ភ្នំពេញ: ធនាគារជាតិនៃកម្ពុជា កាលពីថ្ងៃទី២៥ តុលានេះបានបង្ហាញការគាំទ្រចំពោះការប្រើប្រាស់ប្រាក់យ៉ន់របស់ប្រទេសចិននៅលើទីផ្សារកម្ពុជា តាមរយៈប្រព័ន្ធធនាគារ ដើម្បីសម្រួលដល់ពាណិជ្ជកម្មទ្វេភាគី ការវិនិយោគ និងទេសចរណ៍ជាដើម។
ការបង្ហាញនេះ លោក ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជាបានចូលរួមជាអធិបតីបើកវេទិកាស្តីពី រូបិយប័ណ្ណយ៉ន់នៅកម្ពុជា ដែលត្រូវបានរៀបចំឡើងដោយ ធនាគារចិនសាខាភ្នំពេញ (BOC) រាជធានីភ្នំពេញ ដែលមានគោលបំណងបង្ហាញ និងពិភាក្សាអំពីការប្រើប្រាស់ប្រាក់យ៉ន់នៅក្នុងតំបន់អាស៊ាន និងកម្ពុជា ព្រមទាំងអត្ថប្រយោជន៍នៃប្រាក់យ៉ន់ចំពោះសេដ្ឋកិច្ច។
បើតាមគេហទំព័រហ្វេសប៊ុករបស់ធនាគារជាតិនៃកម្ពុជាបានឲ្យដឹងការពីថ្ងៃទី ២៥ តុលានេះថា ស្របតាមគោលនយោបាយរបស់រាជរដ្ឋាភិបាលកម្ពុជា និងទំនាក់ទំនងកើនឡើងផ្នែកសេដ្ឋកិច្ចនិងហិរញ្ញវត្ថុរវាងប្រទេសចិននិងកម្ពុជា លោកទេសាភិបាលរងបានបង្ហាញការគាំទ្ររបស់ធនាគារជាតិនៃកម្ពុជាក្នុងការប្រើប្រាស់ប្រាក់យ៉ន់តាមរយៈប្រព័ន្ធធនាគារ ដើម្បីសម្រួលដល់ពាណិជ្ជកម្មទ្វេភាគី ការវិនិយោគ និងទេសចរណ៍ជាដើម ឱ្យកាន់តែមានប្រសិទ្ធភាព។
លោក ស៊ុំ សន្និសិទ្ធ បានគូសបញ្ជាក់ថា កន្លងមកធនាគារជាតិនៃកម្ពុជាបានអនុញ្ញាតឱ្យធនាគារប្រទេសចិនពីរ ធ្វើជាធនាគារផាត់ទាត់ប្រាក់យ៉ន់ គឺធនាគារ BOC និងធនាគារ ICBC និងធនាគារពាណិជ្ជនៅកម្ពុជា ១៣ ផ្សេងទៀតធ្វើប្រតិបត្តិការជាប្រាក់យ៉ន់ ហើយតាមរយៈនេះ វិនិយោគិន ពាណិជ្ជករ និងអ្នកទទួលចំណូលជាប្រាក់យ៉ន់ អាចទូទាត់ ខ្ចី និងដាក់ប្រាក់បញ្ញើជាប្រាក់យ៉ន់ ក្នុងប្រព័ន្ធធនាគារ ដែលអនុញ្ញាតឱ្យធនាគារជាតិនៃកម្ពុជា អាចគ្រប់គ្រងចរាចរប្រាក់យ៉ន់បានល្អប្រសើរ និងរួមចំណែកជំរុញកំណើនពាណិជ្ជកម្ម ការវិនិយោគ និងទេសចរណ៍មកពីប្រទេសចិន៕
ហៃ សិរី
