ភ្នំពេញ: ឥណទានមិនដំណើរការលើសពី៣០ថ្ងៃ (NPL 30) បានបន្តធ្លាក់ចុះនៅក្នុងត្រីមាសទី៤ ឆ្នាំ ២០១៨ ប្រៀបធៀបទៅនឹងត្រីមាសមុន ហើយបម្រែបម្រួលសមតុល្យទឹកប្រាក់ដែលសងត្រលប់យឺតក៏ធ្លាក់ចុះចាប់ពីត្រីមាសមុនផងដែរ។ នេះបើតាមការិយាល័យឥណទានកម្ពុជា (ស៊ីប៊ីស៊ី)។
តាមគេហទំព័ររបស់ការិយាល័យឥណទានកម្ពុជា (ស៊ីប៊ីស៊ី) Credit Bureau Cambodia (CBC) បានបង្ហាញថា ចំនួននៃការស្នើសុំឥណទានជារួម មានការធ្លាក់ចុះបន្តិចធៀបនឹងត្រីមាសទី៣ ដោយឡែកចំនួននៃការដាក់ពាក្យស្នើសុំប័ណ្ណឥណទានមានការកើនឡើងទូទាំងប្រទេស ដែលបង្ហាញថាប្រជាជនចាប់ផ្តើមចូលរួមក្នុងសេដ្ឋកិច្ចឌីជីថល។ ចំនួនគណនីសរុប និងសមតុល្យឥណទានលក្ខណៈបុគ្គលសរុបនៅតែបន្តកើនឡើងគិតត្រឹមចុងត្រីមាសទី៤នេះ។
លោក អឿ សុធារ័ត្ន ប្រធាននាយប្រតិបត្តិនៃការិយាល័យឥណទានកម្ពុជា មានប្រសាសន៍ថា ទោះបីជាចំនួនអ្នកស្នើសុំឥណទានលក្ខណៈបុគ្គលមានការធ្លាក់ចុះបន្តិចក្នុងត្រីមាសនេះ (-០.២៧%) ធៀបនឹងត្រីមាសមុន ដោយឡែកបើមើលពីកំណើនសរុបប្រចាំឆ្នាំ ឃើញថាចំនួនសើ្នសុំឥណទានលក្ខណៈបុគ្គលសរុបប្រចាំឆ្នាំ២០១៨នេះ កើនឡើងដល់ ៣៥% ធៀបនឹងចំនួនសើ្នសុំឥណទានលក្ខណៈបុគ្គលសរុបកាលពីឆ្នាំ២០១៧។
លោកបន្តថា ចំនួនគណនីឥណទានលក្ខណៈបុគ្គលសរុបក៏មានកំណើនរហូតដល់ ១.០៨លានគណនី ហើយសមតុល្យឥណទានសរុបបានកើនឡើងរហូតដល់ ៦.២៤ពាន់លានដុល្លារអាមេរិក គិតត្រឹមចុងឆ្នាំ២០១៨នេះ។ បើមើលពីកំណើនប្រចាំឆ្នាំចំនួនគណនីឥណទានកើនឡើង ២៨ភាគរយ ហើយសមតុល្យឥណទានមានកំណើន ៣៧ភាគរយ បើធៀបនឹងរយៈពេលពេលដូចគ្នាក្នុងឆ្នាំ២០១៧។
លោកបន្ថែមថា “កំណើននៃឥណទានបន្តតាមទំនោរជាវិជ្ជមាន ដូចបញ្ជាក់តាមរយៈការបន្តធា្លក់ចុះនៃអនុបាតឥណទានមិនដំណើរការលើសពី ៣០ថ្ងៃ ពី១.៥១ភាគរយនៅត្រីមាសទី៤ ឆ្នាំ ២០១៧ មកត្រឹម ១.១៨ភាគរយ នៅត្រីមាសទី៤ ឆ្នាំ២០១៨ ដែលបញ្ជាក់អំពីការគ្រប់គ្រងគុណភាពឥណទានបានល្អពីស្ថាប័នហិរញ្ញវត្ថុ។”
នៅក្នុងត្រីមាសទី៤ សំរាប់ឆ្នាំ២០១៨នេះ បើប្រៀបធៀនទៅនឹងត្រីមាសទី៣ ចំនួននៃការស្នើសុំហិរញ្ញវត្ថុផ្ទាល់ខ្លួន (Personal Finance) បានធ្លាក់ចុះបន្តិចចំនួន -០.១៣ភាគរយ ហើយការស្នើកម្ចីអចលនទ្រព្យ (Mortgage) ធ្លាក់ចុះ -៦ភាគរយ។ ដោយឡែក ចំនួននៃការស្នើសុំប័ណ្ណឥណទាន (Credit Card) បានកើនឡើង +១៩ភាគរយ ធៀបនឹងត្រីមាសមុន។ បើមើលជារួម ចំនួននៃការស្នើសុំឥណទានលក្ខណៈបុគ្គលនៃផលិតផលទាំងបីនេះបានធ្លាក់ចុះបន្តិចត្រឹម -០.២៧ភាគរយ ក្នុងត្រីមាសទី៤នេះ។
ទោះបីជាចំនួននៃការស្នើសុំឥណទានលក្ខណៈបុគ្គលមានការធ្លាក់ចុះក៏ដោយ ទំហំទឹកប្រាក់នៃការស្នើសុំឥណទាននេះនៅតែបន្តកើនឡើងដល់ +៦ភាគរយ ដែលមានន័យថា ចំនួនអ្នកស្នើសុំឥណទានតិចជាងត្រីមាសមុន ប៉ុន្តែជាមធ្យមទំហំឥណទានដែលស្នើសុំលើផលិតផលទាំងបីច្រើនជាងត្រីមាសទី៣។ កំណើននេះដោយសារ ទំហំទឹកប្រាក់នៃការស្នើសុំកម្ចីអចលនទ្រព្យបានកើនឡើង ១ភាគរយ ប័ណ្ណឥណទានកើន + ៥ភាគរយហិរញ្ញវត្ថុផ្ទាល់ខ្លួនកើន +៨ភាគរយ៕
