ហៃ សិរី
ភ្នំពេញ៖ រដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្តិ បានស្នើតំណាងក្រុមហ៊ុន Chevron Cambodia បិទផ្សាយសារអប់រំខ្លីៗ នៅតាមស្ថានីយចាក់ប្រេងឥន្ធនៈកាល់តិចទូទាំងប្រទេសកម្ពុជា ដើម្បីលើកកម្ពស់សុវត្ថិភាពផ្លូវថ្នល់ និងកាត់បន្ថយគ្រោះថ្នាក់ចរាចរណ៍ដែលកំពុងមានការកើនឡើងឥតឈប់ឈររៀងរាល់ឆ្នាំ។
សំណើនេះ បានធ្វើឡើងនៅក្នុងជំនួបពិភាក្សាការងារជាមួយប្រតិភូក្រុមហ៊ុន Chevron Cambodia ដឹកនាំដោយលោក Shahid Amed នាយកគ្រប់គ្រងប្រចាំប្រទេសកម្ពុជា ម៉ាឡេស៊ី និងសិង្ហបុរី កាលពីថ្ងៃសុក្រ ទី០២ ខែវិច្ឆិកានេះ នៅទីស្តីការក្រសួងពាណិជ្ជកម្ម ដើម្បីស្វែងរកដំណោះស្រាយទាក់ទងយន្តការកំណត់តម្លៃប្រេងនៅកម្ពុជា។
នៅក្នុងឱកាសនោះ លោក ប៉ាន សូរស័ក្តិ បានលើកឡើងពីមូលហេតុដែលនាំឱ្យមានគ្រោះថ្នាក់ចរាចរណ៍ និងផលប៉ះពាល់ទៅលើកំណើនសេដ្ឋកិច្ច និងបានស្នើសុំក្រុមហ៊ុន Chevron Cambodia ចូលរួមបិទផ្សាយសារអប់រំខ្លីៗ នៅតាមបណ្តាស្ថានីយចាក់ប្រេងកាល់តិច ដើម្បីបញ្ជ្រាបការយល់ដឹងរបស់ប្រជាពលរដ្ឋទាក់ទងបញ្ហាសុវត្ថិភាពផ្លូវថ្នល់ និងហានិភ័យចំពោះការអភិវឌ្ឍសង្គម។
លោកបន្តថា៖«ក្រៅពីបង្កប់សារអប់រំនៅតាមស្ថានីយ បុគ្គលិកក្រុមហ៊ុនកាល់តិច អាចរម្លឹកអតិថិជនដែលចូលមកចាក់សាំងថែមទៀត ធ្វើដូចនេះបង្ហាញពីការទទួលខុសត្រូវ និងការគិតគូរយកចិត្តទុកដាក់របស់ក្រុមហ៊ុន ទៅលើសុវត្ថិភាពអតិថិជន និងសុវត្ថិភាពផ្លូវថ្នល់ ហើយកាល់តិចនឹងទទួលបានការគាំទ្រកាន់តែច្រើន»។
ទាក់ទងបញ្ហាតម្លៃប្រេង លោករដ្ឋមន្ត្រីបានគូសបញ្ជាក់ថា កម្ពុជាប្រកាន់របបសេដ្ឋកិច្ចទីផ្សារសេរី និងបើកចំហរ ដូច្នេះពុំមានការកំណត់តម្លៃលើទំនិញ និងសេវាកម្មឡើយ ហើយចំណុចនេះ បានចែងច្បាស់នៅក្នុងគោលនយោបាយគាំពារវិនិយោគរបស់កម្ពុជា។
ជាការឆ្លើយតប លោក Shahid Amed បានឯកភាព និងថ្លែងអំណរគុណរដ្ឋមន្ត្រី ដែលបានចែករំលែកអនុសាសន៍ល្អៗ ដើម្បីបង្កើនប្រជាប្រិយភាពរបស់ប្រេងឥន្ធនៈកាល់តិច។ លោកនាយកក្រុមហ៊ុនរូបនេះ ក៏បានសន្យាដាក់បញ្ចូលគំនិតរបស់រដ្ឋមន្ត្រី ទៅក្នុងកម្មវិធីទទួលខុសត្រូវផ្នែកសង្គម (CSR) និងយុទ្ធនាការផ្សព្វផ្សាយនានា ដើម្បីចូលរួមកាត់បន្ថយគ្រោះថ្នាក់ចរាចរណ៍នៅកម្ពុជា។
ទន្ទឹមគ្នានេះ លោក បានសន្យានាំមកជូនប្រជាពលរដ្ឋកម្ពុជាផលិតផលប្រេងឥន្ធនៈ ដែលមានគុណភាពលំដាប់ពិភពលោក និងហេដ្ឋារចនាសម្ព័ន្ធរូបវន្តទំនើបៗ រួមជាមួយឱកាសការងារថ្មីៗ ដើម្បីលើកស្ទួយវិស័យឧស្សាហកម្ម និងកំណើនសេដ្ឋកិច្ចរបស់កម្ពុជា៕
