ភ្នំពេញ៖ បន្ទាប់ពីពិនិត្យយ៉ាងល្អិតល្អន់ ក្រុមប្រឹក្សាអភិវឌ្ឍន៍កម្ពុជា (CDC)បានអនុម័តឲ្យបើកដំណើរការគម្រោងវិនិយោគបើករោងចក្រផលិតកាបូប និងរោងកាត់ដេរសម្លៀកបំពាក់ថ្មីចំនួន៣គ្រោងទៀត ក្រោមទុនវិនិយោគជាង២០លានដុល្លារអាមេរិក ដោយបង្កើតការងារថ្មីជូនពលរដ្ឋខ្មែររាប់ពាន់កន្លែង។
តាមគេហៈទំព័រហ្វេសប៊ុក(Facebook) ផ្លូវការរបស់ក្រុមប្រឹក្សាអភិវឌ្ឍន៍កម្ពុជា (CDC) ដែលផ្សាយនៅថ្ងៃទី០៨ ខែមករានេះថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖
ទី១-MILLENNIUM PLASTIC AND METAL PRODUCTS CO.,LTD. គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិអង្គរោង ឃុំមហាឫស្សី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ២.១២លានដុល្លារអាមេរិក និងអាចបង្កើតការងារបានចំនួន ២០៥កន្លែង។
ទី២-THE SOUL GEAR (CAMBODIA) CO.,LTD. គម្រោងបង្កើតរោងចក្រផលិតកាបូប និងកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិទួលសាលា ឃុំព្រៃពួច ស្រុកអង្គស្នួល ខេត្តកណ្តាល មានទុន វិនិយោគប្រមាណ ១៤,៩៨លានដុល្លារអាមេរិក និងអាចបង្កើតការងារបានចំនួន ៣,៩០៤កន្លែង។
និងទី៣-JIE RUI FENG (CAMBODIA) LEATHER CO.,LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ៥១ ភូមិអង្គតាសិត ឃុំទួលព្រេជ ស្រុកអង្គស្នួល ខេត្តកណ្តាល មានទុនវិនិយោគប្រមាណ ៣.៦៥លានដុល្លារអាមេរិក និងអាចបង្កើតការងារបានចំនួន ៨៩០កន្លែង៕
