ភ្នំពេញ: គម្រោងសាងសង់ផ្លូវក្រវាត់ក្រុងខ្សែទី៣ (ផ្លូវជាតិលេខ៤-ផ្លូវជាតិលេខ១) ស្ថិតនៅភូមិសាស្ត្ររាជធានីភ្នំពេញ និងខេត្តកណ្តាល មានប្រវែងសរុប ៥២, ៩៨៣គីឡូម៉ែត្រ បានបើកការដ្ឋានសាងសង់ជាផ្លូវការហើយ ក្រោមអធិបតីភាពឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ដ្រីក្រសួងសាធារណការ និងដឹកជញ្ជូន បានអញ្ជើញអមដំណើរសម្តេច ហ៊ុន សែន។
ផ្លូវនេះ ឆ្លងកាត់ភូមិសាស្ត្ររាជធានី ភ្នំពេញ ប្រវែង១៥,៤២៤គីឡូម៉ែត្រ និងឆ្លងកាត់ភូមិសាស្ត្រខេត្តកណ្តាលប្រវែង៣៧,៥៥៩គីឡូម៉ែត្រ ដែលមានចំណុចចាប់ផ្តើមពីគីឡូម៉ែត្រ ១៤+១០៥ នៃផ្លូវជាតិលេខ៤ និងចំណុចចុងបញ្ចប់នៅគីឡូម៉ែត្រ ២៤ + ៨៤០ នៃផ្លូវជាតិលេខ។
ឯកឧត្ដម ស៊ុន ចាន់ថុល បានថ្លែងថា គម្រោងសាងសង់ផ្លូវនេះគ្រោងចំណាយថវិកាសរុបប្រមាណ ២៧៣ លានដុល្លារអាមេរិក ក្រោមហិរញ្ញប្បទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ អនុវត្តការសាងសង់ដោយក្រុមហ៊ុនសំណង់ Shanghai Construction Group Co., Ltd និងត្រួតពិនិត្យបច្ចេកទេសសាងសង់ ដោយក្រុមហ៊ុន Guangzhou Wanan Construction Supervision Co., Ltd និងចំណាយរយៈ ពេលសាងសង់ចំនួន ៤២ខែ ចាប់ពីខែធ្នូ ឆ្នាំ២០១៨ និងបញ្ចប់នៅខែធ្នូ ឆ្នាំ២០។
ផ្លូវក្រវាត់ក្រុងខ្សែទី៣នេះតភ្ជាប់ចាប់ពីផ្លូវជាតិលេខ៦ កាត់តាមមហាវិថីឈ្នះឈ្នះ ស្ពានឈ្នះឈ្នះ ផ្លូវជាតិលេខ៥ កាត់តាមទំនប់កប់ស្រូវ ផ្លូវជាតិលេខ៤ ផ្លូវជាតិលេខ៣ ផ្លូវជាតិលេខ២ និងផ្លូវជាតិលេខ២១ ឆ្លងកាត់ទន្លេបាសាក់ ព្រមទាំងកោះអន្លង់ចិន និងតភ្ជាប់ទៅនឹងផ្លូវជាតិលេខ១ ដែលនឹងក្លាយជាផ្លូវក្រវាត់ក្រុងដ៏ធំ និងទំនើបមួយ បម្រើដល់ការដឹកជញ្ជូនរវាងរាជធានីភ្នំពេញ ពិសេសតភ្ជាប់ទៅចំណតផែកុងតេន័រថ្មី របស់កំពងផែស្វយ័តភ្នំពេញនៅស្រុកកៀនស្វាយ។
ឯកឧត្តមទេសរដ្ឋមន្ត្រីបានគូសបញ្ជាក់ថា៖ ការសាងសង់ផ្លូវក្រវាត់ក្រុងខ្សែទី៣នេះ មានអត្ថប្រយោជន៍ ជួយដល់ការចូលរួមចំណែកកាត់បន្ថយការកកស្ទះ និងគ្រោះថ្នាក់ចរាចរណ៍ ដែលធ្លាប់មានកន្លងមក និងជួយសម្រួលដល់ការធ្វើដំណើររបស់បងប្អូនប្រជាពលរដ្ឋក្នុងរាជធានីភ្នំពេញបន្ថែមទៀត ខណៈពេល ដែលរាជធានីភ្នំពេញ កំពុងត្រូវបានពង្រីកកាន់តែធំទៅៗ ស្របតាមកំណើនប្រជាជន និងការអភិវឌ្ឍ ដែលធ្វើឱ្យចរាចរយានយន្តគ្រប់ប្រភេទនៅតាមដងផ្លូវជួបប្រទះនូវការកកស្ទះចរាចរណ៍ជាញឹកញាប់។
ឆ្លៀតក្នុងឱកាសនោះដែរ សម្តេចនាយករដ្ឋមន្ត្រី បានមានប្រសាសន៍ថា៖ កំណើនសេដ្ឋកិច្ចជាតិក្រោមម្លប់សុខសន្តិភាព និងស្តិរភាពនយោបាយ ដែលរកបានដោយលំបាក បានធ្វើ ឱ្យប្រជាពលរដ្ឋមានជីវភាពធូរធារ មានលទ្ធភាពទិញសម្ភារប្រើប្រាស់ និងមធ្យោបាយធ្វើដំណើរ ដែលតម្រូវឱ្យរាជរដ្ឋាភិបាល ត្រូវខិតខំកសាង និងពង្រីកបណ្តាញផ្លូវថ្នល់ និងស្ពានបន្ថែមទៀត ស្របកំណើនយានយន្តរបស់ប្រជាពលរដ្ឋ៕
