ខេត្តបន្ទាយមានជ័យ: រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជាលោក វ៉ាត់ ចំរើន កាលពីថ្ងៃទី ០២ ធ្នូនេះ បានដឹកនាំប្រតិភូ និងមន្ត្រីខេត្ដចុះទៅពិនិត្យសិក្សាតំបន់ព្រំដែន អន្តរជាតិជាំស្រងាំ ក្នុងស្រុកអន្លង់វែង ខេត្តឧត្តរមានជ័យ ដើម្បីរៀបចំព្រឹត្តិការណ៍កីឡាទេសចរណ៍ឲ្យបានច្រើននាឆ្នាំ២០១៩ខាងមុខនេះ។
លោក វ៉ាត់ ចំរើន បានមានប្រសាសន៍ថា ដើម្បីរៀបចំព្រឹត្តិការណ៍កីឡាទេសចរណ៍ឲ្យបានច្រើននាឆ្នាំ២០១៩ ខាងមុខនេះ លោកបានដឹកនាំអ្នកជំនាញមកពិនិត្យមើលស្ថានភាពនៅតំបន់អន្លង់វែង ក្នុងការរៀបចំព្រឹត្តិការណ៍កីឡាទេសចរមួយ ដែលភ្ជាប់ទៅនឹងផលិតផលទេសចរណ៍ផ្សេងៗទៀត ជាពិសេសគឺតំបន់ទេសចរណ៍ និងគោលដៅទេសចរណ៍ធំៗ ដែលមានភាពទាក់ទាញ។
លោកបន្តថា ក្រសួងទេសចរណ៍ និងគណៈកម្មាធិការជាតិអូឡាំពិកកម្ពុជាបានចុះមកពិនិត្យ មើលនៅតំបន់អន្លង់វែងនេះ ដែលជាទីតាំងប្រវត្តិសាស្ត្រមួយមានសារៈសំខាន់ក្នុងការអប់រំផ្សព្វផ្សាយដោយភ្ញៀវជាតិ និងអន្តរជាតិចង់ដឹង ចង់ឃើញ។
លោកបញ្ជាក់ថា៖“យើងបានឯកភាពគ្នាជាមួយសហគមន៍ មន្ទីរទេសចរណ៍នៅទីនេះ ដែល យើងអាចរៀបចំទិវាកីឡាទេសចរណ៍បានដោយនឹងអាចរៀបចំសកម្មភាពកីឡា និងអប់រំផ្សព្វ ផ្សាយ ពីសារៈសំខាន់នៅតំបន់នេះ។ យើងនឹងរៀបចំការរត់ប្រណាំង ឬការដើរដោយដំបង ឡើងភ្នំ។
លោកបានគូសបញ្ជាក់ថា៖“យើងនឹង ធ្វើការជាមួយអាជ្ញាធរស្រុក-ខេត្តបន្ថែមទៀត ដើម្បីសហប្រតិបត្តិគ្នាធ្វើកិច្ចការ នៃការចាប់ផ្តើម មួយប្រកបដោយអត្ថន័យខ្លឹមសារល្អ ដែលចង់ទៅលើការរៀបចំព្រឹត្តិការណ៍កីឡា និងការអប់រំ ផ្សព្វផ្សាយអំពីទីតាំងចុងក្រោយនៃប្រវត្តិសាស្ត្ររបបខ្មែរក្រហម នៅទីនេះ។
គម្រោងនេះ គឺយើងចង់រួមចំណែកជាមួយរាជរដ្ឋាភិបាល ក៏ដូចជាជាមួយគណៈប្រជាជនកម្ពុជា ក្នុងការរៀបចំទិវាកីឡាអបអរសាទរខួបអនុស្សាវរីយ៍លើកទី៤០នៃទិវាជ័យជម្នះ៧មករា។ ក្រៅពីកីឡា យើងនឹងរៀបចំកម្មវិធីសម្តែងនានាពាក់ពាន់នឹង របបខ្មែរក្រហមនេះផងដែរ”
សូមបញ្ជាក់ថា តំបន់ប្រវត្តិសាស្ត្រអន្លង់វែង ខេត្តឧត្តរមានជ័យនឹងក្លាយជាតំបន់កីឡាទេស ចរណ៍ប្រចាំឆ្នាំថ្មីមួយទៀត ក្នុងការទាក់ទាញភ្ញៀវទេសចរជាតិ និងអន្តរជាតិ ដែលទិវាកីឡា នៅតំបន់នេះនឹងត្រូវបានរៀបចំ មុនខួបអនុស្សាវរីយ៍ ៧មករា ឆ្នាំ២០១៩ ខាងមុខនេះ៕
ហៃ សិរី
