ដោយ: ហៃ សិរី
ភ្នំពេញ: រដ្ឋាភិបាលឥណ្ឌូនេស៊ីកំពុងពិចារណារៀបចំគម្រោងទិញអង្ករ និងផលិតផលកសិកម្មមួយចំនួនពីប្រទេសកម្ពុជា ដើម្បីជំរុញកិច្ចសហការ និងកាត់បន្ថយឱនភាពទំហំពាណិជ្ជកម្មនៃប្រទេសទាំងពីរ។
តាមហ្វេសប៊ុករបស់ក្រសួងពាណិជ្ជកម្មកាលពីម្សិលមិញឲ្យដឹងថា រដ្ឋាភិបាលឥណ្ឌូណេស៊ីតាមរយៈឯកអគ្គរដ្ឋទូតរបស់ខ្លួនលោក ស៊ូឌាមេន ហាសេង បានបញ្ជាក់ប្រាប់រដ្ឋមន្ត្រីពាណិជ្ជកម្មកម្ពុជាលោក ប៉ាន សូរស័ក្កិ ថាប្រទេសឥណ្ឌូណេស៊ីមានបំណងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិស័យអាទិភាពផ្សេងទៀតជាមួយកម្ពុជា ខណៈលោកបានលើកឡើងថារដ្ឋាភិបាលលោកនៅពេលនេះកំពុងពិចារណាទិញអង្ករ និងផលិតផលកសិកម្មមួយចំនួនទៀតពីកម្ពុជាផងដែរ។
ប្រជាជនឥណ្ឌូណេស៊ី មានជាង២៦០លាននាក់ ដែលជាប្រទេសមានប្រជាជនច្រើនជាងគេបំផុតទី៤ក្នុងពិភពលោក ដែលក្នុងមួយឆ្នាំត្រូវការអង្ករដើម្បីផ្គត់ផ្គង់ពលរដ្ឋប្រមាណ៣០លានតោន។ ក្នុងឆ្នាំ២០១៨នេះឥណ្ឌូណេស៊ីបានទិញអង្ករពីបរទេសប្រមាណជាង២លានតោន។
អ្នកនាំពាក្យក្រសួងកសិកម្មលោក ស្រី វុឌ្ឍី ស្វាគមន៍ចំពោះបំណងរបស់ឥណ្ឌូណេស៊ីនេះដោយថាវារឹតតែធ្វើឲ្យចំណងទំនាក់ទំនងរវាងប្រទេសទាំងពីរកាន់តែរឹងមាំ និងផ្ដល់ប្រយោជន៍ឲ្យគ្នាកាន់តែច្រើនថែមទៀត។
លោកថា៖«បញ្ហាអង្ករនេះគឺយើងធ្លាប់បានជួបជាមួយនឹងគាត់ ហើយយើងក៏ចង់ឲ្យឥណ្ឌូណេស៊ីហ្នឹងទិញអង្ករពីយើងឲ្យបានច្រើននេះគឺជាទិសដៅសហប្រតិបត្តិការសេដ្ឋកិច្ចនៃប្រទេសទាំងពីរ ខ្ញុំគិតថាប្រសិនជាឥណ្ឌូណេស៊ីមានបំណងអញ្ចឹងគឺយើងស្វាគមន៍ យើងនឹងធ្វើកិច្ចការនេះរវាងវិស័យឯកជន និងវិស័យឯកជនដើម្បីធ្វើយ៉ាងមិចឲ្យមានការនាំចេញបាន» ។
លោក Sudirman Haseng ឯកអគ្គរដ្ឋទូតវិសាមញ្ញ និងពេញសមត្ថភាពថ្មីនៃសាធារណរដ្ឋឥណ្ឌូនេស៊ីប្រចាំនៅកម្ពុជា បានយល់ស្របចំពោះការលើកឡើងនេះ ដោយគូសបញ្ជាក់ថា ឥណ្ឌូនេស៊ីមានបំណងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិស័យអាទិភាពផ្សេងទៀតជាមួយកម្ពុជា ហើយនៅសប្តាហ៍ក្រោយ ក្រសួងពាណិជ្ជកម្មឥណ្ឌូនេស៊ី នឹងសម្របសម្រួលដំណើរទស្សនកិច្ចរបស់ប្រតិភូធុរជនកម្ពុជា ដែលស្វែងរកឱកាសអាជីវកម្មនៅទីក្រុង Bandung នៃខេត្តចាវ៉ាខាងលិច។
លោកបន្ថែមថា រដ្ឋាភិបាលឥណ្ឌូនេស៊ី កំពុងពិចារណាទិញអង្ករ និងផលិតផលកសិកម្មមួយចំនួនទៀតពីកម្ពុជា និងបានជំរុញពាណិជ្ជករឥណ្ឌូនេស៊ី ចូលរួមព្រឹត្តិការណ៍ពិពរ័ណ៍ភូមិ១ ផលិតផល១ ដែលគ្រោងនឹងរៀបចំនៅរាជធានីភ្នំពេញនៃប្រទេសកម្ពុជា ចាប់ពីថ្ងៃទី០៨ ដល់ថ្ងៃទី១១ ខែធ្នូខាងមុខ ដើម្បីជំរុញកិច្ចសហការ និងកាត់បន្ថយឱនភាពទំហំពាណិជ្ជកម្មទ្វេភាគីឲ្យបានអតិបរមា។
បើតាមក្រសួងពាណិជ្ជកម្ម ក្នុងឆ្នាំ២០១៧ទំហំពាណិជ្ជកម្មកម្ពុជា និងឥណ្ឌូណេស៊ីក្នុងឆ្នាំ២០១៧ មានទំហំ៥៣៩លានដុល្លារអាមេរិក កើនឡើងជាង ២០% បើធៀបនឹងឆ្នាំ២០១៦ ក្នុងនោះ ការនាំចេញរបស់កម្ពុជា ទៅឥណ្ឌូណេស៊ីមានទឹកប្រាក់ ២៦លានដុល្លារអាមេរិក និងនាំចូលពីឥណ្ឌូណេស៊ីមានចំនួន ៥១៤លានដុល្លារ៕
