឲ្យដឹងថា ផ្លូវសរុប ៣៤ខ្សែ ក្នុង​ក្រុង​ព្រះ​សី​ហ​នុ ប្រវែងសរុបជាង ៨៤ គីឡូម៉ែត្រ នឹងត្រូវបានស្ថាបនាជាថ្មីឡើងវិញ ដោយចំណាយ​ទឹក​ប្រាក់​សរុប​ប្រមា​ណ​ជាង ២០០ លានដុល្លារអាមេរិក ស្របតាមបទបញ្ជារបស់រដ្ឋាភិបាល​សំដៅ ប្រែក្លាយក្រុងព្រះសីហនុ ជា​ទី​ក្រុ​ង​ទំ​នើប និង​ជាតំបន់​សេដ្ឋ​កិច្ចពហុប៉ូលរបស់កម្ពុជា។

លោកបន្តថា បច្ចុប្បន្ន​ផ្លូវចំនួន ២៤ ខ្សែ ក្នុងខេត្តព្រះសីហនុ បាននិងកំពុងចាប់ផ្ដើមស្ថាបនាជាបណ្ដើរៗហើយ ក្នុង​នោះរួមមាន៖ ​កងវិស្វកម្ម សម្តេច​ ហ៊ុន សែន សៀមរាប ស្ថាបនាផ្លូវមហាវិថីជំទាវម៉ៅ ប្រវែង ៩,៣៦៥ ម៉ែត្រ​ចំនួន០១ ខ្សែ។ កងវិស្វកម្ម លេខ ១៧៨ ស្ពានថ្នល់ ស្ថាបនាវិថីឯករាជ្យ ប្រវែង៥,៣៦៥ម៉ែត្រ ចំនួន០១ខ្សែ។ ក្រុមហ៊ុន ហេង សម្បត្តិ ស្ថាបនាមហាវិថីឆ្នេររាម, វិថីអូរត្រេះ, វិថីពូទ្បូវៃ, វិថី២ធ្នូ, វិថី២៨ មិថុនា ប្រវែងសរុប ២៣,៣៦០ម៉ែត្រ ចំនួន០៥ខ្សែ។

ក្រុមហ៊ុន រ៉ូយ៉ាល់មេគង្គ ស្ថាបនាមហាវិថីរាម​លេខ ៤៥ និង​វិថីមិត្តភាពកម្ពុជា-រុស្សី លេខ ៧០៥ ប្រវែងសរុប ១១,៦០៣ ម៉ែត្រ ចំនួន០២ខ្សែ។ ​ក្រុមហ៊ុន សារជីវកម្ម ពិស្ណុការ ស្ថាបនាខ្សែផ្លូវលេខ ៤, ៦, ១២, ៧, ១៧, ១៨, ១៩, ២០, ១១ ប្រវែងសរុប ១២,៥៧២ ម៉ែត្រ ចំនួន០៩ខ្សែ។ ​ក្រុមហ៊ុន SCE ស្ថាបនាវិថីចំណោតអូរត្រាវ លេខ ៤៩ ប្រវែងសរុប ៦,៥០៦ម៉ែត្រចំនួន១ខ្សែ និងក្រុមហ៊ុន VT ស្ថាបនាផ្លូវលេខ ១១៥, ១៣៥, ១០២​, ១២​៦, ៥០២ ប្រវែងសរុប ៥,៥៦២ម៉ែត្រចំនួន០៥ខ្សែ។

នៅអំឡុងពេលចុះត្រួតពិនិត្យការដ្ឋានស្ថាបនាផ្លូវ «មហាវិថីជំទាវម៉ៅ» នាពេលថ្មីៗនេះ លោក គួច ចំរើន អភិ​បា​ល​ខេត្តព្រះសីហនុបានថ្លែងថា៖«បងប្អូនប្រជាពលរដ្ឋកម្ពុជា ទាំងអស់ នឹងភ្ញាក់ផ្អើលជាមួយសមិទ្ឋផលថ្មី ក្នុង​ទឹក​ដី​ខេត្តព្រះសីហនុ ដែលកើតមាននៅពេលខាងមុខនេះ។ ប៉ុន្តែដើម្បីសម្រេចបានតាមផែនការ គឺមិន​មែន​ត្រឹម​អាជ្ញា​ធរ​ខេត្តទេ គឺប្រជាពលរដ្ឋក្នុងខេត្តទាំងមូលត្រូវរួមគ្នាប្រឹងប្រែងឲ្យអស់លទ្ឋភាព ដើម្បី​ប្រែ​ក្លាយ​ទីក្រុ​ង​មួ​យ​នេះ ឲ្យ​ទៅ​ជាទីក្រុងបៃតង និងជាទីក្រុងទេសចរណ៏ដ៏ទំនើប សម្រាប់បងប្អូនកម្ពុជា មកកំសាន្តនៅឆ្នាំ២០២០ ខាង​មុខ​នេះ»៕