ភ្នំពេញ: ក្រុមប្រឹក្សាភិបាលនៃសមាគមសហព័ន្ធវិនិយោគិន អះអាងថា ខ្លួនបានកំណត់នូវទិសដៅយុទ្ធសាស្ត្ររបស់ខ្លួនរួចជាស្រេច ដើម្បីអនុវត្តការងារឱ្យស្របនឹងបដិវត្តឧស្សាហកម្មជំនាន់ទី៤ ឬឌីជីថរូបនីយកម្ម ខណៈពិភពលោកកំពុងលិចឡើងនូវការវិវត្តថ្មីមួយទៀត ហើយកម្ពុជាក៏កំពុងអភិវឌ្ឍខ្លួនឱ្យទាន់នឹងការប្រែប្រួលជាលក្ខណៈសកលមួយនេះដែរ។
ការលើកឡើងនេះ ក្នុងកិច្ចប្រជុំសាមញ្ញរបស់ក្រុមប្រឹក្សាភិបាលនៃសមាគមសហព័ន្ធវិនិយោគិនលើកទី៣ ត្រូវធ្វើឡើងក្រោមអធិបតីភាពលោក សួន រិន្ទឌី ប្រធានក្រុមប្រឹក្សាភិបាលសមាគម កាលពីថ្ងៃទី២៦ ខែកញ្ញា ឆ្នាំ២០១៨ នៅសណ្ឋាគារហាយស្កាយ។
លោកបណ្ឌិត ឡី សុភាព ប្រធាននាយកប្រតិបត្តិនៃសមាគមសហព័ន្ធវិនិយោគិន បានឱ្យដឹងថា ក្រុមប្រឹក្សាភិបាលនៃសមាគមសហព័ន្ធវិនិយោគិន បានបូកសរុបលទ្ធផលការងារជាច្រើនដែលសម្រេចបាននាពេលកន្លងមក ព្រមទាំងបានពិភាក្សា និងពិគ្រោះយោបល់លើការងារមួយចំនួនរវាងថ្នាក់ដឹកនាំ និងសមាជិកសមាគម ពិសេគឺបានកំណត់នូវទិសដៅការងារអនុវត្តបន្តនៅពេលបន្តបន្ទាប់ទៀត។
លោកបញ្ជាក់ថា ទិសដៅការងារទាំងនេះ សុទ្ធតែស្របតាមគោលនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា ដែលកំពុងនាំមកនូវវឌ្ឍភាពសម្រាប់ជាតិ ព្រមទាំងកិត្យានុភាព និងកិច្ចសហប្រតិបត្តិការលើឆាកអន្តរជាតិ ដោយសមាគមសហព័ន្ធវិនិយោគិន បានផ្តោតសំខាន់លើវិស័យវិនិយោគ និងសេដ្ឋកិច្ច ដែលជាផ្នែកដ៏ចាំបាច់បំផុតមួយសម្រាប់ការអភិវឌ្ឍប្រទេសជាតិ។
ចំណែក លោក សួន រិន្ទឌី លើកឡើងថា សមាគមសហព័ន្ធវិនិយោគិន បានកំណត់នូវយុទ្ធសាស្ត្រការងារមួយចំនួនជាចាំបាច់ទាក់ទងទៅនឹងការវិវត្តជាលក្ខណៈសកលថ្មីមួយ ដែលពិភពលោកទើបតែពើបប្រទះនាពេលកន្លងមក នោះគឺបដិវត្តឧស្សាហកម្មជំនាន់ទី៤ ដែលពាក់ព័ន្ធស្ទើរតែទាំងស្រុងទៅលើប្រព័ន្ធ «ឌីជីថលូបនីយកម្ម»។
ចំពោះលទ្ទផលការងារដែលបានអនុវត្តកន្លងមក គឺសមាគមសហព័ន្ធវិនិយោគិនបានសម្រេចនូវការងារជាច្រើន ដូចជា ការបណ្ដុះបណ្ដាល អប់រំ ផ្សព្វផ្សាយ និងបញ្ជ្រាបចំណេះដឹងអំពីនីតិវិធីច្បាប់ លិខិតបទដ្ឋានគតិយុត្ត ក៏ដូចជាវិធាននានា ដល់សមាជិករបស់ខ្លួន ម្ចាស់មូលដ្ឋានអាជីវកម្មទេសចរណ៍ និងសុខាភិបាលនៅទូទាំងប្រទេស ការចូលរួមទប់ស្កាត់ផលិតផលក្លែងក្លាយ ផលិតផលមិនស្របច្បាប់ ពិសេសគឺបានចូលរួមជំរុញយ៉ាងផុសផុលជាមួយរាជរដ្ឋាភិបាលកម្ពុជា ក្នុងការអភិវឌ្ឍ និងលើកកម្ពស់វិស័យទេសចរណ៍ និងវិស័យសុខាភិបាល ព្រមទាំងវិស័យពាក់ព័ន្ធនានាផងដែរ៕
ដោយ ហៃ សិរី
