អគ្គនាយកដ្ឋាន​ពន្ធដា​រ ក្រើនរំលឹក​ម្ចាស់​យានយន្ត​ជា​លើក​ទី២ បើ​មិន​ទៅ​បង់ពន្ធ​នឹងត្រូវ​ទទួលទោស​តាមច្បាប់

ភ្នំពេញ៖ អគ្គនាយកដ្ឋាន​ពន្ធដា​រ បាន​ក្រើនរំលឹក​ដល់​ម្ចាស់​យានយន្ត​ទាំងអស់​ត្រូវតែទៅ​បង់ពន្ធ​លើ​មធ្យោបាយ​ដឹក​ជញ្ជូ​ន និង​យានជំនិះ​គ្រប់​ប្រភេទ​ប្រចាំឆ្នាំ ២០១៩ ខណៈ​ម្ចាស់​មួយចំនួន​នៅ​មិនទាន់​បានមក​ប្រកាស​បង់ពន្ធ​នៅឡើយ បើ​មិន​​ដូច្នេះ​អគ្គនាយក​ពន្ធដារ នឹង​សហការ​ជាមួយ​សមត្ថកិច្ច ជាពិសេស នគរបាល​ចរាចរណ៍​ដើម្បី​ចុះ​ត្រត​ពិនិត្យ​ការ​អនុ​វត្ត​​ប្រ​មូល​ពន្ធ​នេះ​នៅតាម​ដងផ្លូវ​នានា។

តាម​សេចក្តីជូនដំណឹង​ការ​រំលឹករ​លើក​ទី២ របស់​អគ្គនាយកដ្ឋាន​ពន្ធដារ​ស្ដីពី ការបង់ពន្ធ​លើ​មធ្យោបាយ​ដឹកជញ្ជូន និង​យានជំនិះ​គ្រប់​ប្រភេទ​ប្រចាំឆ្នាំ២០១៩ បាន​ឲ្យ​ដឹងថា អនុលោម​តាម​ប្រកា​សលេខ ៥៣១ សហវ.ប្រក ចុះ​ថ្ងៃទី ៣០ ខែ​ឧសភា ឆ្នាំ២០១៨ របស់​ក្រសួង​សេដ្ឋកិច្ច​និង​ហិរញ្ញវត្ថុ ស្តីពី​ការប្រមូល​ពន្ធ​លើ​មធ្យោបាយ​ដឹកជញ្ជូន និង​យានជំនិះ​គ្រប់​​ប្រភេទ​ប្រចាំឆ្នាំ ការប្រមូល​ពន្ធ​ប្រភេទ​នេះ​នឹងត្រូវ​បិទ​បញ្ចប់​ជា​ស្ថាពរ​នៅ​ថ្ងៃទី៣០ ខែវិច្ឆិកា ឆ្នាំ២០១៩ ខាងមុខ។

សេចក្ដីប្រកាស​បន្តថា ទន្ទឹមនឹងនេះ អគ្គនាយកដ្ឋាន​ពន្ធដា​រ​បានចេញ​សេចក្តី​ជូន​ស្តីពី​ការ​រំលឹក​ការបង់ពន្ធ​លើ​មធ្យោ​បា​យ​​ដឹកជញ្ជូន និង​យានជំនិះ​គ្រប់​ប្រភេទ​ប្រចាំឆ្នាំ ២០១៩ រហូតមកដល់​ពេលនេះ អគ្គនាយកដ្ឋាន​ពន្ធដា​រ​ស​ង្កេ​ត​ឃើ​ញ​ថា មាន​ម្ចាស់​យានយន្ត​ភាគច្រើន​បានប្រកាស​បង់ពន្ធ​រួចរាល់​ហើយ ខណៈដែល​ម្ចាស់​យានយន្ត​មួយចំនួនទៀត​នៅ​មិន​ទាន់​​បានមក​ប្រកាស​បង់ពន្ធ​ប្រភេទ​នេះ​នៅឡើយ។

អគ្គនាយកដ្ឋាន​ពន្ធដា​រ ក្រើនរំលឹក​ដល់​ម្ចាស់​យានយន្ត​ទាំងអស់​ដែល​មិនទាន់បាន​បំពេញ​កាតព្វកិច្ច​បង់ពន្ធ មេត្តា​រួស​រាន់​​អញ្ជើញ​មក​ប្រកាស​បង់ពន្ធ​ឲ្យ​បាន​ទាន់ពេលវេលា​ត្រឹម​ថ្ងៃទី៣០ ខែវិច្ឆិកា ឆ្នាំ២០១៩ នៅតាម​សាខា​ពន្ធដារ​ខេត្ត ខណ្ឌ​ ឬ​នៅ​ធនាគារ​កាណាឌីយ៉ា ក.អ ឬ​ធនាគារ​អេស៊ីលីដា ភីអិលស៊ី ឬ​ធនាគារ​កម្ពុជា​សាធារណៈ​ភីអិលស៊ី ឬ​ធនាគារ​វឌ្ឍនៈ ឬ​នៅតាម​ធនាគារ​ដែល​បាន​ចុះ​អនុស្សរណៈ​នៃ​ការយោគយល់​គ្នា​ជាមួយ​ក្រសួង​សេដ្ឋកិច្ច​និង​ហិរញ្ញវត្ថុ ដើម្បី​ចៀ​ស​វាង​ការកកស្ទះ និង​ការ​ប្រជ្រៀត​គ្នា​មក​ប្រកាស​បង់ពន្ធ​នៅ​ថ្ងៃ​ជិត​ផុតកំណត់​ដែល​អាច​នាំឱ្យ​កើតមាន​នូវ​បាតុភាព​អ​ស​ក​ម្ម​ដោយ​ប្រការ​ណាមួយ។

ក្នុងករណី​ខកខាន​មិនបាន​បង់ពន្ធ​ទាន់ពេលវេលា​តាម​ការកំណត់​ខាងលើ ម្ចាស់​យានយន្ត​នឹងត្រូវ​ទទួលរង​នូវ​ទោ​ស​ទ​ណ្ឌ​​​តាមច្បាប់​ស្តីពី​សារពើពន្ធ​ជា​ធរមាន។ អគ្គនាយកដ្ឋាន​ពន្ធដា​រ​នឹង សហការ​ជាមួយ​អាជ្ញា​ធរមាន​សមត្ថកិច្ច​ជាពិ​សេ​ស នគរបាល​ចរាចរណ៍​ដើម្បី​ចុះ​ត្រត​ពិនិត្យ​ការអនុវត្ត​ប្រមូល​ពន្ធ​នេះ​នៅតាម​ដងផ្លូវ​នានា បន្ទាប់ពី​ការបិទ​បញ្ចប់​ការ​ប្រមូ​ល​​​ពន្ធ៕