ភ្នំពេញ: អន្តរក្រសួងដែលដឹកនាំដោយឯកឧត្តម ផៃ ប៊ុនឈឿន រដ្ឋលេខាធិការក្រសួងបរិស្ថាន នៅថ្ងៃទី ១៤ មករានេះ បានបើកកិច្ចប្រជុំមួយស្តីពីការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ(ESIA) សម្រាប់គម្រោងសាងសង់ផ្លូវល្បឿនលឿនពីរាជធានីភ្នំពេញទៅខេត្តព្រះសីហនុ។
តាមគេហទំព័រហ្វេសប៊ុករបស់ក្រសួងបរិស្ថានបានឱ្យដឹងថា គម្រោងសាងសង់ផ្លូវល្បឿនលឿនពីរាជធានីភ្នំពេញទៅខេត្តព្រះសីហនុមានប្រវែង ១៩០,០១៦គីឡូម៉ែត្រ ចាប់ផ្តើមពីភូមិសំរោង សង្កាត់សំរោងក្រោម ខណ្ឌពោធិសែនជ័យ រាជធានីភ្នំពេញ និងបញ្ចប់នៅភូមិ១ សង្កាត់៣ ក្រុងព្រះសីហនុ ខេត្តព្រះសីហនុ ដោយក្រុមហ៊ុន China Road and Bridge Corporation (Cambodia)ជាម្ចាស់គម្រោងដែលសិក្សា និងរៀបចំរបាយការណ៍ដោយក្រុមហ៊ុនទីប្រឹក្សា SAWAC Consultant (Cambodia) Co., Ltd.។
លទ្ធផលកិច្ចប្រជុំនេះ បានគាំទ្រលើគម្រោងវិនិយោគ ព្រោះវាចូលរួមចំណែកអភិវឌ្ឍន៍សេដ្ឋកិច្ចប្រទេសជាតិ ដោយស្នើក្រុមការងារនាយកដ្ឋានវាយតម្លៃហេតុប៉ះពាល់បរិស្ថាន និងក្រុមហ៊ុនម្ចាស់គម្រោងធ្វើការជាមួយអគ្គនាយកដ្ឋានរដ្ឋបាលការពារ និងអភិរក្សធម្មជាតិពាក់ព័ន្ធនឹងការប៉ះពាល់តំបន់ការពារដោយ គម្រោងនេះ។
ក្រុមហ៊ុនម្ចាស់គម្រោងត្រូវគ្រប់គ្រងសំណល់រឹង-រាវ ឱ្យបានត្រឹមត្រូវតាមលក្ខណៈបច្ចេកទេស នៅតាមចំណតទាំង៤ នៃផ្លូវល្បឿនលឿន ក្នុងនោះស្នើក្រុមហ៊ុនម្ចាស់គម្រោងដាំដើមឈើអមសងខាងផ្លូវល្បឿនលឿន និងស្នើក្រុមហ៊ុនម្ចាស់គម្រោងសិក្សាឡើងវិញអំពីការបង្កើនចំនួនស្ពានប្រអប់ ស្ពានអាកាស និងផ្លូវក្រោមដី សម្រាប់ប្រជាពលរដ្ឋប្រើប្រាស់ឆ្លងកាត់ ។
ក្រុមហ៊ុនម្ចាស់គម្រោងត្រូវធ្វើការកែសម្រួលរបាយការណ៍នេះតាមរាល់មតិយោបល់ទាំងអស់ របស់ក្រុមការងារនាយកដ្ឋានជំនាញ តំណាងអគ្គនាយដ្ឋាននៃក្រសួងបរិស្ថាន និងតំណាងក្រសួង-ស្ថាប័ន ជំនាញពាក់ព័ន្ធ ដែលផ្តល់យោបល់ក្នុងអង្គប្រជុំ រួមទាំងបញ្ចូលទាំងមតិបូកសរុបរបស់ប្រធានអង្គប្រជុំ៕
