ធនាគារអភិវឌ្ឍន៍អាស៊ី ប្ដេជ្ញាជួយ​ស្តារសម្បទាសេដ្ឋកិច្ចកម្ពុជាឱ្យងើបចេញពីវិបត្តិកូវីដ១៩

ភ្នំពេញ៖ អនុប្រធានធនាគារអភិវឌ្ឍន៍អាស៊ី(ADB) លោក Ahmed Muneeb Saeed នៅថ្ងៃទី ២០ខែមករានេះ ADB ប្ដេជ្ញាជួយកម្ពុជាក្នុងការឆ្លើយតបនឹងការរីករាលដាលជំងឺកូវីដ-១៩ និងការស្តារសម្បទាសេដ្ឋកិច្ចឡើងវិញ ដោយ​បានវាយ​តម្លៃ​ខ្ពស់ចំពោះ​កិច្ចខិតខំប្រឹងប្រែង និងការដឹកនាំរបស់រាជរដ្ឋាភិបាល ក្នុងការទប់ស្កាត់ការរីករាលដាលជំងឺកូវីដ-១៩។

​ការថ្លែងបែបនេះ ​ក្នុងកិច្ចប្រជុំគណៈកម្មការគោលនយោបាយសម្រាប់កម្មវិធីឆ្លើយតបនឹងការរីករាលដាលជំងឺកូវីដ-១៩ និង​ការ​ស្តារស​ម្បទាសេដ្ឋកិច្ចឡើងវិញ (CARES) ដែលដឹកនាំដោយលោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និង​ជា​រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ នៅទីស្តីការក្រសួងនៅថ្ងៃទី២០ ខែ​ម​ករាតាមប្រព័ន្ធវីដេអូ។

លោក Ahmed Muneeb Saeed ឱ្យដឹង​ថា ADB នឹងផ្តល់ការគាំទ្រលើ ៤ចំណុចរួមមានទី១-ការ​អនុវត្ត​កម្មវិធី​ចាក់វ៉ាក់​សាំង​របស់កម្ពុជា តាមរយៈការចាប់ផ្តើមការរៀបចំកិច្ចលទ្ធកម្មវ៉ាក់សាំងកូវីដ-១៩ និងសម្ភារៈបច្ចេក​ទេស​ស​ម្រាប់​ការអនុវត្ត​កម្ម​វិធីនេះ ទី២-ការគ្រប់គ្រងតាមច្រកព្រំដែនដែលជាចំណុចសំខាន់​ក្នុងការបញ្ជៀស​នូវការរីករាលដាលនៃជំងឺកូវីដ-១៩ ទី៣-ការការពារជនងាយរងគ្រោះ ជាពិសេសស្ត្រី និងកុមារ និងទី៤-ការគ្រប់គ្រងវិបត្តិនៃការកើនឡើងតម្លៃចំណីអាហារ។

លោក វង្សី វិស្សុត បានថ្លែងថា ​ការប៉ាន់ស្មានកំណើនសេដ្ឋកិច្ចកម្ពុជាក្នុងឆ្នាំ២០២០ ត្រូវបានវាយតម្លៃថានឹងមាន​ការថម​ថ​យ ដោយសារការដាក់ចេញនូវវិធានការទប់ស្កាត់ការរីករាលដាលនៃជំងឺកូវីដ-១៩ ដែលបានបង្អាក់ និងដាក់សម្ពាធ​យ៉ាង​ខ្លាំ​​ងដល់ដំណើរការសេដ្ឋកិច្ច ទាំងលើសកម្មភាពផលិតកម្ម និងការប្រើប្រាស់ ព្រមទាំងការវិនិយោគ។

លោកបន្តថា សេដ្ឋកិច្ចកម្ពុជានៅក្នុងឆ្នាំ២០២១នេះ ត្រូវបានព្យាករថា នឹងងើបឡើងវិញ ដោយសារការរំពឹង​ទុកនៃការ​កើន​ឡើង​ដោយសន្សឹមៗនៃវិស័យគាំទ្រកំណើនមួយចំនួន និងប្រសិទ្ធភាពនៃការដាក់ចេញ វិធានការគោលន​យោបាយរ​បស់រាជ​រ​ដ្ឋាភិ​បាល ព្រមទាំងការរំពឹងទុក​ថា វ៉ាក់សាំងជំងឺកូវីដ-១៩ នឹងត្រូវបានចាប់ផ្តើម ចែកចាយក្នុងឆ្នាំ២០២១នេះ។

លោក វង្សី វិស្សុត ​បន្ត​ថា ចាប់តាំងពីការរីករាលដាលនៃជំងឺកូវីដ-១៩ នៅដើមឆ្នាំ២០២០ និងរលកថ្មីនៃការរីករាលដាល នៃ​ជំងឺនេះជាបន្តបន្ទាប់ទាំងនៅជុំវិញពិភពលោក និងនៅកម្ពុជា រហូតមកទល់នឹងនេះវាបានធ្វើឱ្យ​កាន់តែស្គាល់ និងយល់​ដឹង​​អំពីជំងឺនេះថែមទៀត ព្រមទាំង​អាចមាន​ជម្រើសនៃការព្យាបាលជំងឺនេះបានល្អជាងមុន ជាពិសេស​អាចដាក់ចេញនូវ​វិធា​ន​កា​រឆ្លើយតបនឹងជំងឺនេះឱ្យកាន់តែចំគោលដៅ និងមានប្រសិទ្ធភាពខ្ពស់ជាងមុន៕