ហៃ សិរី
ទីក្រុងហ្សឺណែវ៖ កម្ពុជាមានលំហូរ Foreign Direct Investment (FDI) បានកើនឡើង ១២% ពី ២,៤៧ ប៊ីលាន ទៅ ២,៧៨ ប៊ីលានដុល្លារអាមេរិក នៅឆ្នាំ២០១៧ ដែលទទួលបានតាមរយៈការវិនិយោគក្នុងវិស័យហិរញ្ញវត្ថុ ទូរគមនាគមន៍ អចលនទ្រព្យ និងកម្មន្តសាលមិនមែនវាយនភ័ណ្ឌ។ នេះបើតាមលោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានថ្លែងកាលពីថ្ងៃទី ២៥ តុលានេះ។
ការថ្លែងនេះ ក្នុងអំឡុងពេលលោករដ្ឋមន្ត្រីបានចូលរួមវេទិកាតុមូលថ្នាក់រដ្ឋមន្ត្រីស្ដីពី ការរៀបចំគោលនយោបាយវិនិយោគសកលក្នុងសតវត្សទី២១ ដែលរៀបចំឡើងក្នុងអំឡុងពេលនៃវេទិកាវិនិយោគពិភពលោក ២០១៨ នៅទីក្រុងហ្សឺណែវ ប្រទេសស្វីស ដោយអញ្ជើញចូលរួមដោយរដ្ឋមន្ត្រី-អនុរដ្ឋមន្ត្រីមកពីប្រទេសចំនួន១។
តាមគេហទំព័រហ្វេសប៊ុករបស់ក្រសួងពាណិជ្ជកម្មកាលពីថ្ងៃទី ២៦ តុលានេះបានបង្ហាញថា លោករដ្ឋមន្ត្រីបានលើកឡើងក្នុងអង្គប្រជុំថា តាមការវិភាគរបស់ UNCTAD ឃើញថាលំហូរ FDI នៅលើពិភពលោកបានធ្លាក់ចុះគួរ ឱ្យកត់សម្គាល់ក្នុងឆ្នាំ២០១៧ សម្រាប់កម្ពុជា លំហូរ FDI បានកើនឡើង ១២% ពី ២,៤៧ ប៊ីលាន ទៅ ២,៧៨ ប៊ីលានដុល្លារអាមេរិក នៅឆ្នាំ២០១៧ ដែលទទួលបានតាមរយៈការវិនិយោគក្នុងវិស័យហិរញ្ញវត្ថុ ទូរគមនាគមន៍ អចលនទ្រព្យ និងកម្មន្តសាលមិនមែនវាយនភ័ណ្ឌ។
លោកបន្តថា កម្ពុជាបានកំណត់រួចជាស្រេចនូវគោលនយោបាយទាក់ទាញការវិនិយោគ ដើម្បីគាំទ្រការអភិវឌ្ឍដោយចីរភាពរួមមាន (១) គោលនយោបាយអភិវឌ្ឍន៍ឧស្សាហកម្ម ២០១៥-២០២៥ (២) ក្របខ័ណ្ឌច្បាប់ និងបទបញ្ញត្តិសម្រាប់សម្របសម្រួល ដែលគាំទ្រ និងការពារការវិនិយោគបរទេស (៣) ប្រែក្លាយពលកម្មពីពលកម្មមិនមានជំនាញ មកជាពលកម្មមានជំនាញ។
លើសពីនេះ កម្ពុជាបានចូលរួមយ៉ាងសកម្មក្នុងការរៀបចំគោលនយោបាយវិនិយោគក្របខ័ណ្ឌសកលលោក និងតំបន់ដូចជា ASEAN Comprehensive Investment Agreement (ACIA), ជំពូកស្ដីពីវិនិយោគនៅក្នុង ASEAN Free Trade Agreement និង RCEP។
លោកបន្ថែមថា តាមរយៈបទពិសោធន៍ និងមេរៀនថ្មីៗដែលទទួលបាន កម្ពុជាបានរៀបចំគោលនយោបាយលើកទឹកចិត្ត ដែលមានភាពប្រទាក់ក្រឡា និងបើកទូលាយ ជាពិសេសតាមរយៈការរៀបចំតំបន់សេដ្ឋកិច្ចពិសេស ដើម្បីទាក់ទាញវិនិយោគិន។ ការធ្វើសមាហរណកម្មក្នុងខ្សែសង្វាក់ផលិតកម្មក្នុងតំបន់ ដោយផ្ដោតលើការបង្កើតរោងចក្រ និងទទួលបានផលប្រយោជន៍ពីមូលដ្ឋានផលិតកម្មធំៗក្នុងតំបន់ សំដៅការអភិវឌ្ឍសមត្ថភាពតាមរយៈការផ្ទេរចំណេះដឹង និងបច្ចេកវិទ្យា។
កម្ពុជាបានរៀបចំផែនការជាក់លាក់ក្នុងការសម្រេចបាននូវគោលដៅ SDGs របស់ខ្លួន ដោយផ្ដោតលើការបណ្ដុះបណ្ដាលធនធានមនុស្ស ពិពិធកម្មសេដ្ឋកិច្ច ជំរុញការអភិវឌ្ឍវិស័យឯកជន និងទីផ្សារការងារ និងការអភិវឌ្ឍប្រកបដោយបរិយាប័ន្ន និងចីរភាព៕
