ទីក្រុងឌុយបៃ៖ ប្រទេសចំនួន ១៩០ បានបញ្ជាក់ថា ខ្លួននឹងចូលរួមនៅក្នុងព្រឹត្តិការណ៍ពិព័រណ៍ពិភពលោកឌុយបៃឆ្នាំ២០២០។ នេះបើតាមការអះអាងរបស់លោកស្រី REEM Al Hashimy រដ្ឋមន្ត្រីក្រសួងសហប្រតិបត្តិការអន្តរជាតិ និងជាប្រធានគណៈកម្មការរៀបចំពិភពលោកនៃប្រទេសសហភាពអារ៉ាប់រួម (UAE)។
នៅក្នុងកិច្ចប្រជុំ “International Participants Meeting (IPM)” លើកទី៣ ដែលបានរៀបចំឡើងកាលពីថ្ងៃទី២៦ និង២៧ ខែវិច្ឆិកា ឆ្នាំ២០១៨ លោកស្រី REEM Al Hashimy បានគូសបញ្ជាក់ថា មកទល់ពេលនេះ មានប្រទេសចំនួន ២០ បានចុះកិច្ចព្រមព្រៀងទទួលយកទីតាំង និងទំហំពន្លាជាតិ ដើម្បីចូលរួមបង្ហាញសក្តានុពលវប្បធម៌ ទេសចរណ៍ និងនវានុវត្តន៍ (គំនិតច្នៃប្រឌិតថ្មី) នៅក្នុងពិព័រណ៍ពិភពលោកដែលគ្រោងនឹងរៀបចំចាប់ពីថ្ងៃទី២០ ខែតុលា ឆ្នាំ២០២០ រហូតដល់ថ្ងៃទី១០ ខែមេសា ឆ្នាំ២០២១។
នៅក្នុងឱកាសនោះ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មដែលបានដឹកនាំគណៈប្រតិភូកម្ពុជាចូលរួមកិច្ចប្រជុំ បានសំណូមពររដ្ឋាភិបាលប្រទេសសហភាពអារ៉ាប់រួម ជួយសម្រួលទិដ្ឋាការដល់មន្ត្រី និងវិស័យឯកជនកម្ពុជា ដើម្បីចូលរួមនៅក្នុងព្រឹត្តិការណ៍ពិព័រណ៍ពិភពលោកឌុយបៃ ឆ្នាំ២០២០ ដោយសារតែកម្ពុជា មិនទាន់មានស្ថានទូតសហភាពអារ៉ាប់រួមនៅឡើយ។
ជាការឆ្លើយតប លោកស្រីរដ្ឋមន្ត្រីបានសន្យាជួយសម្របសម្រួលដំណើរការចេញទិដ្ឋាការ ជូនប្រទេសកម្ពុជា និងប្រទេសចូលរួមទាំងអស់តាមរយៈប្រព័ន្ធអេឡិចត្រូនិក (e-Visa) ទាំងការស្នាក់នៅសម្រាប់រយៈពេលខ្លី និងរយៈពេលវែង។ ដោយឡែក ចំពោះបញ្ហាបច្ចេកទេសទាក់ទងនឹងការរចនា (ឌីហ្សាញ) និងការសាងសង់ពន្លាជាតិលោកជំទាវរដ្ឋមន្ត្រី បានស្នើតំណាងប្រទេសនីមួយៗ ធ្វើការពិភាក្សាទ្វេភាគីជាមួយអ្នកគ្រប់គ្រង បច្ចេកទេសប្លង់ នៅថ្ងៃប្រជុំបន្ទាប់។
សូមជម្រាបថា កិច្ចប្រជុំ IPM លើកទី៣ មានការចូលរួមពីប្រមុខរដ្ឋ រដ្ឋមន្ត្រី អនុរដ្ឋមន្ត្រី អង្គទូត និងមន្ត្រីជាន់ខ្ពស់ តំណាងឱ្យប្រទេសចំនួន ១៨០ លើពិភពលោក ហើយប្រធានបទ ដែលបានលើកយកមកពិភាក្សា ផ្តោតសំខាន់លើការរៀបចំរចនាពន្លាជាតិ (Pavilion Design) ការសាងសង់ពន្លាជាតិ (Pavilion Construction) ការគ្រប់គ្រង និងការប្រតិបត្តិការពន្លាជាតិ (Pavilion Operation and Management)។ លើសពីនេះ កិច្ចប្រជុំ ក៏បានពិភាក្សាពីគម្រោងពាក់ព័ន្ធ និងដំណើរការរៀបចំពិព័រណ៍ពិភពលោកឌុយបៃ ឆ្នាំ២០២០ផងដែរ៕
ហៃ សិរី
