ខេត្តកំពង់ស្ពឺ: មន្ត្រីមន្ទីរទេសចរណ៍ខេត្តជាមួយនឹងអាជ្ញាធរស្រុកថ្ពងគ្រោងនឹងរៀបចំបង្កើតតំបន់រមណីយដ្ឋានអេកូទេសចរណ៍ទឹកធ្លាក់៧ជាន់ ឬទឹកធ្លាក់ជ្រាវក្នុងពេលខាងមុខនេះ ដើម្បីដាក់បង្ហាញភ្ញៀវទេសចរជាតិ និងអន្តរជាតិ នៅក្នុងខេត្តកំពង់ស្ពឺ។ នេះបើតាមលោក សុខ ភា អភិបាលរងខេត្តកំពង់ស្ពឺបានប្រាប់ឲ្យដឹងនៅថ្ងៃទី១១ ខែធ្នូ ឆ្នាំ២០១៨នេះ។
លោក សុខ ភា បានប្រាប់ថា សមិទ្ធផលបែបវប្បធម៌ធម្មជាតិរួមមាន៖ត្រពាំងបឹងតេ ទឹកធ្លាក់ជាច្រើនដំណាក់ ល្អាងថ្មធំៗ ប្រភពព្រៃឈើមានវ័យចំណាស់ជាដើម។ ជាសមិទ្ធផលទេសចរណ៍ដែលខេត្តកំពង់ស្ពឺមាន ដូចនេះត្រូវតែរួមគ្នាថែរក្សានិងអភិរក្សទុក ព្រោះនេះជាធនធានសម្បត្តិធម្មជាតិនៅសេសសល់ចុងក្រោយក្នុងខេត្តកំពង់ស្ពឺ។
លោកបន្តថា សក្តានុពលបែបវប្បធម៌ធម្មជាតិ និងប្រវត្តិសាស្ត្រនេះ ត្រូវបានបៀបចំជារមណីយដ្ឋានអេកូទេសចរណ៍ ដើម្បីជួយបង្វែរអ្នកស្រុកនៅតំបន់នេះឱ្យងាកមកលក់ដូរចំណីអាហារ វត្ថុអនុស្សារវីយ៍ជូនភ្ញៀវទេសចរវិញ ចៀសវាងចូលព្រៃកាប់ឈើ បរបាញ់សត្វព្រៃ។ នៅពេលអនាគតតំបន់នេះអាជ្ញាធរពាក់ព័ន្ធនឹងរៀបចំជាកន្លែងផលិតផលទាក់ទាញភ្ញៀវទេសចរមួយថ្មីឱ្យក្លាយទៅជារមណីយដ្ឋានបែបវប្បធម៌ធម្មជាតិនិងប្រវត្តិសាស្ត្រ។
លោក ជាម ឈួន សមាជិកសមាគមនៅភូមិតាំងសំរោង ឃុំអមលាំង បានគាំទ្រចំពោះការដាក់តំបន់ទឹកធ្លាក់ជ្រាវជាតំបន់អេកូទេសចរណ៍ ព្រោះប្រជាពលរដ្ឋយើងក៏ចង់ឱ្យមានការអភិវឌ្ឍដែរ ដើម្បីធ្វើឱ្យភូមិ ឃុំ មានតំបន់អេកូទេសចរណ៍ មានភ្ញៀវទេសចរមកលេងច្រើនអ៊ូរ អរ ម្យ៉ាងទៀតដីព្រៃដែលយើងអភិរក្ស និងអាចឱ្យក្មេងៗជំនាន់ក្រោយបានស្គាល់ថា ជាដើមឈើទាល ស្រឡៅ នាងនួន ដើមបេងជាដើម។ បើសិនជាយើងមិនបានថែរក្សាទេ ព្រៃឈើនឹងអស់ ហើយក្មេងៗជំនាន់ក្រោយមិនបានស្គាល់ព្រៃឈើនោះផងដែរទេ។
គួរបញ្ជាក់ថា ទឹកធ្លាក់៧ដំណាក់មានព្រៃប្រឹក្សាបៃតងខ្ចី និងសំឡេងសត្វយំប្រគុំជាតន្ត្រីធម្មជាតិ លាយឡំសូរទឹកហូរឈូៗ ឥតឈប់ឈរ គឺជាភាពទាក់ទាញបែបធម្មជាតិនៃទឹកធ្លាក់ជ្រាវ ដែលមានចម្ងាយប្រមាណ ៦០គីឡូម៉ែត្រ ពីក្រុងច្បារមន ទីរួមខេត្តកំពង់ស្ពឺ។
ទឹកធ្លាក់ជ្រាវស្ថិតនៅក្នុងភូមិតាំងសំរោង ឃុំអមលាំង ស្រុកថ្ពង ខេត្តកំពង់ស្ពឺ ជាទឹកធ្លាក់ជម្រាលច្រើនដំណាក់ អំណោយផលដល់ការងូតទឹកលេងកម្សាន្តពីសំណាក់ភ្ញៀវទេសចរជាតិ និងអន្តរជាតិ។ ជាទីកម្សាន្តគាប់ចិត្តរបស់ភ្ញៀវទេសចរដែលប្រាថ្នាដើរកម្សាន្តបែបធម្មជាតិ៕
