ក្រសួងកំពុងរៀបចំកម្មវិធីដកពិន្ទុប័ណ្ណបើកបរ និងពិន័យយានយន្តដែលបើកបរល្មើសច្បាប់

សៀមរាប៖ រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល នៅថ្ងៃទី២១ ខែកក្កដានេះបានឲ្យដឹងថា បច្ចុប្បន្នក្រុមការងារជំនាញក្រសួង និងអគ្គស្នងការដ្ឋាននគរបាលជាតិ ក្រសួងមហាផ្ទៃ បានសហការរៀបចំកម្មវិធីដកពិន្ទុប័ណ្ណបើកបរ និងពិន័យបទល្មើសចរាចរណ៍ផ្លូវគោក អាចចាប់យករូបភាពយានយន្តដែលបើកបរល្មើសច្បាប់ តាមរយៈការស្កេនលើប័ណ្ណបើកបរ ដើម្បីកាត់បន្ថយពិន្ទុចំពោះអ្នកបើកបរយានយន្តខុសច្បាប់ទៅតាមស្ថាននៃបទល្មើស។

លោកបានថ្លែងក្នុងពិធីបើកមណ្ឌលផ្តល់សេវាសាធារណៈក្រសួងសាធារណការ និងដឹកជញ្ជូននៅផ្សារទំនើប ហេរីថេក វ៉ក ខេត្តសៀមរាបថា បច្ចុប្បន្នក្រុមការងារជំនាញក្រសួង និងអគ្គស្នងការដ្ឋាននគរបាលជាតិ ក្រសួងមហាផ្ទៃ បានសហការរៀបចំកម្មវិធីដកពិន្ទុប័ណ្ណបើកបរ និងពិន័យបទល្មើសចរាចរណ៍ផ្លូវគោក អាចចាប់យករូបភាពយានយន្តដែលបើកបរល្មើសច្បាប់ តាមរយៈការស្កេនលើប័ណ្ណបើកបរ ដើម្បីកាត់បន្ថយពិន្ទុចំពោះអ្នកបើកបរយានយន្តខុសច្បាប់ទៅតាមស្ថាននៃបទល្មើសដូចជា៖ មិនពាក់ខ្សែក្រវាត់សុវត្ថិភាព បើកបរលើសល្បឿនកំណត់ បើកបរក្នុងស្ថានភាពស្រវឹង ផ្ទុកមនុស្សលើសកំណត់ ឬល្មើសភ្លើងសញ្ញា ជាដើម ហើយកម្មវិធីនេះ(App)គ្រោងនឹងគោរពរាយការណ៍ជូនសម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកនាពេលឆាប់ៗនេះ ដើម្បីស្នើសុំការឯកភាព និងអាចដាក់ឱ្យប្រើប្រាស់ផ្លូវការនៅដើមឆ្នាំ២០២២ខាងមុខ។

ជាមួយគ្នានេះលោកទេសរដ្ឋមន្ត្រី បានពន្យល់បន្ថែមទៀតថា៖ កម្មវិធីដកពិន្ទុប័ណ្ណបើកបរនេះ បង្កើតឡើងដើម្បីឱ្យអ្នកបើកបរគោរពច្បាប់ចរាចរណ៍ កាត់បន្ថយគ្រោះថ្នាក់ចរាចរណ៍ ដោយហេតុថា ជារៀងរាល់ឆ្នាំ រដ្ឋបានខាតបង់ថវិកាជាតិប្រមាណ៣៥០លានដុល្លារអាមេរិកដោយសារគ្រោះថ្នាក់ ចរាចរណ៍ និងបានបង្កឱ្យប្រជាពលរដ្ឋរងរបួស ស្លាប់ ខូចខាតទ្រព្យសម្បត្តិឯកជន និងចំណាយលើការ បង់ថ្លៃព្យាបាល និងបានអំពាវនាវឱ្យបងប្អូនប្រជាពលរដ្ឋចូលរួមជាមួយរាជរដ្ឋាភិបាលគោរពច្បាប់ចរាចរណ៍ទាំងអស់គ្នា ដើម្បីកសាងប្រទេសជាតិមាតុភូមិយើងឱ្យបានរុងរឿងប្រកបដោយមោទនភាពជាតិខ្មែរ។

