សមាគមរោងចក្រកាត់ដេរកម្ពុជាឲ្យកម្មករបើកប្រាក់ខែតាមរយៈធនាគារអេស៊ីលីដា

ធនាគារ​អេស៊ីលីដា ភីអិលស៊ី (ACLEDA) នៅ​ថ្ងៃទី១៩ ខែវិច្ឆិកា​នេះ​បាន​ចុះហត្ថលេខា​លើ​កិច្ចព្រមព្រៀង​ជាមួយ​សមាគម​រោងចក្រ​កាត់ដេរ​នៅ​កម្ពុជា (GMAC) ដើម្បី​ប្រើប្រាស់​សេវា​បើកប្រាក់​បៀវត្សរ៍​ជូន​ដល់ក​ម្មករ និយោជិត​នៅតាម​រោងចក្រ សហគ្រាស ដើម្បី​ចូលរួម​ធានា​សុវត្ថិភាព និង​ការផ្ដល់សេវា​បាន​កាន់តែ​ល្អប្រសើរ។

ការចុះហត្ថលេខា​នេះ តាមរយៈ​លោក​បណ្ឌិត អ៊ិន ចាន់នី ប្រធាន​នាយក​ប្រតិបត្តិ​ធនាគារ​អេស៊ីលីដា ភីអិលស៊ី និង​លោក​ឧកញ៉ា វ៉ាន់ ស៊ូ​អៀង ប្រធាន​សមាគម​រោងចក្រ​កាត់ដេរ​នៅ​កម្ពុជា GMAC កាលពី​ថ្ងៃទី១៩ ខែវិច្ឆិកា​នេះ​នៅ​ទីស្នាក់ការ​កណ្ដាល​ធនាគា​រ​អេស៊ីលីដា ភីអិលស៊ី។

លោក​បណ្ឌិត អ៊ិន ចាន់នី ប្រធាន​នាយក​ប្រតិបត្តិ​ធនាគារ អេស៊ីលីដា ភីអិលស៊ី បាន​មានប្រសាសន៍ថា ការចាប់​ដៃគូ​សហ​ប្រតិ​ប​ត្ដិ​ការ​ជាមួយ​សមាគម​រោងចក្រ​កាត់ដេរ​នៅ​កម្ពុជា (GMAC) នេះ ដើម្បី​បម្រើសេវា​បើកប្រាក់​បៀវត្សរ៍​ជូន​ដល់ក​ម្មករ-កម្មការិនី​រោងចក្រ​កាត់ដេរ តាមរយៈ​សេវា​ធនាគារ អេស៊ីលីដា ភីអិលស៊ី ដោយ​បញ្ចូល​ទឹកប្រាក់​ក្នុង​គណនី​ប្រាក់បៀវត្សរ៍​របស់​កម្ម​ករ-កម្មការិនី​ដោយ​ប្រព័ន្ធ​អេឡិចត្រូនិក និង​ផ្តល់​ភាពងាយស្រួល​ឆាប់រហ័ស​មាន​សុវត្ថិភាព​ខ្ពស់​ចៀសវាង​នូវ​ហានិភ័យផ្សេងៗ និង​ចំណេញ​ពេលវេលា​ក្នុងការ​បើកប្រាក់​បៀវត្ស​រ៍​ដល់​បងប្អូន​កម្មក​រ-កម្មការិនី។

លោក​បណ្ឌិត​បាន​បន្ដថា តាមរយៈ​កិច្ចព្រមព្រៀង​នេះ ធនាគារ​នឹង​ផ្តល់​មធ្យោបាយ​បើកប្រាក់​បៀវត្សរ៍​ងាយស្រួល​ប្រកបដោយ​ប្រសិទ្ធភាព​ខ្ពស់​ដល់ក​ម្មករ-កម្មការិនី​នៃ​រោច​ក្រ​កាត់ដេរ​ដែលជា​សមាជិក​សមាគម​រោងចក្រ​កាត់ដេរ​នៅ​កម្ពុជា (GMAC)។

លោក​បណ្ឌិត​បាន​បន្ដថា កម្មករ-កម្មការិនី អាច​បើកប្រាក់​បៀវត្សរ៍​តាមរយៈ​អេស៊ីលីដា យូ​នី​ធី​ទាន់ ចិត្ត (ACLEDA Unity ToanChet) អេ​ធី​អឹម (ATM) គ្រប់ពេលវេលា ២៤ម៉ោង​ក្នុង១ថ្ងៃ និង ៧ថ្ងៃ​ក្នុង១ សប្តាហ៍ ឬ​បញ្ជរ​បេឡា​នៅតាម​ការិយាល័យ​សាខា​ធនាគារ អេស៊ីលីដា ភី​អិ​ល ស៊ី គ្រប់​ខេត្ត-ក្រុង​ទូទាំង​ព្រះរាជាណាចក្រ​កម្ពុជា​រៀងរាល់​ម៉ោង​ធ្វើការ​ដោយ​មិន​គិតថ្លៃ​សេវា។ ជាងនេះទៅទៀត តាមរយៈ​សេវា​អេស៊ីលីដា​យូ​នី​ធី​ទាន់​ចិត្ត​កម្មករ-កម្មការិនី​អាចធ្វើ​ការផ្ទេរ​ប្រាក់​ទៅកាន់​សាច់ញាតិ ឬ​បងប្អូន, បង់ថ្លៃ​ប្រើប្រាស់​ទឹក-ភ្លើង, ទិញ​កាត​ទូរស័ព្ទ, ពិនិត្យមើល​ទឹកប្រាក់​ក្នុង​គណនី និង​ប្រតិបត្តិការផ្សេងៗជាច្រើន​ទៀត រួមទាំង​ការទូទាត់ ថ្លៃ​ទិញ​ទំនិញ និង​សេវាកម្ម នានា​តាមរយៈ​ឃ្យូ​អរ​កូដ ដែលមាន​នៅតាម​ទីតាំង​ដៃគូ ទាន់ ចិត្ត​របស់​ធនាគារ​អេស៊ីលីដា​ប្រមាណ​ជាង១៦.០០០ ដៃគូ នៅ​ទូទាំងប្រទេស ដោយ​មិន​គិត ថ្លៃ​សេវា ។

លោក​ឧកញ៉ា វ៉ាន់ ស៊ូ​អៀង ប្រធាន​សមាគម​រោងចក្រ​កាត់ដេរ​នៅ​កម្ពុជា GMAC បានឱ្យដឹងថា ធនាគារ អេស៊ីលីដា ភីអិលស៊ី បាន​ជួយ​ដល់ក​ម្មករ-កម្មការិនី​យ៉ាងច្រើន ហើយ​ផ្ដល់នូវ​សុវត្ថិភាព​ខ្ពស់ និង​ឆាប់រហ័ស។

លោក​បញ្ជាក់ថា«ពេល​កម្មករ​ប្រើប្រាស់​សេវា​ធនាគារ​អេស៊ីលីដា ភីអិលស៊ី​បងប្អូន​កម្មករ-កម្មការិនី​អាច​ចំណេញ​បាន​ច្រើន​ដោយ​អាចធ្វើ​ការចាត់ចែង​សាច់ប្រាក់ និង​ធ្វើ​ប្រតិបត្តិការ​សេវា​ធនាគារ​តាមរយៈ​ទូរស័ព្ទ​ចល័ត​បាន​គ្រប់ពេលវេលា​គ្រប់​ទីកន្លែង»៕

អត្ថបទ៖ ហៃ សិរី