ភ្នំពេញ: បន្ទាប់ពីមានសេចក្តីជូនដំណឹងស្តីពីរដូវធ្វើប្រហុក ផ្អក របស់រដ្ឋបាលជលផល រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឯកអគ្គរដ្ឋទូតសហភាពអឺរ៉ុបប្រចាំកម្ពុជា នៅថ្ងៃទី១៣ ធ្នូនេះ បានចុះពិនិត្យការប្រមូលផលត្រីនៅរដូវនេសាទឆ្នាំ២០១៨ របស់ប្រជានេសាទនៅភូមិតាពៅ ឃុំកោះចិន ស្រុកពញាឭ ខេត្តកណ្តាល។
តាមសេចក្តីជូនដំណឹងស្តីពីរដូវធ្វើប្រហុក ផ្អក របស់រដ្ឋបាលជលផលកាលពីថ្ងៃទី១១ ខែធ្នូ ឆ្នាំ២០១៨ បានជម្រាបជូនប្រជានេសាទថា ឆ្នាំនេះកំពស់ទឹកទន្លេសាបស្រកចុះលឿនជាងឆ្នាំកន្លងមក ជាហេតុធ្វើឲ្យដាយនៅតាមដងទន្លេសាបក្នុងភូមិសាស្ត្ររាជធានីភ្នំពេញ និងខេត្តកណ្តាលអាចនេសាទត្រីបានក្នុងខែមិគសិរចាប់ពីថ្ងៃទី១៤ ដល់ថ្ងៃទី២០ខែធ្នូ។ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់ប្រជានេសាទនៅទីជិត ឆ្ងាយអញ្ជើញមកធ្វើប្រហុក ផ្អកទុកបរិភោគក្នុងគ្រួសារ។
បន្ទាប់ពីបានពិនិត្យការប្រមូលផលត្រីរួចមក លោករដ្ឋមន្ត្រី និងលោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា និងសហការីបានបន្តដំណើរទៅពិនិត្យកសិដ្ឋានចិញ្ចឹមត្រីឆ្តោរបស់លោក ឡោ ស្រៀង នៅស្រុកបាធាយ ខេត្តកំពង់ចាម ដែលចិញ្ចឹមលើផ្ទៃប្រមាណ៤ ហិកតា។ កសិដ្ឋាននេះដំណើរការបាន ៣ឆ្នាំហើយ មានលទ្ធភាពផ្គត់ផ្គង់ត្រីឆ្តោទៅទីផ្សារប្រមាណជា ៥០០តោនក្នុង១ឆ្នាំ។
សូមបញ្ជាក់ថា តាំងពីរាជរដ្ឋាភិបាលសម្រេចអនុញ្ញាតឲ្យមានការចិញ្ចឹមត្រីឆ្តោឡើងវិញ ក្រសួងកសិកម្ម រុក្ខាប្រមាញ់ និងនេសាទបានពិនិត្យឃើញថា ការចិញ្ចឹមត្រីឆ្តោកំពុងតែមានការកើនឡើងគួរឲ្យកត់សម្គាល់ ពោលគឺរហូតដល់ជាង ៦០ពាន់តោនក្នុងឆ្នាំ២០១៨នេះ។ បរិមាណនេះបានចូលរួមចំណែកកាត់បន្ថយការនាំចូលពីប្រទេសជិតខាងកាត់បន្ថយការចាប់ត្រីពីប្រភពធម្មជាតិ លើកកម្ពស់ផលិតភាពវារីវប្បកម្ម និងបង្កើនប្រាក់ចំណូល។
នាឱកាសនេះ លោករដ្ឋមន្ត្រី និងឯកអគ្គរដ្ឋទូតបានរួមគ្នាប្រកាសជាផ្លូវការស្តីពីជំនួយហិរញ្ញប្បទានឥតសំណងពីសហគមន៍អឺរ៉ុបដែលមានទឹកប្រាក់សរុប ៨៧លានអឺរ៉ូ ដែលគ្រោងនឹងចុះហត្ថលេខាក្នុងពេលឆាប់ៗនេះ សម្រាប់អភិវឌ្ឍន៍វិស័យជលផលប្រកបដោយចីរភាព និងបរិយាប័ន្ន CAPFISH-Capture។
មិនត្រឹមតែប៉ុណ្ណោះ កាលពីខែវិច្ឆិកាកន្លងទៅ ក៏មានការចុះហត្ថលេខាលើកិច្ចព្រមព្រាងហិរញ្ញប្បទានប្រតិបត្តិការរវាងរាជរដ្ឋាភិបាលកម្ពុជាជាមួយទីភ្នាក់ងារបារាំងសម្រាប់ការអភិវឌ្ឍ (AFD) ដែលក្នុងនោះមួយមានចំនួនទឹកប្រាក់ ២៥ លានអឺរ៉ូ សម្រាប់កម្មវិធីជំរុញវិស័យជនផលប្រកបដោយចីរភាព និងបរិយាប័ន សំដៅដល់ការអភិវឌ្ឍន៍វិស័យវារីវប្បកម្ម ទាំងទឹកសាប និងសមុទ្រ៕