លោកបានសំណូមពរដល់មនុស្សបួនប្រភេទរួមមាន៖ អ្នកថា អ្នកធ្វើ អ្នក ឈរមើល និងអ្នកទិទៀន ឱ្យចូលរួមជាមួយរាជរដ្ឋាភិបាល ក្រោមការដឹកនាំដ៏ត្រឹមត្រូវរបស់សម្ដេច ហ៊ុន សែន ដើម្បីកសាងប្រទេសឱ្យបានរុងរឿងថែមទៀត និងបានរម្លឹកនូវពាក្យស្លោកមួយឃ្លាថា៖ សំដីអត់ប្រយោជន៍នាំគ្រោះដល់ជាតិ ការងារមានប្រសិទ្ធភាពនាំជាតិរុងរឿង។

ក្រសួងសាធារណការ និងដឹកជញ្ជូនបានដាក់ឱ្យដំណើរការជាផ្លូវការមណ្ឌល ផ្តល់សេវាសាធារណៈបានចំនួន៥ទីតាំង រួមមាន៖ ១)មណ្ឌលប្ដូរ និងពន្យាបណ្ណបើកបរផ្សារទំនើបអ៊ីអន ១ (AEON 1) បានបើកដំណើរការនៅថ្ងៃទី១៥ ខែមិថុនា ឆ្នាំ២០១៦ ផ្តល់សេវាប្ដូរនិងពន្យាបណ្ណ បើកបរយានយន្តសម្រាប់ជនជាតិខ្មែរ ២)មណ្ឌលផ្ដល់សេវាបណ្ណបើកបរផ្សារទំនើបអ៊ីអន ២ (AEON 2) បានបើកដំណើរការនៅថ្ងៃទី២២ ខែមិថុនា ឆ្នាំ២០១៨ ផ្តល់សេវាប្ដូរ និងពន្យាបណ្ឌបើកបរយានយន្ត សម្រាប់ជនជាតិខ្មែរ និងបរទេស ៣)មណ្ឌលផ្ដល់សេវាសាធារណៈ ផ្សារទំនើបជីប ម៉ុង ណូរ៉ូ ម៉ល (CHIP MONG NORO MALL) បានបើកដំណើរការនៅថ្ងៃទី៣០ ខែកញ្ញា ឆ្នាំ២០២០ ផ្តល់សេវាចុះបញ្ជី យានយន្ត ផ្ទេរកម្មសិទ្ធិយានជំនិះ បណ្ណបើកបរយានយន្ត សម្រាប់ជនជាតិខ្មែរ និងបរទេស ៤)មណ្ឌល ផ្ដល់សេវាសាធារណៈ ទីស្ដីការក្រសួងសាធារណការ និងដឹកជញ្ជូន បានបើកដំណើរការនៅថ្ងៃទី២២ ខែមករា ឆ្នាំ២០២១ ផ្តល់សេវាចុះបញ្ជីយានយន្ត ផ្ទេរកម្មសិទ្ធិយានជំនិះ ប្ដូរបណ្ណបើកបរយានយន្ត សម្រាប់ជនជាតិខ្មែរ និងបរទេស ត្រួតពិនិត្យលក្ខណៈបច្ចេកទេសយានជំនិះ(ឆៀក) អាជីវកម្មដឹកជញ្ជូន អាជីវកម្មដឹកជញ្ជូនផ្លូវទឹក ផ្លូវសមុទ្រ ឆ្លងកាត់ព្រំដែន និងកំពង់ផែ ៥)មណ្ឌលផ្ដល់សេវាសាធារណៈ ផ្សារទំនើប ហេរីថេក វ៉ក (THE HERITAGE WALK) បានដំណើរការបណ្ដោះអាសន្ននៅថ្ងៃទី០៣ ខែមេសា ឆ្នាំ២០២១ ផ្តល់សេវាចុះបញ្ជីយានយន្ត ផ្ទេរកម្មសិទ្ធិយានជំនិះ ប្ដូរបណ្ណបើកបរយានយន្ត សម្រាប់ជនជាតិខ្មែរ និងបរទេស ត្រួតពិនិត្យលក្ខណៈបច្ចេកទេសយានជំនិះ(ឆៀក) ត្រៀមដំណើរការ ផ្លូវការនៅថ្ងៃទី២១ ខែកក្កដា ឆ្នាំ២០២១។ គិតចាប់ពីឆ្នាំ២០១៦ ដល់ចុងខែមិថុនា ២០២១ ក្រសួងបានផ្តល់សេវាសរុបមានចំនួនដូចតទៅ៖ សេវាសរុបក្នុងមណ្ឌលបានប្រមាណ ១៥០ ០០០ សេវា ស្មើនឹង១១% និងសេវាសរុបទូទាំងប្រទេសបានប្រមាណ ១ ៤២០ ០០០ សេវា។

