កាលពីឆ្នាំ 2018 រដ្ឋាភិបាលកម្ពុជា បានធ្វើការដំឡើងអត្រាពន្ធនាំចូលរថយន្តមួយទឹកម្ដងហើយ ធ្វើឲ្យតម្លៃរថយន្តបានហក់ឡើងថ្លៃភ្លាមៗពីតម្លៃចាស់ ហើយថ្មីៗនេះ ក្រសួងសេដ្ឋកិច្ច និងហិរញ្ញវត្ថុ សម្រេចជាម្ដងដោយធ្វើការ ដំឡើងនេះនាំចូលម្ដងទៀត។
ព័ត៌មានស្ដីពីការដំឡើងអត្រាពន្ធនេះ ត្រូវបានឃ្លាំងលក់ និងទិញរថយន្ត អ៊ែ168 R168 Automobile Dealer បង្ហោះតាមរយៈ Facebook Page ថា៖ រថយន្តមួយទឹកខ្លះនឹងឡើងថ្លៃកប់ទៀតហើយ ដោយរថយន្តខ្លះនឹងដាច់ពូជ លែងហ៊ាននាំចូលដូចអាឆ្លាម នៅដើមឆ្នាំ 2019 នេះ ដោយសារការដំឡើងពន្ធនាំចូល”។
សេចក្ដីសម្រេចនេះ បានចុះហត្ថលេខាជាផ្លូវការដោយឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ស្តីពីការដំឡើងពន្ធនាំចូលរថយន្តមួយទឹកនឹងឡើងថ្លៃបន្តទៀតនៅដើមឆ្នាំ 2019 ខាងមុខនេះ។
ឃ្លាំងលក់ និងទិញរថយន្ត សរសេរបន្តទៀតថា អត្រាពន្ធឡើងបែបនេះ នឹងធ្វើឲ្យរថយន្តមួយចំនួនដូចជា៖
- រថយន្ត LEXUS RX300 ចាប់ពីឆ្នាំ 2001 ដល់ឆ្នាំ 2003 (ឡើងប្រហែល 4700$) ដែលធ្លាប់បង់ពន្ធនាំចូល 11600$ នោះនឹងត្រូវឡើងបង់រហូតដល់ 16300$។ ហើយរថយន្តប្រភេទនេះ អាចដែលប្រឈមមុខការឈប់នាំចូលព្រោះសរុបថ្លៃដឹកថ្លៃរថយន្ត និងសេវាផ្សេងៗ រថយន្តមួយថ្លៃដើមលើសពី 20000$-25000$ !
- រថយន្ត TOYOTA HIGHLANDER V6 ចាប់ពីឆ្នាំ 2001ដល់ឆ្នាំ 2003 (ឡើងប្រហែល 4700$) ដែលធ្លាប់បង់ពន្ធនាំចូល 11600$ នោះនឹងត្រូវឡើងបង់រហូតដល់ 16300$។ ហើយរថយន្តប្រភេទនេះ អាចដែលប្រឈមមុខការឈប់នាំចូលដូចគ្នា ព្រោះសរុបថ្លៃដឹក ថ្លៃរថយន្ត និងសេវាផ្សេងៗ រថយន្តមួយថ្លៃដើមលើសពី 20000$-25000$ !
- រថយន្ត LEXUS RX330 ឆ្នាំ 2004 (ឡើងប្រហែល 6400$) ដែលធ្លាប់បង់ពន្ធនាំចូល 17400$ នោះនឹងត្រូវបង់រហូតដល់ 23800$ ។ សរុបថ្លៃដឹកថ្លៃរថយន្ត និងសេវាផ្សេងៗ រថយន្តមួយថ្លៃដើមលើសពី 30000$-40000$ !
- រថយន្ត TOYOTA CAMRY ចាប់ពីឆ្នាំ 2002 ដល់ឆ្នាំ 2004 (ឡើងប្រហែល4000$) ដែលធ្លាប់បង់ពន្ធនាំចូល 9100$ នោះនឹងត្រូវឡើងបង់រហូតដល់ 13000$ ។ ជាប្រភេទដែលប្រឈមមុខនឹងដាច់ពូជ ! ព្រោះសរុបថ្លៃដឹកថ្លៃរថយន្ត និងសេវាផ្សេងៗ រថយន្តមួយថ្លៃដើមលើសពី 19000$-22000$ !
សម្រាប់តារាងបង់ពន្ធនេះ អាចមានន័យថាប្រភេទរថយន្តមួយចំនួនដែលមានឆ្នាំផលិតក្រោមឆ្នាំ 2006 នឹងត្រូវគិតពន្ធស្មើឆ្នាំ 2006 ទាំងអស់។ ការប្រែប្រួលអត្រាពន្ធអាករនេះ អាចធ្វើឲ្យតម្លៃរថយន្តលក់តាមហាង និងក្រុមហ៊ុនមានការកើនឡើង ប៉ុន្តែហាងមួយចំនួនអាចនៅរក្សាតម្លៃដូចមុន ព្រោះជាទំនិញទិញចូលមុនការកំណត់អាករថ្មី ខណៈរថយន្តនាំចូលក្រោយខែមករាឆ្នាំ 2019 គឺតម្លៃថ្លៃជាងមុន៕
