ភ្នំពេញ៖ ក្រុមហ៊ុន វេសឡាញ អីធ្យូខេសិនគ្រុប(Westline Education Group)ដែលកំពុងវិនិយោគលើសាលាចំណេះដឹងទូទៅហៅថា Westline ត្រូវបានក្រុមហ៊ុនអប់រំធំពីរមកពីក្រៅប្រទេសបានចចារ និងចង់ទិញភាគហ៊ុន ៧០ភាគរយពីសាលា វេសឡាញ ប៉ុន្ដែអគ្គនាយកក្រុមហ៊ុន វេសឡាញ បានបដិសេធការលក់ភាគហ៊ុនសាលាឲ្យទៅអ្នកផ្សេងវិញ។
លោក ប៉ិច ប៉ូឡែន អគ្គនាយកក្រុមហ៊ុន វេសឡាញ អីធ្យូខេសិនគ្រុប(Westline Education Group)ដែលវិនិយោគលើសាលាចំណេះដឹងទូទៅ Westline បានបញ្ជាក់តាមរយៈគេហទំព័រហ្វេសប៊ុករបស់ខ្លួនថា អំឡុងពេលចុងឆ្នាំ២០១៩ និងដើមឆ្នាំ២០២០នេះ រហូតដល់អំឡុងពេលកូវីដ១៩ក៏ដោយ ក្រុមហ៊ុនអប់រំធំពីរមកពីក្រៅប្រទេសបានចចារ និងចង់ទិញភាគហ៊ុន៧០ភាគរយពីក្រុមហ៊ុន Westline Education Group Co., Ltd. ក្នុងតម្លៃខ្ពស់មួយសម្រាប់លោក និងម្ចាស់ភាគហ៊ុនទាំងអស់។
លោកបញ្ជាក់ថា៖ «បើយើងលក់ ខ្ញុំនិងម្ចាស់ភាគហ៊ុនកម្ពុជានឹងទទួលបានប្រាក់រាប់លានដុល្លារ ទទួលបានផលត្រលប់សងគុណនឹង ១៥ទៅ ២០ដងនៃប្រាក់វិនិយោគក្នុងអំឡុងពេល ១២ឆ្នាំនេះ តែយើងសម្រេចចិត្តមិនលក់ក្នុងពេលនេះ ពីព្រោះយើងចង់រក្សាអភិវឌ្ឍប្រព័ន្ធអប់រំមួយនេះឲ្យនៅជារបស់ប្រជាជនកម្ពុជា ដើម្បីប្រជាជនកម្ពុជា រក្សាគុណតម្លៃស្នូលនៃកម្មវិធីអប់រំជាតិ។
លោកបន្ថែមថា៖«វាក៏ជាគម្រូនៃសាលារៀនឯកជនមួយចំនួនដែលចង់រៀនសូត្រពីយើង និងជាពិសេសសយើងចង់ឲ្យបុគ្គលិក គ្រូបង្រៀន និងអ្នកអាណាព្យាបាលរបស់យើងទាំងអស់អាចក្លាយជាម្ចាស់ភាគហ៊ុនរបស់បណ្តាញសាលារៀន និងក្រុមហ៊ុនយើងសិន»។
គួររំឭកថា បច្ចុប្បន្នក្រុមហ៊ុន Westline Education Group មានសាខាចំនួន១៦ស្ថិតនៅក្រោមការរបស់ខ្លួន ក្នុងនោះមាន ១៣សាខា ជាសាលារៀនដែលមានសាលារៀន Westline ចំនួន ១០សាខា សាលារៀន Northline ចំនួន១សាខា សាលាអន្តរជាតិ Forest hill ចំនួន១សាខា និងសាលារៀនអន្តរជាតិ Appletree ចំនួន១សាខា។ ដោយឡែក ៣សាខាទៀតមានជាមជ្ឈមណ្ឌលបណ្តុះបណ្តាល៕