បច្ចុប្បន្ន ក្រសួងបាននឹងកំពុងធ្វើកំណែទម្រង់ ខិតខំរិះរកគ្រប់មធ្យោបាយ និងអភិវឌ្ឍខ្លួនឥតឈប់ឈរ ក្នុងគោលបំណងលើកកម្ពស់សេវាសាធារណៈជូនប្រជាពលរដ្ឋ។ ជាក់ស្តែង ក្រសួងបានដាក់ឱ្យ ដំណើរការប្រព័ន្ធស្វ័យប្រវត្តិកម្មដឹកជញ្ជូនផ្លូវគោក ដោយការប្រើប្រាស់ប្រព័ន្ធបច្ចេកវិទ្យា ជំរុញឱ្យការផ្តល់ សេវាសាធារណៈកាន់តែប្រសើរឡើង តាមប្រព័ន្ធអនឡាញ ឬទៅកន្លែងផ្តល់សេវា ដែលកំណត់ដោយ ក្រសួងរួមមាន៖

ចុះបញ្ជីយានយន្ត៖ តាមប្រព័ន្ធអនឡាញ vehicle.mpwt.gov.kh ឬទៅទីតាំងផ្តល់សេវារួមមាន៖ អគ្គនាយកដ្ឋានដឹកជញ្ជូនផ្លូវគោក មន្ទីរសាធារណការ និងដឹកជញ្ជូនរាជធានី-ខេត្ត ការិយាល័យ ច្រកចេញចូលតែមួយ និងហាងលក់យានជំនិះ ២៥រាជធានី-ខេត្ត ព្រមទាំង ប្រព័ន្ធលេខពិសេសផ្ទាល់ខ្លួន ដែលអនុញ្ញាតឱ្យបងប្អូនប្រជាពលរដ្ឋធ្វើការស្វែងរកលេខក្នុងចំណោម ប្រមាណ ៣,៥ ទ្រីលានជម្រើស ដើម្បីចូលរួមដេញថ្លៃជាសាធារណៈ ស្នើសុំទិញលេខទុក និងចុះបញ្ជីយានជំនិះ ដោយខ្លួនឯងតាមប្រព័ន្ធ អនឡាញ vehicle.mpwt.gov.kh ឬទៅកាន់អគ្គនាយកដ្ឋានដឹកជញ្ជូនផ្លូវគោក។

ការផ្តល់បណ្ណបើកបរ៖ តាមប្រព័ន្ធអនឡាញ driverlicense.mpwt.gov.kh ឬទៅទីតាំងផ្តល់សេវា រួមមាន៖ អគ្គនាយកដ្ឋានដឹកជញ្ជូនផ្លូវគោក មន្ទីរសាធារណការ និងដឹកជញ្ជូន និងនៅមណ្ឌលផ្តល់ សេវាប្តូរ និងពន្យារបណ្ណបើកបរ នៅផ្សារទំនើប AEON1 និង AEON2 ផ្សារទំនើប ជីប ម៉ុង ណូរ៉ូ ម៉ល និងផ្សារទំនើប ហេរីថេក វ៉ក (The Heritage Walk)៕