ខេត្តសៀមរាប: បើគិតត្រឹមរយៈពេល៩ខែ ក្នុងឆ្នាំ២០១៨នេះ កម្ពុជាទទួលបានចំនួន ៨៥,៥៧៩,៥២៣ដុល្លារ ពីការលក់បណ្ណចូលទស្សនារមណីយដ្ឋានអង្គរ ដោយកើនឡើង១៣ភាគរយ បើធៀបនឹងរយៈពេលដូចគ្នា កាលពីឆ្នាំ២០១៧ ខណៈដកចំនួនជាតិ ៤លានដុល្លារសម្រាប់ពេទ្យគន្ធបុប្ផា។ នេះបើតាមរបាយការណ៍របស់គ្រឹះស្ថានអង្គរបានបង្ហាញកាលពីថ្ងៃទី០១ តុលានេះ។
របាយការណ៍បញ្ជាក់ថា នៅរយៈពេល៩ខែចាប់ពីខែមករា ដល់ កញ្ញា ឆ្នាំ២០១៨នេះ ភ្ញៀវទេសចរបរទេសចំនួន ១៩០១៥៦៩នាក់ បានទិញបណ្ណចូលទស្សនាអង្គរ កើនឡើង ៨.៤៧ភាគរយ។ ដោយក្នុងចំនួនចំណូលដែលទទួលបានជាង៨៥លានដុល្លារនេះ រាជរដ្ឋាភិបាលកម្ពុជា បានដកចំនួន៣,៨០៣,១៣៨ដុល្លារ ឧបត្ថម្ភចូលមន្ទីរពេទ្យគន្ធបុប្ផា ដើម្បីទ្រទ្រង់ដំណើរការពិនិត្យ និងព្យាបាលកុមារកម្ពុជា។
សម្រាប់បណ្ណចូលទស្សនាតំបន់អង្គរ ត្រូវបានបែងចែកជា៣ប្រភេទរួមមាន៖ ទី១-ប្រភេទប័ណ្ណចូលទស្សនា១ថ្ងៃ មានតម្លៃ ៣៧ដុល្លារ។ ទី២-ប្រភេទបណ្ណចូលទស្សនា៣ថ្ងៃ មានតម្លៃ ៦២ដុល្លារ និងមានសុពលភាព១០ថ្ងៃ និងទី៣-ប្រភេទបណ្ណចូលទស្សនា៧ថ្ងៃ មានតម្លៃ ៧២ដុល្លារ និងមានសុពលភាព០១ខែ៕
ដោយ: ហៃ សិរី
