ភ្នំពេញ៖ គម្រោងសាងសង់ប្រមាណ ២,៨៦៧ គម្រោង ជាមួយនិងទឹកប្រាក់ប្រមាណ ៥ ២២៨ ៩៩២ ៥២២ដុល្លារអាមេរិក ត្រូវបានអ្នកជំនួញជាតិ និងអន្តរជាតិចំណាយលើការអភិវឌ្ឍវិស័យអចលនទ្រព្យនៅក្នុងប្រទេសកម្ពុជាសម្រាប់ឆ្នាំ ២០១៨នេះ។
នេះតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ដែលបង្ហាញក្នុងសន្និបាតបូកសរុបលទ្ធផលការងារឆ្នាំ២០១៨ និងលើកទិសដៅការងារឆ្នាំ ២០១៩ នៅថ្ងៃទី២៤ ខែធ្នូ ឆ្នាំ២០១៨ នេះនៅសណ្ឋាគារសុខា ជ្រោយចង្វារ។
របាយការណ៍របស់ក្រសួងបានឲ្យដឹងថា គម្រោងសាងសង់ទាំងនេះ ស្ថិតក្រោមសមត្ថកិច្ចរបស់ក្រសួងមានចំនួន ២៤៥គម្រោង មានទុនវិនិយោគប្រមាណ ៤ ៨២៩ ១៧៣ ៨៥៤ដុល្លារ ហើយស្ថិតក្រោមសមត្ថកិច្ចសាលារាជធានី-ខេត្ត ចំនួន ២ ៦២២ ជាមួយទុនវិនិយោគប្រមាណ ៣៩៩ ៨១៨ ៦៦៨ដុល្លារ។
របាយការណ៍បន្តថា សំណង់លំនៅឋានសរុបក្នុងឆ្នាំ២០១៨ មានចំនួន ២ ៤២០គម្រោង ជាមួយទុនវិនិយោគប្រមាណ ១ ៨៣៥ ៤១៦ ៩១២ដុល្លារ ស្នើនឹង ១៨ ៤៧១ខ្នង ហើយអគារខ្ពស់ៗចាប់ពី ៥ ជាន់ឡើងនៅរាជធានីភ្នំពេញក្នុងឆ្នាំ២០១៨ មានចំនួន ១១០អគារ។ ដោយឡែកបណ្ដុំលំនៅឋានមានលក្ខណៈបុរីនៅរាជធានីភ្នំពេញក្នុងឆ្នាំ២០១៨ ចំនួន ២៨ទីតាំង។
បើតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានអះអាងថា គិតចាប់ពីឆ្នាំ២០០០ ដល់ខែវិច្ឆិកា ឆ្នាំ២០១៨ បានចេញលិខិតអនុញ្ញាតសាងសង់ចំនួន ៤៣ ១៣៦គម្រោង ដែលមានផ្ទៃក្រឡាសំណង់សរុបចំនួន ១១៤ ២៩៧ ៦២១ម៉ែត្រការ៉េ និងតម្លៃប៉ាន់ស្មានទុនវិនិយោគសរុបប្រមាណ ៤៣ ៣៧០ ៤២៣ ៣៧៨ ដុល្លារ។
ចំណែកគម្រោងអគារខ្ពស់ៗចាប់ពី ៥ ជាន់ឡើងនៅរាជធានីភ្នំពេញ គិតចាប់ពីអនុវត្តរហូតដល់ឆ្នាំ ២០១៨ មានចំនួន ១ ២១៧អគារ និងបុរីលំនៅឋាន និងបណ្ដុំលំនៅឋានមានលក្ខណៈបុរីគិតពីឆ្នាំ២០០៣ ដល់ឆ្នាំ ២០១៨ មានចំនួន ២៣៥ទីតាំង៕
