ភ្នំពេញ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈលោកបណ្ឌិត អ៊ិត សំហេង នៅថ្ងៃទី ០១ ខែកុម្ហៈនេះ បានថ្លែងថា ពលករដែលធ្វើការនៅជប៉ុន គឺមានចំនួនសរុបជាង ៩ពាន់នាក់ ហើយសង្ឈឹមថា នៅឆ្នាំក្រោយនឹងមានការកើនចំនួនឡើងទ្វេរមួយជាពីរ។
ការលើកឡើងនេះ ក្នុងជំនួបរវាងលោក និងលោក Fumio Yamada ប្រធានអង្គការសមាគមសហប្រតិបត្តិការកម្ពុជា-ជប៉ុន ចូលជួបសម្តែងការគួរសម និងពិភាក្សាការងារ ដើម្បីបង្កើនទីផ្សារការងារ និងឱកាសការងារដល់ប្រជាជនកម្ពុជា នៅទីស្តីការក្រសួង។
លោករដ្ឋមន្ត្រី បានលើកឡើងថា ក្នុងខែមិនា ក្នុង២០១៩នេះ កម្ពុជានឹងត្រូវចុះហត្ថលេខាជាមួយនឹងភាគីជប៉ុន នៅឯប្រទេសជប៉ុន លើកិច្ចព្រមព្រៀងសហប្រតិបត្តិការ ស្តីពីពលករជំនាញ។ លោកថា៖«ពលករដែលធ្វើការនៅជប៉ុន គឺមានចំនួនជាង ៩ពាន់នាក់ សង្ឈឹមថា នៅឆ្នាំក្រោយនឹងមានការកើនចំនួនឡើងទ្វេរមួយជាពីរ។ ដូច្នេះពលករក៏ត្រូវការពេលវេលាក្នុងការបណ្តុះបណ្តាលឲ្យមានជំនាញច្បាស់លាស់ក្នុងការបំពេញកិច្ចការងាររបស់ពួកគេរឹតតែល្អប្រសើរថែមទៀត»។
ក្នុងនោះ លោកបន្តថា បច្ចុប្បន្នវិស័យសំណង់របស់កម្ពុជា កំពុងមានការរីកចម្រើនជាខ្លាំង ក្នុងនោះមានក្រុមហ៊ុនសំណង់របស់ជប៉ុនបានរួមចំណែកក្នុងការអភិវឌ្ឍលើវិស័យសំណង់នេះ។ លោកថា៖«សំណង់មិនអាចប្រហែសបានទេ ប៉ះពាល់ដល់អាយុជីវិតរបស់មនុស្ស បើបច្ចេកទេសមិនល្អគឺមានហានិភ័យដល់ជីវិតរបស់មនុស្ស ដូច្នេះត្រូវយកចិត្តទុកដាក់ខ្ពស់ក្នុងរៀបចំដំណើរការសាងសង់អោយទៅតាមបទដ្ឋានស្តង់ដាសំណង់»។
ចំណែក លោក Fumio Yamada បានថ្លែងថា បច្ចុប្បន្នក្រសួងការងារ និងបណ្តុះបណ្តាលវិជ្ជាជីវៈ បាននឹងកំពុងសហការ ជាមួយមន្ត្រីជំនាញនៃប្រទេសជប៉ុន ដើម្បីពិនិត្យ និងរៀបចំឱ្យមានកិច្ចព្រមព្រៀងសហប្រតិបត្តិការជាមួយគ្នា ក្នុងគោលបំណងដើម្បីបង្កើនទីផ្សារការងារ និងឱកាសការងារដល់ប្រជាជនកម្ពុជា។
ដោយជប៉ុន បានចាប់ផ្តើមរៀបចំបង្កើតឱ្យមានគម្រោងថ្មី សម្រាប់បង្កើនលំហូរនៃកម្លាំងពលកម្មពីប្រទេសផ្សេងៗ និងសម្រាប់អនុវត្តនៅអំឡុងខែមេសា ឆ្នាំ២០១៩ខាងមុខនេះ ដើម្បីដោះស្រាយបញ្ហាកង្វះកម្លាំងពលកម្មជំនាញនៅជប៉ុន៕
