ក្រុងអ៊ីស្តមប៊ូល: ប្រទេសតួកគីគ្រោងនឹងភ្ជាប់ជើងហោះហើរដឹកអ្នកដំណើរមកប្រទេសកម្ពុជាក្នុងពេលឆាប់ខាងមុខនេះ ខណៈតួកគីជាគោលដៅទេសចរណ៍ដ៏សំខាន់របស់ពិភពលោក ដោយឆ្នាំ២០១៧ តួកគីមានប្រជាជនធ្វើដំណើរទេសចរចេញក្រៅប្រទេស ចំនួន ១៤.៥លាននាក់។
ការបង្ហាញនេះ ក្នុងពិធីចុះហត្តលេខា លើកិច្ចព្រមព្រាងស្តីពីកិច្ចសហប្រត្តិបត្តិការណ៍វិស័យទេសចរណ៍រវាងព្រះរាជាណាចក្រកម្ពុជានិងសាធារណរដ្ឋតួកគី នៅទីក្រុងអ៊ីស្តមប៊ូល (តួកគី)កាលពីថ្ងៃទី ២២ តុលា ២០១៨ដោយ លោក ថោង ខុន រដ្ឋមន្ត្រីក្រសួងទេសចរណ៍ និងលោក Mevlut Cavsoglu រដ្ឋមន្ត្រីការបរទេសតួកគី ក្រោមអធិបតីរបស់សម្តេចនាយករដ្ឋមន្ត្រី ហ៊ុន សែន និងឯកឧត្តម Erdogan ប្រធានាធិបតីតួកគី។
តួកគីមានប្រជាជនប្រមាណ ៨០លាននាក់ ដោយក្នុងឆ្នាំ២០១៧ មានប្រជាជនធ្វើដំណើរទេសចរចេញក្រៅប្រទេសចំនួន ១៤.៥លាននាក់ ភាគច្រើនធ្វើដំណើរទៅកាន់អឹរ៉ុប និងអាស៊ី (ដែលភាគច្រើនមកសិង្ហបូរី និងថៃ) ក្នុងឆ្នាំ២០១៧ ទេសចរតួកគីមកកម្ពុជាមាន ៨៥០០នាក់ក្នុងកំនើន ២២.៧%។ ឆ្នាំ២០១៧ តួកគីទាក់ទាញបានភ្ញៀវទេសចរអន្តរជាតិមកទស្សនាជាង ៣២.៤១លាននាក់ ក្នុងកំណើន ២៧,៨៤% ជាមួយនឹងចំណូលប្រមាណ ២៧ពាន់លានដុល្លារអាមេរិក។
ក្នុងរយៈពេល៨ខែ ដើមឆ្នាំ២០១៨ តួកគីទទួលបានទេសចរអន្តរជាតិជាង ២២លាននាក់ នៅឆ្នាំ ២០២៣ តួកគីរំពឹងថា នឹងទទួលបានទេសចរអន្តរជាតិប្រមាណ ៥០លាននាក់ និងមានចំណូលប្រមាណ៥០ពាន់លានដុល្លារអាមេរិកពីទេសចរណ៍។ ទេសចរអន្តរជាតិចូលមកទស្សនាតួកគី ភាគច្រើនគឺ រុស្សី អាល្លឹម៉ង់ អង់គ្លេស ហ្សកហ្សា និងប្រជាជនតួកគីនៅក្រៅប្រទេសប្រមាណ១៦%។
បច្ចុប្បន្ន Turkish airlines បានភ្ជាប់ជើងហោះហើរត្រង់ពីទីក្រុងអ៊ីស្តមប៊ុលមកកាន់តំបន់អាស៊ានភាគច្រើនតាមរយៈជើងហោះហើរមកម៉ាឡេស៊ី (រយៈពេល ១០ម៉ោង៣៥នាទី) មកបាកកក (រយៈពេល ០៩ម៉ោង៤៥នាទី)មកសិង្ហបុរី (រយៈពេល១១ម៉ោង) មកហូជីមីញ(រយៈពេល១១ម៉ោង)។ បច្ចប្បន្នមន្ត្រីរាជការកម្ពុជា កាន់លិខិតឆ្លងដែនធ្វើដំណើរទៅតួកគីមិនតម្រូវឲ្យមានទិដ្ឋាការទេ (ដូចគ្នាទៅនឹងប្រទេសចិន ជប៉ុន កូរ៉េ)។
កិច្ចព្រមព្រៀងស្តីពីកិច្ចសហប្រតិបត្តិការទេសចរណ៍កម្ពុជា និងតួកគី ដែលបានចុះហត្ថលេខា នារសៀលថ្ងៃទី២២ ខែតុលា ឆ្នាំ២០១៨ នៅវិមានរដ្ឋាភិបាល ( Istanbul )កន្លងមកនេះ បានគូសបញ្ជាក់ច្បាស់ពីការសម្របសម្រួលការធ្វើដំណើរ និងជំរុញការតភ្ជាប់តាមផ្លូវអាកាស ការសិក្សាទីផ្សារ និងផ្សព្វផ្សាយរួមគ្នា ការផ្លាស់ប្តូរព័ត៌មាន ទិន្នន័យ ស្ថិតិ និងឯកសារគោលនយោបាយ ច្បាប់ទេសចរណ៍ ការអភិវឌ្ឍមូលធនមនុស្ស និងការបណ្តុះបណ្តាលជំនាញវីជ្ជាជីវៈទេសចរណ៍ ការផ្លាស់ប្តូរទស្សនកិច្ចរវាងផ្នែកសាធារណៈ និងឯកជនក្នុងវិស័យទេសចរណ៍ដើម្បីបង្កើតបណ្តាញធុរកិច្ចទេសចរណ៍ និងគំរោងវិនិយោគទេសចរណ៍ និងចូលរួមរាល់ព្រឹត្តិការណ៍ សិក្ខាសាលា សន្និសីទ និងកិច្ចប្រជុំនានាទៅវិញទៅមក។
ក្រោយការចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការទេសចរណ៍នេះ និងកិច្ចព្រមព្រៀងស្តីពីការមិនយកពន្ធត្រួតគ្នារវាងគ្នានោះ កម្ពុជាសង្ឃឹមថា នឹងបានទទួលក្រុមហ៊ុន Turkish Airlines ហោះហើរត្រង់ពីតួកគីមកកម្ពុជា នៅពេលដ៏ខ្លីខាងមុខនេះ។ បច្ចុប្បន្នក្រុមហ៊ុន Turkey Airlines បានធ្វើការហោះហើរត្រង់មកកម្ពុជា ប្រចាំសប្តាហ៍ក្នុងលក្ខណៈជា Cargo។
គួររំលឹកថា តួកគី និងកម្ពុជាបានភ្ជាប់ទំនាក់ទំនងនយោបាយការទូតតាំងពីឆ្នាំ១៩៦៨មកម្ល៉េះ ហើយបានភ្ជាប់លើទំនាក់ទំនងនយោបាយការទូតឡើងវិញនៅថ្ងៃទី១៤ ខែមិថុនា ឆ្នាំ១៩។ នៅថ្ងៃទី០១ ខែវិច្ឆិកាឆ្នាំ២០១៣ សាធារណរដ្ឋតួកគីបានបើកស្ថានឯកអគ្គរដ្ឋទូតរបស់ខ្លួននៅរាជធានីភ្នំពេញ៕
ហៃ សិរី
