អគារពន្ធនាគារព្រៃសលំដាប់ VIP ត្រូវបានបញ្ចប់ការសាងសង់ជាស្ថាពរ ដោយរង់ចាំសម្ភោធដាក់អ្នកទោស

ភ្នំពេញ៖ ពន្ធនាគារវិនិយោគព្រៃសគម្រោងទី១ ត្រូវបានបញ្ចប់ការសាងសង់ជាស្ថាពរហើយដែលអាច​ផ្ទុក​អ្នក​ជាប់​ឃុំរហូតដល់ជាង ៤០០នាក់ បន្ទាប់ពីក្រុមហ៊ុន គន្ធ រីខុន ហូលឌីងទទួលបានសិទ្ធិសាង​សង់អាគារនេះ ដើម្បី​ប្រើ​ប្រា​ស់តា​ម​តម្រូ​វការ ដោយផ្ទេរ​អ្នក​ជា​ប់​ឃុំ​នៅពន្ធនាគារដែលមានស្រាប់មកពន្ធនាគារថ្មីនេះក្នុងការដោះស្រាយ​ភាព​​ចង្អៀ​ត​ណែន។

​ការបង្ហាញនេះ ក្នុងកម្មវិធីចុះហត្ថលេខាទទួល និងប្រគល់អគារ​ក្រោមអធិបតីភាព លោក ម៉ៅ ប៊ុនណារិន, លោក ឡាំ ជា រដ្ឋលេខាធិការក្រសួងមហាផ្ទៃ, នាយឧត្តមសេនីយ៍សន្ដិបណ្ឌិត ចាន់ គីមសេង អគ្គនាយកពន្ធនាគារ, នា​យ​ឧត្តមសេនីយ៍ សេង យូអ៊ាន់ អគ្គនាយកភស្ដុភារ និងខាងតំណាងក្រុមហ៊ុនឯកជន។

មន្រ្តីជាន់ខ្ពស់រដ្ឋាភិបាលបានឲ្យដឹងថា រាជរដ្ឋាភិបាលកម្ពុជាបានសម្រេចយល់ព្រមឲ្យក្រុមហ៊ុន គន្ធ រីខុន ហូល​ឌីង វិនិយោគសាងសង់អគារស្នាក់នៅ អគារអប់រំកែប្រែអ្នកប្រើប្រាស់គ្រឿងញៀន និងអគារថែទាំសុខភាព សម្រា​ប់​ផ្ដល់សេវាកម្មដោយផ្ដាច់មុខដល់ជនជាប់ឃុំទាំងឡាយ ដែលមានលទ្ធភាពបង់ថ្លៃសេវាដោយស្ម័គ្រចិត្ត ក្រោម​រូប​ភាព​សាង​សង់ប្រតិបត្តិការ និងផ្ទេរ (BOT) រយៈពេល៤៥ឆ្នាំ ដែលទំហំវិនិយោគសរុបជាង ៤លាន ១សែន​ដុល្លារ​។

លោកបន្តថា ក្រុមហ៊ុនបានដំណើរការសាងសង់ បំពាក់សម្ភារៈ និងបានបញ្ចប់ការងារសាងសង់មួយភាគធំ ព្រម​ទាំង​បា​នដាក់សំណើមកក្រសួងមហាផ្ទៃ ដើម្បីរៀបចំដាក់ដំណើរការពន្ធនាគារនេះ ប៉ុន្ដែដោយមានការណែនាំពី សម្ដេច​ ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ចង់ទិញយកគម្រោងវិនិយោគនេះពីក្រុមហ៊ុនវិញ ដើ​ម្បី​​យកមកអនុវត្តក្នុងក្របខណ្ឌក្រសួងមហាផ្ទៃវិញ ទើបសម្រេចបង្កើតក្រុមការងាររបស់ក្រសួងពិភាក្សា និង​សិក្សា​ជា​មួយ​ក្រុមហ៊ុន ដើម្បីពិនិត្យលទ្ធភាពទិញយកគម្រោងវិនិយោគនេះ។

ក្រោយមកក្រុមហ៊ុន គន្ធ រីខុន ហូលឌីង ក៏បានយល់ព្រមលក់គម្រោងវិនិយោគនេះ មកឲ្យក្រសួងមហាផ្ទៃ និង​ស្នើ​សុំ​ប្រគល់​សំណង់អ​គារ សម្ភារបំពាក់ និងហេដ្ឋារចនាសម្ព័ន្ធ ដែលបានសាងសង់ និងបំពាក់សម្ភាររួច មកឲ្យក្រ​សួ​ង​មហា​ផ្ទៃគ្រប់គ្រង និងចាត់ប្រើប្រាស់ទៅតាមគោលបំណងរបស់ក្រសួងមហាផ្ទៃ។

គួរជម្រាបថា រហូតមកដល់ពេលនេះចំនួនអ្នកជាប់ឃុំក្នុងពន្ធនាគារ នៅទូទាំងប្រទេសមានជាង ៣៦,៦០០នាក់ ក្នុងនោះស្រីជាង ៣,០០០នាក់ ដែលភាគច្រើនជាបទល្មើសគ្រឿងញៀន។ សម្រាប់ចំនួនអ្នកជាប់​ឃុំក្នុង​មណ្ឌ​ល​អប់​រំកែ​ប្រែ​ទី១ «ម១» មានចំនួន៩,៤៥០នាក់ និងមណ្ឌលអប់រំកែប្រែទី២ «ម២» (ហៅថាគុកព្រៃស) មាន​ចំ​នួ​ន ១,៨៥៥នាក់។ នេះបើតាម​លោក នុត សវនា អគ្គនាយករងពន្ធនាគារ និងជាអ្នកនាំពាក្យ​អគ្គនាយ​កដ្ឋា​នព​ន្ធ​នា​​គារ​៕