ខេត្តត្បូងឃ្មុំ: អតីតនិស្សិតនៅសាលាជាតិកសិកម្មព្រែកលៀប ជំនាញខាងជំនាញវិទ្យាសាស្រ្តព្រៃឈើ ម្នាក់បានបែកគំនិតងាកទៅចាប់មុខរបរចិញ្ចឹមឃ្មុំវិញ បន្ទាប់ពីបញ្ចប់ការសិក្សាកាលពីឆ្នាំ២០១៦ ដោយអះអាងថា ចំណូលពីការចិញ្ចឹមឃ្មុំជាង ១០ម៉ឺនដុល្លារអាមេរិក គឺលើសពីការរំពឹងទុក។
លោក សាត សូឡី ម្ចាស់កសិដ្ឋានចិញ្ចឹមឃ្មុំ ស្ថិតនៅក្នុងស្រុកតំបែរ ខេត្តត្បូងឃ្មុំ បានថ្លែងប្រាប់បណ្ដញសារព័ត៌មាន The Plus News នៅថ្ងៃទី ០១កុម្ភៈនេះថា ដោយការស្រលាញ់វិស័យកសិកម្មនេះ លោកបានសម្រេចចូលសិក្សានៅសាកលវិទ្យាល័យកសិកម្មរយៈពេល ៤ឆ្នាំ ក្រោយពីបញ្ចប់ការសិក្សានៅឆ្នាំ ២០១៦ បានមានគំនិតចង់បើកអាជីវកម្មមួយ ដែលកើតចេញពីការចិញ្ចឹមសត្វ ប៉ុន្ដែខណៈនោះលោកមិនទាន់ដឹងថាត្រូវចិញ្ចឹមសត្វអ្វីទេ ព្រោះបើចិញ្ចឹមគោ ក្របី ឬសត្វជ្រូកត្រូវការដើមទុនច្រើនពេក ហើយលោកមិនមានលទ្ធិភាពបង្កើតវាទេ។
លោកបន្តខណៈនៅចុងឆ្នាំ ២០១៦ ឱពុកមារបស់លោករស់នៅសហរដ្ឋអាមេរិកជាម្ចាស់កសិដ្ឋានចិញ្ចឹមឃ្មុំនៅទីនោះ ក៏បានណែនាំ និងបង្រៀនពីវិធីសាស្ត្រចិញ្ចឹមឃ្មុំនេះ ក្រោយមកលោកចាប់ផ្ដើមអាជីវកម្មខ្លួនឯងដោយប្រើប្រាស់ទុនប្រមាណជិត ១ពាន់ដុល្លារ។
លោកបញ្ជាក់ថា៖«កាលពីខ្ញុំចាប់ផ្ដើមដំបូង គឺមានលក្ខណៈពិបាកដែរ ប៉ុន្ដែយ៉ាងណា ខ្ញុំបានដាក់ចិត្តដាក់កាយថា ត្រូវតែធ្វើវាឲ្យបាន ក្រោយមកខ្ញុំបានសួរនាំពូខ្ញុំបន្ថែមទៀត ហើយនឹងស្រាវជ្រាវពីបច្ចេកទេសពីបរទេសបន្ថែមទៀត រហូតដល់ពាក់កណ្ដាលឆ្នាំ ២០១៧នេះ ទើបទទួលបានជោគជ័យយ៉ាងខ្លាំង»។
លោកបន្ថែមថា បច្ចុប្បន្ននេះ ក្រៅពីចិញ្ចឹមឃ្មុំនៅកសិដ្ឋានផ្ទាល់ខ្លួននេះ លោកបានបើកកម្មវិធីបណ្ដុះបណ្ដាលកសិករទាំងឡាយណាដែលមានចំណូលចិត្តផ្នែកការចិញ្ចឹមឃ្មុំនេះ ព្រោះគេឃើញទីផ្សារទឹកឃ្មុំកំពុងរីកចំរើនខ្លាំង ហើយលោកមានគម្រោងនាំទឹកឃ្មុំចេញទៅក្រៅប្រទេស។
ថ្វិត្បិដថា របរនេះអាចផ្តល់ចំណូលច្រើនក្តី អាជីវកររូបនេះបានបង្ហើបថា ការបង្កើតរបរថ្មីមួយមិនមែនងាយស្រួលឡើយ តួយ៉ាងដូចជារបរចិញ្ចឹមឃ្មុំនេះតែម្តង ខណៈរបរចិញ្ចឹមឃ្មុំនៅស្រុកខ្មែរធ្លាប់មានអ្នកបរាជ័យជាច្រើននាក់មកហើយ។ កត្តាបរាជ័យលោកកត់សម្គាល់ឃើញថា ដោយសារតែមូលហេតុធំ២គឺ ទី១កត្តាតំបន់ ដែលខ្វះខាតផ្ការុក្ខជាតិដែលជាចំណីចាំបាច់សម្រាប់ផលិតទឹកឃ្មុំ និងខ្វះខាតបច្ចេកទេស ដែលធ្វើអោយអ្នកចិញ្ចឹមពុំអាចទទួលផលពីឃ្មុំឡើយ។
គួរជម្រាបថា កសិដ្ឋានចិញ្ចឹមឃ្មុំរបស់លោក សាត សូឡី ស្ថិតនៅស្រុកតំបែរ ខេត្តត្បូងឃ្មុំ បើសិនលោកអ្នកចាប់អារម្មណ៍ពីបច្ចេកទេស និងរៀនពីរបៀបចិញ្ចឹមឃ្មុំនេះអាចទំនាក់ទំនងសាកសួរបានតាមរយៈលេខ ០៧៦៧៣៣៣៣៦៧/០៨៨៧៣៣៣៣៣៥៕
