ភ្នំពេញ៖ តំណាងធនាគារអភិវឌ្ឍន៍អាស៊ី(ADB) ប្រចាំកម្ពុជាបានលើកឡើងថា គម្រោងសំខាន់ចំនួនពីរគឺ គម្រោងធ្វើឱ្យប្រសើរធារាសាស្ត្រកសិកម្ម និងគម្រោងបរិធានហិរញ្ញទានច្រើនយ៉ាងស្តីពីធារាសាស្ត្រ និងការគ្រប់គ្រងធនធានទឹក ដែលមានទឹកប្រាក់សរុបចំនួនប្រមាណ ៣៨០ លានដុល្លារ នឹងត្រូវបានអនុវត្តន៍ឆាប់ៗក្នុងឆ្នាំ ២០១៩ នេះ សម្រាប់ជួយដល់កម្ពុជា។
ការបង្ហាញនេះ ក្នុងជំនួបពិភាក្សាការងារជាមួយលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងលោកស្រី Sunniya Durrani-Jamal ប្រធានស្ថានតំណាង ធនាគារអភិវឌ្ឍន៍អាស៊ី (ADB) ប្រចាំកម្ពុជា កាលពីថ្ងៃទី០១ ខែកុម្ភៈ ឆ្នាំ២០១៩ នៅទីស្តីការក្រសួង។
តាមការចេញការផ្សាយរបស់ក្រសួងធនធានទឹក និងឧតុនិយមបានបង្ហាញថា លោកស្រី Sunniya Durrani-Jamal បានបញ្ជាក់ថា ការបន្តជួយសម្រាប់វិស័យធនធានទឹក ដើម្បីបន្តរួមចំណែកទ្រទ្រង់ដល់ការអភិវឌ្ឍ និងកំណើនសេដ្ឋកិច្ចកម្ពុជា នៅតែជារបៀបវារៈសំខាន់ និងជាអាទិភាពរបស់ ADB ដែលកិច្ចការនេះ នឹងផ្តោតការយកចិត្តទុកដាក់ជាពិសេស លើសន្តិសុខទឹក ការធ្វើឱ្យ ប្រសើរនូវប្រសិទ្ធភាពផ្នែកធារាសាស្ត្រ ការគ្រប់គ្រងទឹកជំនន់ និងគ្រោះរាំងស្ងួត ការគ្រប់គ្រងធនធានទឹកចម្រុះសម្រាប់អាងទន្លេ និងការពង្រឹងស្ថាប័នជាដើម។
លោកស្រីបានចាត់ទុកការរៀបចំ និងការអនុវត្តយុទ្ធសាស្ត្រភាពជាដៃគូសម្រាប់ប្រទេស កម្ពុជា២០១៩-២០២៣ ដើម្បីបន្តរួមចំណែកជួយដល់កិច្ចខិតខំប្រឹងប្រែងរបស់រាជរដ្ឋាភិបាល ក្នុងការរក្សា និងជំរុញកំណើន និងនិរន្តរភាពនៃការអភិវឌ្ឍសេដ្ឋកិច្ចកម្ពុជា ឱ្យមានសន្ទុះទៅមុខជានិច្ច។
លោកស្រីថា ADB កន្លងមក ក៏ដូចជាពេលបច្ចុប្បន្ន និងការងារជាអាទិភាព ក៏ដូចជាកិច្ចសហប្រតិបត្តិការ ដែលត្រូវរួមគ្នាបន្តយកចិត្តទុកដាក់អនុវត្តន៍ឱ្យបានកាន់តែសកម្ម និងមានប្រសិទ្ធភាពថែមទៀត សំដៅរួមចំណែកជំរុញកំណើន និងការរីកចម្រើនប្រកបដាយនិរន្តរភាពនៃសេដ្ឋកិច្ចកម្ពុជាសម្រាប់ពេលបច្ចុប្បន្ន និងទៅអនាគត។
លោក លឹម គានហោ បានវាយតម្លៃខ្ពស់ចំពោះការរួមចំណែកប្រកបដោយប្រសិទ្ធភាពរបស់ ADB ដល់ការអភិវឌ្ឍ និងការរីកលូតលាស់សេដ្ឋកិច្ច សង្គមនៃកម្ពុជា រហូតមកដល់ពេលនេះ។ លោកថា សម្រាប់វិស័យធនធានទឹក និងឧតុនិយម ADB បានរួមចំណែកជួយលើការពង្រឹង និងអភិវឌ្ឍស្ថាប័ន ការកសាងសមត្ថភាព ការរៀបចំគោលនយោបាយ និងបទដ្ឋានគតិយុត្តិ ការគ្រប់គ្រង និងការអភិវឌ្ឍធនធានទឹក ដូចជាផ្នែកធារាសាស្ត្រជាដើម។
លោករដ្ឋមន្ត្រីបានលើកឡើងអំពីស្ថានភាពអាកាសធាតុដែលប្រទេសកម្ពុជាជួបប្រទះសម្រាប់រដូវប្រាំងនេះ និងបានបង្ហាញអំពីវិធានការដែលត្រូវអនុវត្តន៍ឱ្យមានប្រសិទ្ធភាពនូវសារាចរណែនាំរបស់រាជរដ្ឋាភិបាលស្ដីពីការចាត់វិធានការថែរក្សាទឹកទុក៕
