ភ្នំពេញ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន កាលពីថ្ងៃទី១២ វិច្ឆិកានេះស្នើដល់នាយកប្រតិបត្តិធនាគារអភិវឌ្ឍន៍អាស៊ី (ADB) ប្រចាំប្រទេសកម្ពុជាជួយរកវិធានការនានា ដើម្បីទប់ស្កាត់ផលប៉ះពាល់លើផលិតកម្មដំឡូងមី ដោយសារជំងឺម៉ូសាអ៊ិកដំឡូងមី និងផែនការគ្រប់គ្រងជំងឺ។
ការស្នើសុំនេះ នៅទីស្តីការក្រសួងកសិកម្ម លោក វេង សាខុន បានអនុញ្ញាតឱ្យលោកស្រី Sunniya Durrani-Jamal នាយកប្រតិបត្តិធនាគារអភិវឌ្ឍន៍អាស៊ី (ADB) ប្រចាំព្រះរាជាណាចក្រកម្ពុជា និងសហការីចូលជួបសម្តែងការគួរសម។
ក្នុងជំនួបនេះ លោករដ្ឋមន្ត្រីបានសុំឲ្យលោកស្រីពិនិត្យលទ្ធភាព និងពិចារណាក្នុងការផ្តល់កិច្ចសហប្រតិបត្តិការលើវិធានការនានាដែលត្រូវឆ្លើយតបទៅនឹងការប្រែប្រួលអាកាសធាតុលើវិស័យកសិកម្ម។ ពិនិត្យ និងធ្វើការសិក្សាពីការរៀបចំធ្វើផែនទីកំណត់តំបន់ដាំដុះ។ ជួយក្នុងវិធានការនានាដែលឈានដល់ការទប់ស្កាត់ផលប៉ះពាល់លើផលិតកម្មដំឡូងមី ដោយសារជំងឺម៉ូសាអ៊ិកដំឡូងមី និងផែនការគ្រប់គ្រងជំងឺ។
ជួយរិះរកវិធានការនានា ដែលឈានទៅដល់ការសហការបានពេញលេញពីស្ថាប័នពាក់ព័ន្ធក្នុងការធ្វើកសិកម្មឱ្យទទួលបានទិន្នផលខ្ពស់ និងកាត់បន្ថយការចំណាយឱ្យបានជាអតិប្បរមា លើការងារគ្រប់គ្រងទឹកនិងដំណាំ។ និងផលិតភាពផលិតកម្ម និងទីផ្សារកសិផលរបស់ប្រជាកសិករ និងសហគមន៍។
ក្នុងជំនួបនេះ លោកស្រី Sunniya Durrani-Jamal បានកោតសរសើរចំពោះការវិវឌ្ឍរីកចម្រើនលើគ្រប់វិស័យ ពិសេសវិស័យកសិកម្មដែលជាចលករមួយដ៏សំខាន់ជួយគាំទ្រប្រាក់ចំណូលក្នុងគ្រួសារ និងជំរុញកំណើនសេដ្ឋកិច្ចជាតិ ដែលរាជរដ្ឋាភិបាលសម្រេចបាននាឆ្នាំកន្លងមក។
លោកស្រីក៏បានបញ្ជាក់ថា វិស័យកសិកម្មគឺជាវិស័យមួយដែលធនាគារអភិវឌ្ឍន៍អាស៊ីផ្តល់អាទិភាពខ្ពស់ ដោយបានដាក់បញ្ចូលនៅក្នុងគោលនយោបាយភាពជាដៃគូ រវាងប្រទេសកម្ពុជា និងធនាគារអភិវឌ្ឍន៍អាស៊ីសម្រាប់រយៈពេល ៥ឆ្នាំ។
ក្នុងឱកាសនៃការបំពេញបេសកកម្មនៅកម្ពុជា លោកស្រីបានសន្យាថា នឹងផ្តល់កិច្ចសហប្រតិបត្តិ និងបន្តការគាំទ្រឱ្យអស់លទ្ធភាពជាមួយក្រសួងកសិកម្ម ធ្វើយ៉ាងណារួមចំណែកអភិវឌ្ឍន៍វិស័យនេះឱ្យមានការរីកចម្រើន។
ជាការឆ្លើយតបលោកស្រីបានឯកភាពទាំងស្រុងនូវរាល់ចំណុចសំខាន់ៗដែលឯកឧត្តមរដ្ឋមន្ត្រីបានលើកឡើង និងទទួលយកចំណុចទាំងនោះទៅពិភាក្សាជាមួយក្រុមការងារជំនាញដើម្បីពិនិត្យលទ្ធភាពក្នុងការផ្តល់ការគាំទ្រ៕
ហៃ សិរី
