ភ្នំពេញ: គម្រោងស្ថាបនាកំណាត់ផ្លូវជាតិលេខ៥ ក្រោមកម្ចីឥណទានសម្បទានពីរដ្ឋាភិបាលជប៉ុន បាននឹងកំពុងចុះកិច្ចព្រមព្រៀង ដើម្បីចាប់ផ្តើមសាងសង់ ដោយគ្រោងនឹងចំណាយថវិកាប្រមាណ ៥០០លានដុល្លារ ចេញពីព្រែកក្តាមរហូតដល់ក្រុងប៉ោយប៉ែត ឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ ដែលមានប្រវែងសរុប ៣៦៦គីឡូម៉ែត្រ។
ការបង្ហាញនេះ ក្នុងពិធីចុះហត្ថលេខាលើកិច្ចព្រមព្រៀងគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគកណ្តាល (ធ្លាម្អម-បាត់ដំបង) ដោយមានការចូលរួមពីថ្នាក់ដឹកនាំក្រសួង តំណាងមកពីទីភ្នាក់ងារសហប្រតិបត្តិការអន្តរជាតិជប៉ុន ក្រុមហ៊ុនILSUNG-CIENCOI, ក្រុមហ៊ុនOBAYASHI Corporation និង តំណាងក្រុមហ៊ុនTEKKEN-IKEE Joint Venture នៅទីស្តីការក្រសួងសាធារណការ និងដឹកជញ្ជូន ក្រោមអធិបតីភាព ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី២៨ ខែមករានេះ។
ឯកឧត្តម ស៊ុន ចាន់ថុល បានថ្លែងថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ គឺជាគម្រោងក្រោមកម្ចីឥណទានសម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការ អន្តរជាតិជប៉ុនប្រចាំកម្ពុជា ដែលផ្តើមសាងសង់ចេញពីព្រែកក្តាម រហូតដល់ក្រុងប៉ោយប៉ែត ឆ្លងកាត់ ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ មានប្រវែងសរុប ៣៦៦គីឡូម៉ែត្រ គ្រោងចំណាយថវិកាប្រមាណ ៥០០លានដុល្លារ ហើយការស្ថាបនាត្រូវបានបែងចែកជាបីផ្នែកធំៗគឺ៖ ភាគខាងជើង ភាគខាងត្បូង និងភាគកណ្តាល។
ឯកឧត្តមបន្តថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគ កណ្តាលនេះមានប្រវែងសរុប ១១០,៩០គីឡូម៉ែត្រ ដោយចាប់ពីធ្លាម្អម ដល់ បាត់ដំបង ទទឹងប្រវែង២៣ម៉ែត្រ ពី២គន្លងទៅ៤គន្លង ក្រាលកៅស៊ូ AC កម្រាស១៥សង់ទីម៉ែត្រ ខណ្ឌដោយសួនច្បារនៅចំកណ្តាល គ្រោងចំណាយទឹកប្រាក់សរុបចំនួន ២៤៣,៧៤លានដុល្លារ ហើយការស្ថាបនានេះមានរយៈពេលប្រមាណ ៤២ខែ។
ទន្ទឹមនឹងនេះ ឯកឧត្តមទេសរដ្ឋមន្ត្រីបានគូសបញ្ជាក់ថា កំណាត់ផ្លូវជាតិនេះជាផ្លូវអាស៊ានហាយវ៉េលេខ១ អាចបង្កើនការនាំចេញ-នាំចូល និងជាផ្លូវមួយប្រកបដោយសក្តានុពលខ្ពស់សម្រាប់បម្រើវិស័យសេដ្ឋកិច្ចកម្ពុជា ពិសេសអាចកាត់បន្ថយគ្រោះថ្នាក់ និងការកកស្ទះចរាចរណ៍បានយ៉ាងច្រើន។ លើសពីនេះទៅទៀត ប្រជាពលរដ្ឋតាមដងផ្លូវនេះនឹងមានជីវភាពកាន់តែល្អប្រសើរតាមរយៈកំណើននៃការអភិវឌ្ឍ វិនិយោគ និងទេសចរណ៍។
ឯកឧត្តមក៏បានស្នើឱ្យក្រុមហ៊ុនម៉ៅការសាងសង់ដាក់ផ្លាកសញ្ញាសុវត្ថិ ភាពឱ្យបានត្រឹមត្រូវនៅតាមការដ្ឋានសាងសង់ផ្លូវ ដែលអាចបង្កគ្រោះថ្នាក់ចរាចរណ៍បណ្តាលឱ្យស្លាប់ចំពោះអ្នកធ្វើដំណើរ និងបានសំណូមឱ្យក្រុមហ៊ុនទាំងបី ធ្វើការយ៉ាងជិតស្និទ្ធជាមួយក្រសួង និងក្រុមហ៊ុនប្រឹក្សាយោបល់ ដើម្បីធានាបាននូវប្រសិទ្ធភាព គុណភាព និងសុវត្ថិភាពនៃការសាងសង់៕
