ភ្នំពេញ៖ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការគណៈកម្មាធិការរៀបចំដែនដីថ្នាក់ជាតិ លោក ប៉ែន សុផល នៅព្រឹកថ្ងៃទី ២៥ ខែកញ្ញានេះ បានអះអាងថា មន្ត្រីជំនាញក្រសួងរៀបចំដែនដី នឹងចាត់វិធានការតាមផ្លូវច្បាប់ចំពោះអ្នកលក់ដីឡូតិ៍ទាំងឡាយដែលគ្មានច្បាប់ត្រឹមត្រូវ ឬហៅថាអ្នកលក់ដីឡូតិ៍ខ្យល់។
ការព្រមាននេះ នៅក្នុងកម្មវិធីសិក្ខាសាលាផ្សព្វផ្សាយ ប្រកាសស្តីពីការអភិវឌ្ឍដី បន្ទាប់ពីការពុះដីឡូតិ៍លក់ ហាក់មានភាពអនាធិបតេយ្យយ៉ាងខ្លាំង និងមិនត្រូវត្រូវតាមច្បាប់ ខណៈដែលលោកត្រូវបានគេអញ្ញើញអធិបតីតំណាងឲ្យកម្មវិធីទាំងមូលនៅទីស្ដីការក្រសួងរៀបចំដែនដី នគរូបនីយកម្ម និងសំណង់។
លោក ប៉ែន សុផល បានថ្លែងថា បច្ចុប្បន្នក្រសួងបានអនុម័តសេចក្ដីប្រកាសការអភិវឌ្ឍដីនេះ ហើយត្រូវបានដាក់ឲ្យអនុ វត្តនាពេលនេះដែរ។ ចំពោះឈ្មួញដែលរកស៊ីការជួញដូរដីធ្លី ឬមានដីធ្វើជាគ្រោងអភិវឌ្ឍន៍ដីទាំងអស់ រួមទាំងការពុះដីឡូតិ៍ និងគម្រោងខនដូនានា ម្នាស់កម្មសិទ្ធិត្រូវតែសុំច្បាប់អនុញ្ញាតពីក្រសួងរៀបចំដែនដី សាលាខណ្ឌ/ស្រុក ឬសាលារាជធានី/ខេត្ត ទៅតាមទំហំដីឲ្យបានត្រឹមត្រូវ។
លោកបញ្ជាក់ថា៖«នៅក្នុងប្រកាសហើយនឹងបទដ្ឋានគតិយុត្តិជាច្រើនទៀតរបស់ក្រសួងទីមួយវាជាបទដ្ឋានគតិយុត្តទាក់ទងទាំងអស់ ទាំងវិស័យឯកជន និងវិស័យវិជ្ជាជីវៈ ហើយគ្រប់ទាំងសាធារណៈ និងឯកជន ត្រូវតែគោរពតាមគោលការណ៍ច្បាប់ និងបទដ្ឋានគតិយុត្តជាធរមាន។ ក្នុងករណី ដែលយើងមិនគោរពតាមក្រសួង គឺមានតែការដាក់ទណ្ឌកម្ម»។
ក្រៅពីការព្រមានដាក់ទណ្ឌកម្មដល់អ្នកលក់ដីឡូតិ៍បោកប្រាស់ទាំងអស់នោះ មន្ត្រីជាន់ខ្ពស់រូបនេះបានអំពាវនាវឲ្យអ្នកទិញដីទាំងអស់ ត្រូវតែពិនិត្យឲ្យបានច្បាស់លាស់ចំពោះដីដែលខ្លួនត្រូវទិញនោះ ថាតើវាជាដីដែលមានការចុះបញ្ជីច្បាស់លាស់ និងមិនមែនជាដីដែលបានលក់រួចហើយ។
លោក ប៉ែន សុផល បានបញ្ជាក់ថា៖«អញ្ចឹងហើយបានក្រសួងអំពាវនាវទៅដល់ប្រជាពលរដ្ឋទាំងអស់ ជាទូទៅច្បាប់ភូមិបាលបានកំណត់ច្បាស់លាស់។ ជាគោលការណ៍ច្បាប់ភូមិបាល បានផ្តល់កម្មសិទ្ធិ ហើយរាជរដ្ឋាភិបាលបានរៀបចំប្រព័ន្ធចុះបញ្ជីទីមួយ មានការចុះបញ្ជីជាប្រព័ន្ធ បន្ទាប់មកគោលដៅអនុវត្តនៅទូទាំងប្រទេស ហើយទី២ការចុះបញ្ជីដាច់ដោយឡែក។ អញ្ចឹងប្រជាពលរដ្ឋទាំងអស់ ត្រូវតែពិនិត្យមើលមុននឹងទិញ ថាដីនោះពិតជាមានការចុះបញ្ជីត្រឹមត្រូវ ហើយជាដីរបស់អ្នកដែលបានលក់ពិតប្រាកដដែរទេ»។
ការអំពាវនាវ និងប្រមានចាត់វិធានការនេះ បន្ទាប់ពីធ្លាប់មានទំនាស់ដីធ្លីជាច្រើនចេញពីការបោកប្រាស់ ឬមានឈ្មួញខិលខូចប្រកាសលក់ដីឡូតិ៍ខ្យល់ ឬធ្វើសកម្មភាពគ្មានច្បាប់ត្រឹមត្រូវជាមួយពលរដ្ឋទូទៅ៕
ដោយ: ហៃ សិរី
