ក្រុងហ្សឺណែវ: កន្លងមកកម្ពុជាបានដើរតួនាទីជាប្រទេសសម្របសម្រួលក្រុមប្រទេសដែលមានការអភិវឌ្ឍតិចតួច កាលពីឆ្នាំ ២០១៧-២០១៨ និងដល់ឆ្នាំ២០២០ កម្ពុជាស្ថិតនៅក្នុងយន្តការត្រីភាគីនៃក្របខណ្ឌអង្គការពាណិជ្ជកម្មពិភពលោក (WTO) ដោយសង្ឃឹមថា នឹងបន្តទទួលបានជំនួយពី WTO បន្ថែមទៀត។
ការបង្ហាញនេះ បន្ទាប់ពីសម្តេចនាយករដ្ឋមន្ត្រី ហ៊ុន សែន បានជួបពិភាក្សាការងារជាមួយលោក Robeto Cavatho Azevedo អគ្គនាយកអង្គការពាណិជ្ជកម្មពិភពលោក កាលពីថ្ងៃ២២ តុលានេះ។
ក្នុងជំនួបពិភាក្សាលោក Robeto Cavatho Azevedo បានមានប្រសាសន៍ថា កម្ពុជាជាប្រទេសដែលមានការអភិវឌ្ឍតិចតួច ប៉ុន្តែជាប្រទេសមួយបានក្លាយជាសមាជិករបស់អង្គការពាណិជ្ជកម្មពិភពលោក (WTO) ដែលបានអនុវត្តដោយជោគជ័យ ក្នុងចំណោមប្រទេសមានសេដ្ឋកិច្ចលូតលាស់លឿនបំផុតនៅក្នុងពិភពលោក។
លោកអគ្គនាយកសង្ឃឹមថា ទស្សនកិច្ចរបស់សម្តេចមកកាន់ទីក្រុងហ្សឺណែវ ពិសេសមកកាន់ទីស្នាក់ការណ្តាលរបស់ WTO នៅពេលនេះ គឺមិនមែនជាលើកចុងក្រោយនោះទេ។ កិច្ចសហការវាងកម្ពុជាជាមួយនឹងអង្គការពាណិជ្ជកម្មពិភពលោកនឹងមានកិច្ចសហប្រតិបត្តិការកាន់តែល្អប្រសើរឡើង ពិសេសសេដ្ឋកិច្ចរបស់កម្ពុជានឹងទទួលបានការអភិវឌ្ឍ និងមានកិច្ចសហប្រតិបត្តិការល្អជាមួយប្រទេសដទៃទៀតរួមទាំង WTOផងដែរ។
កម្ពុជាមានលក្ខណៈសកម្មរបស់ខ្លួន ពោលក្នុងរយៈពេល១៤ឆ្នាំកន្លងមក ថ្វីត្បិតបើប្រៀបធៀបជាមួយប្រទេសដទៃទៀតនោះ កម្ពុជាមានលក្ខណៈសម្បត្តិគ្រប់គ្រាន់ និងជាប្រទេសទី១ ដែលបានចាត់តាំងឲ្យមានតំណាងអចិន្រៃ្តយ៍ពាណិជ្ជកម្មរបស់ខ្លួនប្រចាំ WTO។
លោកអគ្គនាយកបន្តថា បច្ចុប្បន្ននេះ កម្ពុជាមិនមែនស្ថិតនៅក្រៅប្រព័ន្ធនោះទេ ពោលគឺកម្ពុជាស្ថិតនៅក្នុងប្រព័ន្ធ WTO ដែលកម្ពុជាបានស្វែងយល់ និងចាប់យកឱកាសបានច្រើន។ កម្ពុជាចាប់យកជំនួយបច្ចេកទេសពី WTO ដែលចំណាយទៅលើការជួយដល់កម្ពុជាមានទឹកប្រាក់ប្រមាណ ៧,៧លានដុល្លា ចន្លោះពីឆ្នាំ២០១០ ដល់ឆ្នាំ២០១៨ ហើយ ក្នុងរយៈពេល៤ឆ្នាំចុងក្រោយនៃការកសាងសមត្ថភាពមន្ត្រីមានចំនួនរហូតដល់ ៤១១នាក់ ជាមន្ត្រីរបស់រាជរដ្ឋាភិបាលកម្ពុជា ដែលបានធ្វើការបណ្តុះបណ្តាលនៅគ្រប់សកម្មភាពរបស់ WTO។
សម្តេចនាយករដ្ឋមន្ត្រី ហ៊ុន សែន មានប្រសាសន៍ថា កម្ពុជាបានចូលជាសមាជិករបស់ WTO រយៈពេល១៤ឆ្នាំរួចមកហើយ ក្នុងរយៈពេលនេះ សម្តេចសូមអរគុណចំពោះ WTO សម្រាប់កិច្ចសហប្រតិបត្តិការទាំងអស់ដែលបានផ្តល់ជូនដល់ប្រទេសកម្ពុជា។
សម្តេចបន្តថា កន្លងមកកម្ពុជាបានដើរតួនាទីជាប្រទេសសម្របសម្រួលកាលពីឆ្នាំ២០១៧ ហើយនៅឆ្នាំ២០១៨ ដល់ឆ្នាំ២០២០ កម្ពុជាស្ថិតនៅក្នុងយន្តការត្រីភាគីក្របខណ្ឌ WTO ដោយសង្ឃឹមថា កម្ពុជានឹងបន្តទទួលបានជំនួយពី WTO។ សម្តេចបន្តថា កន្លងមកកម្ពុជាបានបើកស្ថានបេសកកម្មរបស់ខ្លួនប្រចាំនៅ WTO បើទោះបីជាខ្លួនស្ថិតក្នុងសេដ្ឋកិច្ចមួយដែលមានភាពទន់ខ្សោយពិតមែន តែកម្ពុជាជំនះក្នុងការដាក់ឲ្យមានស្ថានឯកអគ្គរាជទូតពាណិជ្ជកម្មនៅហ្សឺណែវ ដើម្បីជួយសម្រួលការងាររវាងកម្ពុជានិង WTO៕
ហៃ សិរី
