ភ្នំពេញ៖ ធនាគារជាតិនៃកម្ពុជា នៅថ្ងៃទី២៦ ខែកញ្ញា នេះ បានចេញសេចក្ដីប្រកាសព័ត៌មានមួយ ស្ដីពីការ ដកហូតអាជ្ញាបណ្ណក្រុមហ៊ុន, គ្រឹះស្ថានឥណទានជនបទ និងអាជ្ញាបណ្ណប្រកបអាជីវកម្មប្ដូរប្រាក់ ពីស្ថានប័នចំនួន៩ បន្ថែមទៀត ខណៈកាលពីថ្ងៃទី ០៥ កញ្ញាកន្លងទៅបានប្រកាសឲ្យបិទស្ថានប័នទាំងនេះចំនួន ២៦ ផងដែរ។ នេះបើតាមសេចក្ដីប្រកាសព័ត៌មានរបស់ធនាគារជាតិនៃកម្ពុជា។
សេចក្ដីប្រកាសព័ត៌មានរបស់ធនាគារជាតិនៃកម្ពុជាចុះថ្ងៃទី ២៦ ខែកញ្ញានេះ បានបង្ហាញថា ការដកហូតអាជ្ញាបណ្ណ ក្រុមហ៊ុនភតិសន្យាហិរញ្ញវត្ថុចំនួន១, មោឃភាពវិញ្ញាបនប័ត្រ របស់គ្រឹះស្ថានឥណទានជនបទចំនួន៥, អាជ្ញាបណ្ណប្រកបអាជីវកម្មប្តូរប្រាក់ចំនួន២ និងលិខិតអនុញ្ញាតប្រកបអាជីវកម្មប្តូរប្រាក់ចំនួន។
ស្ថាប័នដែលត្រូវបានធនាគារជាតិនៃកម្ពុជា ដកហូតអាជ្ញាបណ្ណទាំង៩នោះរួមមាន៖ ១៖ ដកហូតអាជ្ញាបណ្ណក្រុមហ៊ុនភតិសន្យាហិរញ្ញវត្ថុឈ្មោះ ឡឺ រ៉ូស៊េ ហ្វាយនែនសល លីស៊ីង ភីអិលស៊ី។ ២៖ គ្រឹះស្ថានឥណទានជនបទឈ្មោះ ចំរើន ចំរើន ហ្វាយនែន ម.ក។ ៣៖ គ្រឹះស្ថានឥណទានជនបទឈ្មោះ អេច អូ អ អេស ក្រេឌីត ម.ក។ ៤៖ គ្រឹះស្ថានឥណទានជនបទឈ្មោះ មិត្តភាព ហ្វាយនែន ម.ក។ ៥៖ គ្រឹះស្ថានឥណទានជនបទឈ្មោះ ហ្វ៊ែរ ឃែភីថល ម.ក។
ក្នុងនោះ ទី៦៖ គ្រឹស្ថានឥណទានជនបទឈ្មោះ សូពន្លឺ ហ្វាយនែន ម.ក។ ៧៖ ដកហូតអាជ្ញាបណ្ណប្រកបអាជីវកម្មប្តូរប្រាក់ឈ្មោះ វែ ឃែសអ៊ិនធើណេសិនណល ឯ.ក យីហោ (ឃែស ឃីង)។ ៨៖ ដកហូតអាជ្ញាបណ្ណប្រកបអាជីវកម្មប្តូរប្រាក់ឈ្មោះ អេហ្វអិកស៍ យូណាយធីត អ៊ិនវេសម៉ិន ឯ.ក។ និងទី៩៖ ដកហូតលិខិតអនុញ្ញាតប្រកបអាជីវកម្មឈ្មោះ (សុខ ស្រីល័ក្ខ)។
សូមជម្រាបថា កាលពីពេលថ្មីៗកន្លងទៅនេះ ធនាគារជាតិនៃកម្ពុជា ទើបសម្រេចបិទគ្រឹះស្ថានផ្តល់ឥណទានចំនួន២៦រួចហើយផងដែរ៕
ដោយ: ហៃ សិរី
