ភ្ញៀវទេសចរជិត៨.៥លាននាក់ធ្វើដំណើរតាមអាកាសយានដ្ឋានអន្ដរជាតិទាំង ០៣

ភ្នំពេញ៖ រដ្ឋមន្ត្រី​ទទួលបន្ទុក​រដ្ឋលេខាធិកា​រ នៃ​រដ្ឋលេខាធិការដ្ឋាន​អាកាសចរ​ស៊ីវិល​កម្ពុជា​លោក ម៉ៅ ហាវ​ណ្ណា​ល់ បាន​លើកឡើងថា រយៈពេល១០ខែ ឆ្នាំ២០១៨នេះ គិតពី​ខែមករា-តុលា​មាន​ភ្ញៀវទេសចរ​ឆ្លងកាត់​តាម​អាកាសយានដ្ឋាន​អន្ដរជាតិ​ទាំង៣ ជិត៨.៥លាន​នាក់ កើនឡើង​ចំនួន២១.៧% បើ​ធៀប​នឹង​រយៈ​ដូចគ្នា​ឆ្នាំ២០១៧ ដែលមាន​ត្រឹមតែ៧លាន​នាក់​ប៉ុណ្ណោះ។

ការលើកឡើង​នេះ ក្នុង​សិក្ខាសាលា​ស្ដីពី«ការតភ្ជាប់​ការហោះហើរ កាលានុវត្តភាព និង​ការ​ប្រឈម»ដែលមាន​ការចូលរួម​ពី​មន្ដ្រី​នៃ​ប្រទេស​កម្ពុជា ឡាវ ភូមា និង​ចិន នៅ​ថ្ងៃទី១៥ ខែវិច្ឆិកា ឆ្នាំ២០១៨នេះ។

ការរីកចម្រើន​របស់​អាកាសយានដ្ឋាន​របស់​កម្ពុជា​នេះ ទើប​អាកាសចរ​ស៊ីវិល​បាន​ប្រមូលផ្ដុំ​មន្ដ្រី​របស់​កម្ពុជា ឡាវ ភូមា និង​ចិន ចូលរួម​សិក្ខាសាលា​ស្ដីអំពី «ការតភ្ជាប់​ការហោះហើរ កាលានុវត្តភាព និង​ការ​ប្រឈម» ដោយ​សិក្ខាសាលា​នេះ ធ្វើឡើង ដើម្បី​សិក្សា​ពី​គម្រោង​លើកកម្ពស់​ការតភ្ជាប់រ​យៈ​ពេល១ឆ្នាំកន្លះ ក្រោម​ជំនួយ​ឧ​ប​ត្ត​ម​គាំទ្រ​របស់​ប្រទេស​ចិន។

លោក ម៉ៅ ហាវ​ណ្ណា​ល់ បញ្ជាក់ថា សម្រាប់​ចំនួន​ជើងហោះហើរ​ក្នុងឆ្នាំនេះ​មានការ​កើន បើ​ធៀប​នឹង​ឆ្នាំ២០១៧ ហើយ​ឆ្នាំ២០១៨ ជើងហោះហើរ​មាន​ចំនួន ៧២,៧៨៧ កើនឡើង២០% បៀ​ប​ធៀប​នឹង​ឆ្នាំ២០១៧ មាន​ត្រឹមតែ ៦០,៦៣៦ប៉ុណ្ណោះ ហើយ​ទំនិញ​វិញ ក៏មាន​ការកើនឡើង​ដែរ ឆ្នាំនេះ​មាន​ចំនួន ៥៥,៣២៤តោន កើនឡើង១៩% ខណៈ​ឆ្នាំ២០១៧មាន​ត្រឹមតែ៤៦,៦៧៥តោន។

លោក​បន្តថា គម្រោង​លើកកម្ពស់​ការតភ្ជាប់​ផ្លូវអាកាស​រវាង​ប្រទេស​កម្ពុជា ឡាវ ភូមា និង​ចិន​នេះ ធ្វើឡើង​ក្នុង​គោលបំណង​ជួយ​ដល់​ប្រទេស​ទាំង៣ ក្នុងការ​ត​ភា្ជ​ប់​ផ្លូវអាកាស​ឆ្ពោះទៅ ឬ​ត្រឡប់​មកពី​ប្រទេស​ចិន។ អាកាសយានដ្ឋាន​កម្ពុជា មាន​ការតភ្ជាប់​ជើងហោះហើរ ទៅកាន់​ទីក្រុង​នៃ​ប្រទេស​ចិន។

បច្ចុប្បន្ន​កម្ពុ​ជាមាន២៨គោលដៅ​ចេញពី​អាកាសយានដ្ឋាន​អន្ដរជាតិ​ទាំង៣ រួមមាន១៦គោលដៅ​ចេញពី អាកាសយានដ្ឋាន​សៀមរាប​ទៅ​ប្រទេស​ចិន ១២គោលដៅ​ចេញពី​អាកាសយានដ្ឋាន​អន្ដរជាតិ​ភ្នំពេញ និង១២គោលដៅ និង​ចេញពី​អាកាសយានដ្ឋាន​អន្ដរជាតិ​ព្រះសីហនុ សរុបមក​ជើងហោះហើរ​ចំនួន៣៤៣ជើង ក្នុង១សប្ដាហ៍ ដែល​ប្រតិបត្តិ​ដោយ​ក្រុមហ៊ុន​អាកាសរ​ច​ណ៍​ក្នុងស្រុក៦ និង​ក្រុមហ៊ុន​អាកាសចរណ៍​អន្ដរជាតិ​ចំនួន១០ គិត​ត្រឹម​ខែតុលា ឆ្នាំ២០១៨នេះ៕

ហៃ សិរី