ភ្នំពេញ៖ គម្រោងវិនិយោគបើករោងចក្រផលិតកាបូប និងរោងកាត់ដេរសម្លៀកបំពាក់ថ្មីចំនួន៥ គម្រោងផ្សេងទៀតត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តឲ្យបើកដំណើរការនៅកម្ពុជា ដោយមានទុនវិនិយោគសរុបជិត ២៥លានដុល្លារអាមេរិក។
តាមគេហទំព័រ Facebook ផ្លូវការរបស់ក្រុមប្រឹក្សាអភិវឌ្ឍន៍កម្ពុជា (CDC) បានបង្ហាញនៅថ្ងៃទី១៥ មករានេះថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចជា៖
ទី១-GUOHUI LUGGAGE TRAVELING PRODUCTS (CAMBODIA) CO.,LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ មានទុនវិនិយោគប្រមាណ ៥.២៤លានដុល្លារអាមេរិក និងអាចបង្កើតការងារបានចំនួន ១ ០៦៩កន្លែង។
ទី២-GLOWING VALUE (CAMBODIA) BAG & LUGGAGE CO.,LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងឬស្សី ឃុំទំនប់ធំ ស្រុកពញាឮ ខេត្តកណ្តាល មានទុនវិនិយោគប្រមាណ ៤.១៨លានដុល្លារអាមេរិក និងអាចបង្កើតការងារបានចំនួន ២ ១៦៨កន្លែង។
ទី៣-PEEVI INDUSTRY (CAMBODIA) CO.,LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិឃ្លាំងសម្បត្តិ ឃុំពត់សរ ស្រុកបាទី ខេត្តតាកែវ មានទុនវិនិយោគប្រមាណ ៥.២៤លានដុល្លារអាមេរិក និងអាចបង្កើតការងារបានចំនួន ១ ០៩៦កន្លែង។
ទី៤-HILLTOP LUGGAGE (CAMBODIA) CO.,LTD. គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ២១B ភូមិអន្លង់សាន ឃុំព្រែកស្តី ស្រុកកោះធំ ខេត្តកណ្តាល មានទុនវិនិយោគប្រមាណ ៦.៤១លានដុល្លារអាមេរិក និងអាចបង្កើតការងារបានចំនួន ១,៩៦៦កន្លែង។
និងទី៥-EVER SUPRA GARMENT (CAMBODIA) CO.,LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិព្រែកកំពឹស សង្កាត់ព្រែកកំពឹស ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៣.៧៤លានដុល្លារអាមេរិក និងអាចបង្កើតការងារបានចំនួន ២,១១១កន្លែង៕
