នៅពាក់កណ្ដាលឆ្នាំ២០២០នេះ កម្ពុជាអាចបូមប្រេងកាតរហូតដល់ ៧៥០០បារ៉ែលក្នុងមួយថ្ងៃ

ភ្នំពេញ៖ ការបូមប្រេងកាតចេញពីតំបន់អប្សរា គ្រោង​នឹងត្រូ​វធ្វើ​ឡើង​នៅ​ឆមាសទី១ ឆ្នាំ២០២០ខាងមុខនេះ ដែល​មាន​អត្រាផលិតកម្មខ្ពស់បំផុត ៧៥០០បារ៉ែលក្នុង១ថ្ងៃ ខណៈក្រុមហ៊ុន គ្រីសអែននីជី (KrisEnergy) របស់​ប្រ​ទេ​​ស​សិង្ហបុរី ជាអ្នក​ទទួលបានសិទ្ធិវិនិយោគគម្រោង​ប្រេង​កាត​ប្លុក (A) របស់​កម្ពុជានេះ។

​តាមសេចក្តីប្រកាសព័ត៌មានបស់ក្រុមហ៊ុន គ្រីសអែននីជី (KrisEnergy) ចុះនៅថ្ងៃទី១៥ ខែវិច្ឆិកានេះឲ្យដឹងថា ​ប្រេងពីតំបន់អប្សរាត្រូវបានគ្រោងនឹងផលិតក្នុងឆមាសទី១ ឆ្នាំ២០២០ ហើយតំបន់នេះត្រូវបានរំពឹងទុកថា នឹង​ឈា​នដល់អត្រាផលិតកម្មខ្ពស់បំផុត ៧៥០០បារ៉ែលក្នុង១ថ្ងៃ។

សេចក្តីប្រកាសព័ត៌មានបន្តថា ក្រុមហ៊ុនបានចុះកិច្ចសន្យាជាមួយនឹងក្រុមហ៊ុន PT Profab ដើម្បីផ្គត់ផ្គង់​ផ្លាត​ហ្វ​ម​​ក្បា​លអណ្តូងផលិតកម្មខ្នាតតូច សម្រាប់តំបន់ប្រេងអប្សរា ដែលជាតំបន់អភិវឌ្ឍប្រេង​ដំបូងគេ​បង្អ​ស់រប​ស់​កម្ពុ​ជា​។

ជាមួយគ្នានេះ លោក ស៊ុយ សែម រដ្ឋមន្រ្តីក្រសួងរ៉ែ និងថាមពលបានថ្លែងកាលថ្ងៃទី១៤ ខែវិច្ឆិកាថា ​កម្ពុជា​នឹង​ផលិ​តដំ​ណក់ប្រេងទី១ ក្នុងពេលដ៏ខ្លីខាងមុខនេះ។«ទន្ទឹមនឹងច្បាប់ប្រេងកាត ដែលទើបបានអនុម័ត នឹងដាក់ឲ្យ​ប្រើ​​ប្រា​ស់នាពេលថ្មីៗនេះ យើងមានគម្រោងប្រេងកាតប្លុក (A) ដែលវិនិយោគដោយក្រុមហ៊ុនគ្រីសអែននីជី (Kri​s​​Energy) មកពីប្រទេសសិង្ហបុរី កំពុងស្ថិតក្នុងដំណាក់កាលអភិវឌ្ឍន៍ និងផលិតកម្ម។ តាមផែនការរ​បស់ក្រុ​ម​ហ៊ុ​ន កម្ពុជានឹងផលិតដំណក់ប្រេងទីមួយរបស់យើងក្នុងពេលដ៏ខ្លីខាងមុខនេះ»

រូបតំណាង

លោកបន្តថា កម្ពុជាមានគម្រោងអភិវឌ្ឍរោងចក្រចម្រាញ់ប្រេងកាតនៅខេត្តព្រះសីហនុ ដែលមាន​សមត្ថ​ភាពច​ម្រា​ញ់​សរុប ៥លានតោនក្នុងមួយឆ្នាំ ខណៈកំពុងស្ថិតក្នុងដំណាក់កាលសាងសង់ ហើយរំពឹងថា នឹងអាចចាប់​ផ្តើម​ដំណើ​រការ ផលិតកម្មដំណាក់កាលដំបូង ដែលមានសមត្ថភាព ២លានតោនក្នុងមួយឆ្នាំនាឆ្នាំខាងមុខ៕